ស្ថិតិពីនាយកដ្ឋានទីផ្សារក្នុងស្រុក នៃក្រសួងឧស្សាហកម្ម និងពាណិជ្ជកម្មវៀតណាម បានឲ្យដឹងថា វៀតណាម មានផ្សារចំនួន ៨.៦៦០ កន្លែង ផ្សារទំនើបមាន ៨០០ កន្លែង មជ្ឈមណ្ឌលលក់ទំនិញមានចំនួន១៦៨ កន្លែង និង អាជីវកម្មហាងលក់រាយខ្នាតតូច មាន ជាង១លានកន្លែង។
ទីផ្សារលក់រាយរបស់វៀតណាម ត្រូវបានដឹងថា គឺជាគោលដៅដ៏ទាក់ទាញបំផុតរបស់អ្នកវិនិយោគបរទេស។ ទន្ទឹមនឹងនេះ អ្នកលក់ក្នុងស្រុកក៏បានខិតខំខ្លាំងណាស់ដែរ ដើម្បីទទួលបានចំណែកទីផ្សារដែលកំពុងមានការប្រកួតប្រជែងយ៉ាងសម្បើមនេះ។ មានអាជីវកម្មជាច្រើនបានអភិវឌ្ឍភាពប្រកួតប្រជែងរបស់ខ្លួន ពង្រីកបណ្ដាញទំនាក់ទំនង និងការអភិវឌ្ឍបណ្ដាញលក់រាយតាមអនឡាញជាច្រើនទៀតផងដែរ។
អត្ថបទទាក់ទង!
ផ្សារទំនើប អ៊ីអន គ្រោងទិញទំនិញក្នុងស្រុកវៀតណាម កើនដល់ ១ពាន់លាននៅឆ្នាំ ២០២៥
ដោយឡែក ផ្សារទំនើបអ៊ីអនម៉ល របស់ជប៉ុន ដែលជាកន្លែងលក់ទំនិញរាយ និងចែកចាយបន្តដ៏ធំនោះ គ្រោងនឹងពង្រីក ការកម្ម៉ង់ទិញ ផលិតផលរបស់វៀតណាម រហូតដល់ទៅ ៥០០លានដុល្លារអាមេរិក នៅឆ្នាំ ២០២០ខាងមុខ ហើយមិនត្រឹមតែប៉ុណ្ណោះ គ្រោងនឹងទិញបន្ថែម ៤ដង ដែលមានតម្លៃសរុបដល់ ១ពាន់លានដុល្លារអាមេរិក នៅត្រឹមឆ្នាំ ២០២៥ផងដែរ។ នេះបើយោងតាមការចេញផ្សាយរបស់ សារព័ត៌មានក្នុងស្រុកវៀតណាម Vietnam Express កាលពីពេលថ្មីៗនេះ។
នាយកប្រតិបត្តិផ្សារទំនើបអ៊ីអន បានប្រាប់ដល់ មន្ត្រីការិយាល័យក្រសួងឧស្សាហកម្ម និងពាណិជ្ជកម្មវៀតណាម ឲ្យដឹងថា ក្រុមហ៊ុន នឹងបង្កើនការទិញផលិតផលវៀតណាម ទ្វេដង ឲ្យកើនដល់ ៥០០លានដុល្លារអាមេរិក នៅឆ្នាំ ២០២០ខាងមុខនេះ។
កាលពីឆ្នាំ ២០១៨កន្លងទៅ អ៊ីអន បាននាំចូលផលិតផលវៀតណាម សម្រាប់ហាងនៅក្នុងប្រទេសជប៉ុន ប្រមាណ ២៤៥លានដុល្លារអាមេរិក កើនឡើង ៧ភាគរយធៀបនឹងឆ្នាំមុន ហើយក្នុងនោះ សម្លៀកបំពាក់ មានជាង ៥៥ភាគរយ នៃផលិតផលសរុប។
លោក យ៉ាសួរ នីស៊ីតូហេ អគ្គនាយកប្រតិបត្តិនៃក្រុមហ៊ុនអ៊ីអនវៀតណាម បានឲ្យដឹងថា ក្រុមហ៊ុន នឹងផ្តល់ជំនួយជាបច្ចេកទេសដល់ អ្នកផ្គត់ផ្គង់ផលិតផលវៀតណាម ដើម្បីឲ្យពួកគាត់ អាចបំពេញតាម តម្រូវការ និងស្តង់ដារជប៉ុន យ៉ាងពិតប្រាកដ។
គួររម្លឹកថា ក្រុមហ៊ុនមេ របស់ផ្សារទំនើបអ៊ីអន បានបង្ហាញពីគម្រោងវិនិយោគនៅក្នុង ប្រទេសវៀតណាម ដែលគិតជាទឹកប្រាក់ប្រមាណ ៥ពាន់លានដុល្លារអាមេរិក សាងសង់ផ្សារទំនើបចំនួន ៣០ នៅទូទាំងប្រទេសវៀតណាម និងបង្កើតការងារជាង ៥ម៉ឺនកន្លែង។
លោក ម៉ាសាគិ ស៊ុយសុគី ប្រធានក្រុមប្រឹក្សាភិបាលនៃ ក្រុមហ៊ុនសេវាហិរញ្ញវត្ថុ អ៊ីអន ដែលជាក្រុមហ៊ុនមេរបស់ផ្សារទំនើបអ៊ីអន បានឲ្យដឹងថា ការលក់ទំនិញ និងសេវាកម្មសរុប នៅក្នុងប្រទេសវៀតណាម កាលពីឆ្នាំ ២០១៨ មានការកើនឡើងប្រមាណ ១២ភាគរយ ធៀបនឹងឆ្នាំមុន ហើយគំរូអាជីវកម្មនៃផ្សារទំនើបអ៊ីអន ត្រូវបានទទួលស្គាល់ដោយ ប្រជាជនវៀតណាមហើយ។
តើអ្នកបានអានអត្ថបទនេះ ហើយឬនៅ?
វៀតណាម ក៏បានបង្ហាញការសាទរចំពោះ គម្រោងពង្រីកអាជីវកម្មរបស់ផ្សារទំនើបអ៊ីអននេះ ដែលអាចអភិវឌ្ឍន៍ វិស័យលក់រាយក្នុងស្រុករបស់ខ្លួន និងអាចនាំចេញផលិតផលវៀតណាម ទៅកាន់បណ្តាញ ផ្សារអ៊ីអន ទូទាំងសកលលោក ថែមទៀតផង។
គួរជម្រាបដែរថា គិតមកទល់ពេលបច្ចុប្បន្ន ប្រទេសវៀតណាម មានផ្សារទំនើបអ៊ីអនចំនួន ៤ កំពុងតែបើកដំណើរការ និងមាន ២ទៀត ស្ថិតក្នុងការសាងសង់ គ្រោងនឹងបញ្ចប់នៅក្នុងឆ្នាំនេះ និងឆ្នាំ ២០២០ខាងមុខ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
