ក្នុងចំណោមកិច្ចព្រមព្រៀងនោះ ក៏មានកិច្ចព្រមព្រៀងរបស់ក្រុមហ៊ុនអាកាសចរណ៍ Vietjet របស់វៀតណាម ទិញយន្តហោះប្រភេទ Airbus A321neo ៥០គ្រឿង ផងដែរ។ នេះបើយោងតាមការផ្សាយរបស់សារព័ត៌មាន VN Express។
ទន្ទឹមនឹងនេះ ប្រទេសទាំងពីរក៏បានចុះកិច្ចព្រមព្រៀងសហប្រតិបត្តិការផងដែរ លើវិស័យបណ្ដុះបណ្ដាលរដ្ឋាភិបាលអេឡិចត្រូនិក (e-government) អភិវឌ្ឍន៍និងកិច្ចសហប្រតិបត្តិការលើវិស័យសុខាភិបាល ការប្រែប្រួលអាកាសធាតុ បរិស្ថាន និងការការពារលំហអាកាស ការគ្រប់គ្រងទីក្រុង និងវិស័យថាមពល។
តើអ្នកបានអានអត្ថបទនេះ ឬនៅ?
នាយករដ្ឋមន្ត្រីបារាំង លោក Edouard Philippe ថ្លែងនៅទីក្រុងហាណូយថា ដំណើរទស្សនកិច្ចរបស់លោក គឺបញ្ជាក់អំពីភាពជាដៃគូយុទ្ធសាស្ត្ររបស់ប្រទេសបារាំង ជាមួយនឹងវៀតណាម ដែលប្រទេសអាស៊ានមួយនេះបាននិងកំពុងដើរតួនាទីសំខាន់ នៅក្នុងតំបន់អាស៊ី-ប៉ាស៊ីហ្វិក។
ក្នុងដំណើរទស្សនកិច្ច ៣ថ្ងៃនៅប្រទេសវៀតណាម នាយករដ្ឋមន្ត្រីបារាំងក៏បានទៅទស្សនកិច្ចតំបន់ ដៀន បៀន ភូ (Dien Bien Phu) ជាសមរភូមិដែលបារាំងចាញ់សង្គ្រាមវៀតណាម កាលពីឆ្នាំ១៩៥៤ ដើម្បីសម្ដែងការគោរពចំពោះវិញ្ញាណក្ខន្តទាហានដែលបានស្លាប់នៅក្នុងសង្គ្រាមនោះ ផងដែរ។
ទស្សនកិច្ចរបស់នាយករដ្ឋមន្ត្រីបារាំង នៅវៀតណាម ធ្វើឡើងខណៈដែលប្រទេសទាំងពីរប្រារព្ធខួបអនុស្សាវរីយ៍លើកទី៥៤ នៃការបង្កើតទំនាក់ទំនងការទូតរវាងបារាំង និងវៀតណាម៕
