ក្រុមហ៊ុនមួយនៅតំបន់ឆ្នេរភាគកណ្ដាលប្រទេសវៀតណាម ត្រូវបានផាកពិន័យជាប្រាក់ជិត ៤ពាន់ដុល្លារអាមេរិក និងបិទទ្វារពីរខែ ដោយសារជួលបុគ្គលិកចិនឲ្យធ្វើការ ដោយគ្មានលិខិតអនុញ្ញាតការងារត្រឹមត្រូវ។
យោងតាមសារព័ត៌មានអនឡាញVN Express ក្រុមហ៊ុន Phong Nguyen Co., Ltd ដែលគ្រប់គ្រងភោជនីយដ្ឋានជាច្រើនកន្លែងនៅក្នុងទីក្រុងរមណីយដ្ឋាន Nha Trang ត្រូវបានអាជ្ញាធរវៀតណាមផាកពិន័យ ហើយថែមទាំងត្រូវបញ្ជាឲ្យផ្អាកដំណើរការរយៈពេល ២ខែ ផងដែរ។
មូលហេតុ គឺក្រុមហ៊ុននេះ ជួលជនជាតិចិន ៥នាក់ ឲ្យធ្វើការនៅក្នុងភោជនីយដ្ឋានរបស់ខ្លួនដែលបម្រើម្ហូបចិន ប៉ុន្តែ ពីរនាក់ក្នុងចំណោមពួកគេទាំង៥នាក់ ត្រូវគេរកឃើញថា មិនមានសៀវភៅការងារទេ។
តើអ្នកបានអានអត្ថបទនេះ ឬនៅ?
មិនតែប៉ុណ្ណោះ ភោជនីយដ្ឋានក៏លើកស្លាកយីហោដោយសរសេរអក្សរចិនធំជាងអក្សរវៀតណាម ដែលផ្ទុយនឹងច្បាប់របស់វៀតណាម។ នៅប្រទេសវៀតណាម ច្បាប់មិនអនុញ្ញាតឲ្យក្រុមហ៊ុន ហាងទំនិញ និងភោជនីយដ្ឋាន សរសេរអក្សរបរទេសធំជាងអក្សរជាតិ នៅលើស្លាកយីហោ ឬស្លាកឈ្មោះហាងឡើយ។
ទីក្រុង Nha Trang នៅក្នុងខេត្ត Khan Hoa ជាកន្លែងពេញនិយមសម្រាប់ទេសចរបរទេស ដែលភាគច្រើន គឺជាទេសចរចិន។ របាយការណ៍ខេត្ត បង្ហាញថា ចាប់តាំងពីដើមឆ្នាំនេះមក ជនបរទេសជាង ៣០០នាក់ ភាគច្រើនចិន ត្រូវបានរកឃើញថា ធ្វើការខុសច្បាប់នៅក្នុងទីក្រុង Nha Trang នេះ។
ក្នុងរយៈពេល ៩ខែឆ្នាំនេះ ក្រុង Nha Trang ទទួលទេសចរបរទេស ២,១៥លាននាក់ ក្នុងនោះ ទេសចរចិនមានជាង ១លាន ២សែននាក់ ដែលកើនឡើង ១៥៧% បើធៀបនឹងរយៈពេលដូចគ្នា កាលពីឆ្នាំទៅមិញ៕
