ត្រូវបានស្រង់សម្ដីដោយ សារព័ត៌មានក្នុងស្រុករបស់វៀតណាម Vietnam news លោក ត្រុង ឌិញហូវ អគ្គលេខាធិការសមាគមអ្នកនាំចេញ និងផលិតអាហារសមុទ្រវៀតណាម បានឲ្យដឹងថា ការនាំចេញត្រីប្រានៅឆ្នាំនេះ នឹងបន្តកើនឡើងនៅប៉ុន្មានខែចុងក្រោយនៃឆ្នាំនេះ ពោលគឺ ការនាំចេញត្រីប្រា អាចនឹងកើនដល់ជាង ២ពាន់លានដុល្លារអាមេរិក ស្មើនឹងកំណើន ២២% ធៀបនឹងឆ្នាំ២០១៧។
តាមប្រភពព័ត៌មានពីសមាគមអ្នកនាំចេញ និងផលិតអាហារសមុទ្រវៀតណាម ដដែលនេះ បានឲ្យដឹងទៀតថា គិតត្រឹម៩ខែនៃឆ្នាំនេះការនាំចេញត្រីប្រា សម្រេចបានជាង ១.៦០០ លានដុល្លារអាមេរិក ស្មើនឹងកំណើន ២៤%។
អត្ថបទទាក់ទង!
បើតាមរបាយការណ៍ចេញផ្សាយដោយក្រុមហ៊ុន Rong Viet Securities Joint Stock បានបង្ហាញថា វិស័យជលផល ក៏ដូចជាការនាំចេញត្រីប្រារបស់វៀតណាម កំពុងទាញបានអត្ថប្រយោជន៍ជាច្រើនពីសង្គ្រាមពាណិជ្ជកម្មរវាងមហាអំណាចចិន និងអាមេរិក ដោយបានកាត់បន្ថយរបាំងពន្ធនាំចូលផលិតផលគ្រឿងសមុទ្ររបស់វៀតណាមជាច្រើនមុខ។ ទន្ទឹមនឹងនេះ ប្រទេសចិន ក៏បានកាត់បន្ថយពន្ធនាំចូលទំនិញមួយចំនួន ដើម្បីបំពេញតម្រូវការក្នុងស្រុករបស់ខ្លួនផងដែរ ដែលវាបានផ្ដល់នូវឱកាសកាន់តែប្រសើរសម្រាប់ការនាំចេញរបស់វៀតណាម ទៅកាន់ប្រទេសចិន។
ជាមួយគ្នានេះដែរ បច្ចុប្បន្នសហគ្រាសកែច្នៃត្រីប្រា កំពុងដំណើរការទិញវត្ថុធាតុដើម ដើម្បីដំណើរការផលិតកែច្នៃត្រីប្រាសម្រាប់នាំចេញ ដើម្បីតម្រូវការទីផ្សារពិភពលោក ដែលកំពុងមានកំណើនខ្ពស់នៅចុងឆ្នាំនេះ។
ទោះយ៉ាងណាក៏ដោយ សហគ្រាសកែច្នៃទាំងនោះ បាននិងកំពុងប្រឈមមុខនឹងកង្វះខាតវត្ថុធាតុដើម សម្រាប់ដំណើរការផលិតនាំចេញ ព្រោះថា មានអ្នកចិញ្ចឹមត្រីជាច្រើនបានឈប់ចិញ្ចឹមត្រីប្រា ដោយសារតែពួកគេខ្វះពូជកូនត្រី។
ក្រុមអ្នកជំនាញ បាននិយាយថា ដំណោះស្រាយជុំវិញនឹងបញ្ហាកង្វះវត្ថុធាតុដើមនេះ គួរតែមានការរៀបចំផែនការតំបន់ផលិតឡើងវិញ ហើយអ្នកផលិតគួរតែពង្រឹងកម្មវិធីបែបវិទ្យាសាស្ត្រ និងបច្ចេកវិទ្យា ធ្វើពិពិធកម្មផលិតផលនាំចេញ និងទីផ្សារ និងការផ្ដល់នូវអាទិភាពសម្រាប់ផលិតផលដែលមានតម្លៃបន្ថែមខ្ពស់ជាដើម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
