ការសម្រេចលុបចោលប្រាក់កម្ចីពី ADB នេះ បន្ទាប់ពីមានការស្នើឡើងដោយក្រសួងហិរញ្ញវត្ថុវៀតណាម និងបានអនុម័តដោយឧបនាយករដ្ឋមន្ត្រីវៀតណាម លោក Pham Binh Minh។
ទំហំទឹកប្រាក់កម្ចី ៣៩០លានដុល្លារដែលបានលុបចោលនេះ គឺស្ថិតនៅក្នុងចំណោមគម្រោងទឹកប្រាក់កម្ចីសរុបរបស់ ADB ដែលសម្រេចនឹងផ្ដល់ឲ្យវៀតណាមចំនួន ៥៤០ លានដុល្លារអាមេរិក សម្រាប់គម្រោងសាងសង់ខ្សែរថភ្លើង Metro ទី២ នៅក្នុងទីក្រុងហូជីមិញ ដោយគម្រោងនេះ ត្រូវចំណាយថវិកាសរុបអស់ប្រមាណជាង ២ពាន់លានដុល្លារអាមេរិកឯណោះ។
រដ្ឋាភិបាលវៀតណាម បាននិងកំពុងពិនិត្យឡើងវិញ ក៏ដូចជារៀបចំរចនាសម្ព័ន្ធឡើងវិញ និងលុបចោលប្រាក់កម្ចី សម្រាប់គម្រោងផ្លូវរថភ្លើង Metro ទី២ របស់ខ្លួននេះ ដោយគិតថា រដ្ឋមិនត្រូវការកម្ចីច្រើនពីបរទេស និងពហុភាគីនោះទេ។
អត្ថបទទាក់ទង!
ជាមួយគ្នានេះដែរ រដ្ឋាភិបាលវៀតណាម បានចាត់តាំងឲ្យអាជ្ញាធរក្រុងហូជីមិញ ប្រមូលមូលនិធិសម្រាប់គម្រោងនេះ។ គម្រោង សាងសង់ផ្លូវរថភ្លើង Metro ទី២ របស់វៀតណាម គឺមានចម្ងាយរត់ ១១គីឡូម៉ែត្រ និងមានស្ថានីយចំនួន ១០កន្លែង។
ប្រទេសវៀតណាម ក៏ធ្លាប់បានចុះហត្ថលេខាលើកិច្ចព្រមព្រៀងជាមួយនឹងធនាគារបរទេសចំនួន ៣ សម្រាប់ទទួលបានកម្ចីសាងសង់ខ្សែរថភ្លើងនេះ ដោយក្នុងនោះ ខ្ចីពីធនាគាររដ្ឋ អាល្លឺម៉ង់ KfW ចំនួន ៣១៣ លានដុល្លារ ខ្ចីពីធនាគារវិនិយោគអឺរ៉ុប ១៩៥ លានដុល្លារ និងធនាគារ ADB ៥៤០ លានដុល្លារ ប៉ុន្ដែ ក្រោយពីបានសម្រេចលុបចោលប្រាក់កម្ចី ៣៩០ លានដុល្លារនាពេលនេះ បានធ្វើឲ្យ វៀតណាមនៅខ្ចីពី ADB ត្រឹមតែ ១៥០លានដុល្លារប៉ុណ្ណោះ។
គម្រោងខ្សែរថភ្លើង Metro ទី២របស់វៀតណាមនេះ កាលពីដើមឡើយគ្រោងចំណាយថវិកាតែ១ពាន់១រយលានដុល្លារអាមេរិកប៉ុណ្ណោះ តែក្រោយមកថវិកាសម្រាប់សាងសង់ បានបន្ដកើនឡើងដល់ទៅជាង ២ពាន់លានដុល្លារ ខណៈដែលគម្រោងនេះ នឹងត្រូវសាងសង់នៅចន្លោះឆ្នាំ២០២១ និងឆ្នាំ២០២៦។
គម្រោងខ្សែរថភ្លើងនេះ ត្រូវបានរំពឹងថា នឹងអាចមានសមត្ថភាពដឹកអ្នកដំណើរជាមធ្យមប្រមាណ ១៤ម៉ឺននាក់ក្នុងមួយថ្ងៃ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
