បច្ចុប្បន្ន វៀតណាមកំពុងត្រៀមរៀបចំបង្កើតតំបន់សេដ្ឋកិច្ចពិសេស នៅខេត្តកាងនិញ ភាគខាងជើង ខេត្តភាគកណ្ដាល ខាន់ ហូ (Khanh Hoa) និងកោះរមណីយដ្ឋាន ភូគួក (ខ្មែរហៅ កោះត្រល់) ដែលស្ថិតនៅភាគខាងត្បូងនៃប្រទេសវៀតណាម។
នេះបើយោងតាមការចុះផ្សាយរបស់សារព័ត៌មាននានា នៅប្រទេសវៀតណាម។
សព្វថ្ងៃ ច្បាប់ស្ដីពីការបង្កើតតំបន់សេដ្ឋកិច្ចពិសេស កំពុងស្ថិតក្រោមកិច្ចពិភាក្សានៅឯរដ្ឋសភា ហើយគេរំពឹងថា ច្បាប់នេះនឹងត្រូវអនុម័ត នៅខែឧសភា ឆ្នាំក្រោយ។
បើតាមសេចក្ដីព្រាងច្បាប់ តំបន់សេដ្ឋកិច្ចពិសេសនឹងផ្ដល់ជូននូវការលើកទឹកចិត្តជាច្រើន ដល់វិនិយោគិន ដូចជា រយៈពេលជួលអចលនទ្រព្យដល់ទៅ ៩៩ឆ្នាំសម្រាប់វិនិយោគិនបរទេស ដែលពីមុនមក នៅក្នុងប្រទេសវៀតណាម ការជួលអចលនទ្រព្យដោយជនបរទេសអនុញ្ញាតបានត្រឹម ៥០ឆ្នាំ និងការលើកលែងពន្ធលើប្រាក់ចំណូលសម្រាប់រយៈពេល ៥ឆ្នាំ។
តើអ្នកបានអានអត្ថបទនេះ ឬនៅ?
ដោយសារគោលនយោបាយអនុគ្រោះទាំងនេះ មន្ត្រីវៀតណាមថា តំបន់សេដ្ឋកិច្ចពិសេសទាំងនេះ អាចផ្ដល់ប្រាក់ខែបាន ១ម៉ឺន ៣ពាន់ដុល្លារ ក្នុងមួយឆ្នាំ ដល់បុគ្គលិកនិយោជិតក្នុងស្រុក ខណៈដែលចំណូលមធ្យមក្នុងមួយឆ្នាំរបស់ពលរដ្ឋវៀតណាម បច្ចុប្បន្ន គឺ ២ពាន់ ២០០ដុល្លារ។ ម្យ៉ាងវិញទៀត រដ្ឋាភិបាលវៀតណាមនឹងបានចំណូលពីការជួលដី ប្រហែល ៩ពាន់ ៥០០លានដុល្លារ។
មន្ត្រីវៀតណាមឲ្យដឹងថា សព្វថ្ងៃ បើនិយាយពីរឿងតំបន់សេដ្ឋកិច្ចពិសេស វៀតណាមដើរក្រោយគេ ខណៈដែលនៅទូទាំងពិភពលោក មានតំបន់សេដ្ឋកិច្ចពិសេសសរុប ៤ពាន់ ៥០០កន្លែង នៅក្នុងប្រទេសចំនួន ១៤០។
ដោយឡែក ប្រទេសវៀតណាម បច្ចុប្បន្ន មានតំបន់សេដ្ឋកិច្ចធម្មតា ៤៣កន្លែង នៅតាមតំបន់ព្រំដែន និងតំបន់ឆ្នេរ និងតំបន់ឧស្សាហកម្ម ៣២៨កន្លែង ដែលទាក់ទាញវិនិយោគទុនសរុបរួមបានប្រហែល ១៥៣ពាន់លានដុល្លារអាមេរិក ឬច្រើនជាងពាក់កណ្ដាលនៃវិនិយោគទុនបរទេសដែលបានសន្យាចំពោះប្រទេសវៀតណាម៕
