បើតាមការចុះផ្សាយរបស់សារព័ត៌មានវៀតណាម ដោយស្រង់ប្រភពពីនាយកដ្ឋាននាំចេញ-នាំចូល នៃក្រសួងឧស្សាហកម្មនិងពាណិជ្ជកម្ម ក្នុងចំណោមមុខផលិតផលកសិកម្មនាំចេញទៅចិន អង្ករមានការធ្លាក់ចុះខ្លាំងជាងគេ គឺធ្លាក់ចុះដល់ទៅជាង ៦៧% ដោយឡែកបន្លែនិងផ្លែឈើ ធ្លាក់ចុះជាង ៨% ។
ការថមថយចុះនៃការនាំចេញនេះ កើតឡើងបន្ទាប់ពីចិនបានចាប់ផ្ដើមរឹតបន្តឹងបទដ្ឋានគុណភាពនិងសុវត្ថិភាពសម្រាប់ការនាំចូល ចាប់តាំងពីដើមឆ្នាំនេះមក ។ ឧទាហរណ៍ ចេកត្រូវតែវេចខ្ចប់ដោយបិទស្លាកសរសេរជាអក្សរចិន ឬឪឡឹកត្រូវតែបិទកូដសម្រាប់ស្រាវជ្រាវប្រភពដើម ។ល។ ហើយផ្លែឈើខ្លះ អនុញ្ញាតឲ្យនាំចូលប្រទេសចិន តែតាមច្រកព្រំដែនជាក់លាក់មួយចំនួនប៉ុណ្ណោះ។
អត្ថបទទាក់ទង
រដ្ឋមន្ត្រីឧស្សាហកម្មនិងពាណិជ្ជកម្មវៀតណាម បានបន្ទោសអ្នកនាំចេញផលិតផលកសិកម្មវៀតណាមទៅកាន់ប្រទេសចិន ថា គ្មានវិជ្ជាជីវៈ និងពឹងផ្អែកតែទៅលើច្រកមិនផ្លូវការ។ លោករដ្ឋមន្ត្រី បន្តថា ភាគច្រើននៃអ្នកនាំចេញ គឺជាសហគ្រាសខ្នាតតូច ដែលខ្វះបច្ចុប្បន្នភាពព័ត៌មាន និងប្រភពផ្គត់ផ្គង់គ្មានស្ថិរភាព ជាដើម។
ប្រធាននាយកដ្ឋានទីផ្សារអាស៊ី-អាហ្វ្រិក នៃក្រសួងពាណិជ្ជកម្មវៀតណាម លោក Le Hoang Oanh និយាយថា អ្នកនាំចេញគួរតែបោះបង់ចោលនូវផ្នត់គំនិតដែលយល់ឃើញថា ចិនជាទីផ្សារស្រួលសម្រាប់ការនាំចេញ ដោយត្រូវកែប្រែពីការនាំចេញមិនផ្លូវការទៅជាផ្លូវការ ពង្រឹងគុណភាពផ្លែឈើ និងសម្របសម្រួលការស្រាវជ្រាវប្រភពដើមផលិតផល។
បច្ចុប្បន្ន ផ្លែឈើចំនួន ៩មុខ របស់វៀតណាម ដែលត្រូវបានអនុញ្ញាតឲ្យនាំចូលប្រទេសចិន តាមច្រកផ្លូវការ រួមមាន ផ្លែស្រការនាគ, ស្វាយ, មៀន, គូលែន, សាវម៉ាវ, ចេក, ឪឡឹក, ខ្នុរ និងមង្ឃុត៕
