វៀតណាម បានត្រៀមកុងតឺន័រដឹកផ្លែគូលែនស្រស់ចំនួន ៣កុងតឺន័រ ដែលនឹងត្រូវដឹកជញ្ជូនទៅកាន់ទីផ្សារសហរដ្ឋអាមេរិក អូស្ត្រាលី និងសិង្ហបុរី តាមផ្លូវសមុទ្រ។ ក្នុងនោះ មានក្រុមហ៊ុននាំចេញចំនួន២ ក្នុងចំណោមក្រុមហ៊ុនចំនួន៥ បានចុះកិច្ចសន្យានាំចេញផ្លែគូលែនជាង ៤ពាន់តោន ទៅកាន់ទីផ្សារចំនួន ១៥ នៅក្នុងពិភពលោក។ ក្រៅពី ទីផ្សារទាំងនេះ បើតាមក្រសួងកសិកម្ម និងអភិវឌ្ឍន៍ជនបទវៀតណាម នៅឆ្នាំនេះ វៀតណាមក៏រំពឹងថា នឹងអាចនាំចេញផ្លែគូលែននេះ ទៅកាន់ទីផ្សារប្រទេសជប៉ុនផងដែរ។
ការដឹកជញ្ជូនតាមផ្លូវសមុទ្រ ត្រូវបានគេរំពឹងថា នឹងក្លាយជាមធ្យោបាយដឹកជញ្ជូនដ៏សំខាន់ សម្រាប់ការនាំចេញផ្លែគូលែនរបស់វៀតណាមប្រមាណ ៨០% នៅឆ្នាំនេះ។
អត្ថបទទាក់ទង!
លោក ហ័ង ត្រុង អគ្គនាយក នាយកដ្ឋានការពាររុក្ខជាតិ នៃក្រសួងកសិកម្ម និអភិវឌ្ឍន៍ជនបទវៀតណាម បានឲ្យដឹងថា នៅឆ្នាំនេះ គម្រោងការនាំចេញធំ គឺជាការនាំចេញតាមផ្លូវសមុទ្រ។ ការដឹកជញ្ជូនតាមផ្លូវសមុទ្រ ប្រហែលត្រូវការពេលជិត១ខែ ខណៈដែលការដឹកជញ្ជូនតាមផ្លូវអាកាសនាពេលកន្លងមកប្រើពេលតែប៉ុន្មានម៉ោងប៉ុណ្ណោះ។ ដូច្នេះ ដើម្បីរក្សាផ្លែគូលែនបានល្អ អ្នកនាំចេញ ត្រូវប្រាកដថាផ្លែគូលែននោះ មិនមានបញ្ហាដោយសារសត្វល្អិតចង្រៃ ហើយត្រូវប្រើប្រាស់បច្ចេកវិទ្យាស្ដុកទុកថ្មី និងទំនើប។ ទោះយ៉ាងណា ការស្តុកទុក រក្សាផ្លែគូលែន ឲ្យមានគុណភាពល្អ ដើម្បីបានទៅដល់ទីផ្សារបញ្ជាទិញ គឺជារឿងមិនងាយស្រួលប៉ុន្មានទេ។
ទោះជាយ៉ាងនេះក្ដី ការដឹកជញ្ជូនតាមផ្លូវសមុទ្រ ត្រូវបានគេដឹងថា គឺមានតម្លៃទាបជាងការដឹកជញ្ជូនតាមផ្លូវអាកាស។ តួយ៉ាង តាមការប៉ាន់ប្រមាណ ការដឹកជញ្ជូនផ្លែគូលែនដាក់តាមកប៉ាល់ តាមផ្លូវសមុទ្រ ទៅកាន់អាមេរិក អូស្ត្រាលី និងអឺរ៉ុប ត្រូវចំណាយពេលប្រហែល ២០ថ្ងៃ និងត្រូវចំណាយប្រមាណ ១៥០ ដុល្លារ ក្នុងមួយតោន និងចំណាយពេល៦ថ្ងៃ សម្រាប់ដឹកជញ្ជូនទៅកាន់សិង្ហបុរី ដោយចំណាយ៧០ដុល្លារក្នុងមួយតោន ខណៈដែលការដឹកជញ្ជូនតាមផ្លូវអាកាសវិញ ជាទូទៅត្រូវប្រើពេលប្រហែលតែ ២ថ្ងៃប៉ុណ្ណោះ ប៉ុន្ដែការចំណាយវិញ គឺមានដល់ទៅ ៥.៥០០ ដុល្លារអាមេរិក ក្នុងមួយតោន។ ដូច្នេះ ជម្រើសដឹកជញ្ជូនតាមផ្លូវសមុទ្រនេះ គឺជាមធ្យោបាយមួយអាចជួយដល់ការនាំចេញផ្លែគូលែនរបស់វៀតណាម ទៅដល់ទីផ្សារនាំចេញដ៏លំបាកៗសម្រាប់ឆ្នាំនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
