សារព័ត៌មាន VN Express ផ្សាយថា នៅក្នុងកិច្ចពិភាក្សាអំពីការអភិវឌ្ឍសេដ្ឋកិច្ចសង្គមនៅក្នុងសម័យប្រជុំរដ្ឋសភាថ្មីៗនេះ អនុប្រធានសភាមកពីខេត្ត បាក់លាវ (Bac Lieu) ភាគខាងត្បូងវៀតណាម លោក Ta Van Ha ថ្លែងថា ដំណើរការនៃការកាត់បន្ថយចំនួនតំណែងរដ្ឋាភិបាលដែលលើសតម្រូវការ មានភាពយឺតយ៉ាវណាស់។
លោកថា ប្រជាជនអ្នកបង់ពន្ធមិនអាចទ្រាំទ្រនឹងបន្ទុកចំណាយ ៦០% នៃថវិកាជាតិ ទៅលើការចំណាយរបស់រដ្ឋាភិបាលនោះទេ ដែលនៅសល់ថវិកាតិចតួចប៉ុណ្ណោះសម្រាប់ការអភិវឌ្ឍនិងការវិនិយោគ និងថា ចំនួនមន្ត្រីរាជការដែលគ្មានសមត្ថភាព និងមានសីលធម៌ទាប នៅមានចំនួនច្រើននៅឡើយ។
លោកតំណាងរាស្ត្រ Ta Van Ha បានស្នើឲ្យរដ្ឋាភិបាលវៀតណាមធ្វើដូចអ្វីដែលក្រុងហាណូយបានធ្វើកាលពីមួយទសវត្សរ៍មុនដែរ គឺពិចារណាទៅលើការច្របាច់ខេត្តក្រុងមួយចំនួនបញ្ចូលគ្នា។
កាលពីឆ្នាំ២០០៨ ជាង ៩២% នៃសមាជិកសភា បានបោះឆ្នោតគាំទ្រការពង្រីកទីក្រុងហាណូយ ដោយកាត់យកផ្នែកខាងលិចខ្លះនៃខេត្ត Ha Tay កាត់មួយផ្នែកខាងជើងនៃខេត្ត Vinh Phuc និងមួយផ្នែកនិរតីនៃខេត្ត Hoa Binh បញ្ចូលមករដ្ឋធានីហាណូយ។
តើអ្នកបានអានអត្ថបទនេះ ឬនៅ?
ការកាត់ខេត្តក្រុងខ្លះបញ្ចូលមកជាដីរបស់ក្រុងហាណូយ បានធ្វើឲ្យក្រុងនេះរីកមាឌបីដង គឺមានទំហំកើនឡើងដល់ទៅ ៣៣០០គីឡូម៉ែត្រការ៉េ និងបង្កើនចំនួនប្រជាពលរដ្ឋដល់ទៅ ៦លាន ២សែននាក់ គឺកើនឡើង ៨០% ពីចំនួនប្រជាជននៅពេលមិនទាន់ពង្រីកក្រុង។
លោកតំណាងរាស្ត្រ Ta Van Ha ថ្លែងថា ការពង្រីកក្រុងហាណូយ ដោយបង្រួមខេត្តក្រុងខ្លះនេះ ធ្វើឲ្យក្រុងហាណូយសម្រេចបានសមិទ្ធផលអភិវឌ្ឍន៍ធំៗជាច្រើន និងជាដំណោះស្រាយដ៏មានប្រសិទ្ធភាពបំផុតចំពោះការកាត់បន្ថយចំនួនមុខតំណែងរដ្ឋាភិបាលដែលលើសពីតម្រូវការចាំបាច់។
កាលពីខែសីហា ឆ្នាំនេះ នាយករដ្ឋមន្ត្រីវៀតណាម លោក Nguyen Xuan Phuc បានអនុម័តផែនការកាត់បន្ថយចំនួនមន្ត្រីរាជការចំនួន ៥៥១០នាក់ ស្មើនឹង ២% នៃបុគ្គលិកមន្ត្រីរាជការសរុបសព្វថ្ងៃ ២៦៥.១០០នាក់ ឲ្យថយមកនៅត្រឹម ២៥៩.៥៩០នាក់ នៅឆ្នាំក្រោយ។
បើតាមធនាគារពិភពលោក ទំហំបុគ្គលិកនៃវិស័យសាធារណៈរបស់ប្រទេសវៀតណាម គឺមានទំហំធំបំផុតបើធៀបនឹងចំនួនប្រជាជនសរុប នៅក្នុងចំណោមប្រទេសនានានៅតំបន់អាស៊ីអាគ្នេយ៍។ ហើយកាលពីដើមឆ្នាំនេះ សវនកររដ្ឋាភិបាលបាននិយាយថា បុគ្គលិកមន្ត្រីរាជការចំនួន ៥៧.១៧៥នាក់ លើសពីតម្រូវការចាំបាច់៕
