ក្នុងសន្និសីទនោះដែរ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានអះអាងថា អនាគតនៃតំបន់អាស៊ាន នឹងពឹងផ្អែកលើឧត្តមភាពប្រកួតប្រជែង តំបន់ ដែលអាចកើតឡើងបានដោយការតភ្ជាប់យ៉ាងល្អនៅក្នុងតំបន់ ដែលមានសកម្មភាពរួមគ្នា ហើយខ្សែចង្វាកផ្គត់ផ្គង់ក្នុងតំបន់នេះ ក៏ត្រូវតែមានស័ក្ដិសិទ្ធភាព និងរឹងមាំផងដែរ។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ។
ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានបញ្ជាក់បន្ថែមថា អាស៊ានត្រូវទំនាក់ទំនងជាមួយដៃគូអភិវឌ្ឍន៍របស់ខ្លួន ដើម្បីផ្តួចផ្ដើមគំនិតស្តីពីការតភ្ជាប់និងគម្រោងសហប្រតិបត្តិការនានាពេញក្នុងតំបន់។ លើសពីនេះ សម្រាប់អាស៊ាន អភិក្រមនេះគឺការទាញយកឲ្យបានជាអតិបរមានូវការបំពេញគ្នាទៅវិញទៅមករវាងគំនិតផ្ដួចផ្ដើមនានាដែល មានស្រាប់ស្តីពីការតភ្ជាប់ ដើម្បីចំរាញ់យកតម្លៃបន្ថែមដែលចាំបាច់។
អត្ថបទគួរអាន
ជាមួយគ្នានេះ ឯកឧត្ដមឧបនាយករដ្ឋមន្ត្រី ក៏បានគូសបញ្ជាក់អំពីការចូលជាធរមាននៃកិច្ចព្រមព្រៀងស្តីពីភាពជាដៃគូសេដ្ឋកិច្ចគ្រប់ជ្រុងជ្រោយតំបន់ ដែលជាកិច្ចព្រមព្រៀងពាណិជ្ជកម្មដ៏ធំសម្បើម ដែលនឹងដឹកនាំសេដ្ឋកិច្ចតំបន់។ និងនៅមានភាពចាំបាច់ក្នុងការតម្រែតម្រង់ទិសផែនការមេស្តីពីការតភ្ជាប់អាស៊ាន ឆ្នាំ២០២៥ (MPAC 2025) ដើម្បីធានាថា ផែនការមេនេះនឹងដើរតួនាទីជាចំណុចស្នូលក្នុងការតភ្ជាប់ជាយុទ្ធសាស្ត្ររវាងគំនិតផ្តួចផ្តើមផ្សេងៗនៅក្នុងតំបន់ ក្នុងការទ្រទ្រង់អាស៊ានដែលប្រកបដោយភាពធន់រឹងមាំ ចីរភាព និងបរិយាប័ន្ន។
ទន្ទឹមនេះ អគ្គលេខាធិការអាស៊ាន ឯកឧត្តម លឹម ចុកហុយ បានបញ្ជាក់ដែរថា ខណៈពេលដែលអាស៊ានបន្ដរៀបចំផែនការសម្រាប់អនាគត តំបន់នេះ ក៏ត្រូវកសាងនូវភាពតភ្ជាប់គ្នារវាងអនាគត ជាមួយនឹងសកម្មភាពដែលកំពុងធ្វើក្នុងពេលបច្ចុប្បន្នដែរ។ ឯកឧត្តម បន្ថែមថា អាស៊ានត្រូវធ្វើការជាមួយដៃគូទាំងអស់ ទោះសម្រាប់រយៈពេលខ្លី មធ្យម និងវែង។
សូមបញ្ជាក់ថា សន្និសីទពីការតភ្ជាប់អាស៊ានលើកទី១៣នេះ ក៏បានពិភាក្សាអំពីវិធីសាស្ត្រពង្រឹងភាពជាដៃគូស្តីពីការតភ្ជាប់អាស៊ានជាមួយភាគីពាក់ព័ន្ធផ្សេងៗ ព្រមទាំងការលើកកម្ពស់ផ្នែកហេដ្ឋារចនាសម្ព័ន្ធប្រកបដោយចីរភាព ការអភិវឌ្ឍទីក្រុងឆ្លាតវៃ និងភាពច្នៃប្រឌិតក្នុងវិស័យឌីជីថល ដែលអាចបង្កើតនិងពង្រឹងបណ្តាញការងារតំបន់ ដើម្បីរួមចំណែកដល់ការកសាងសហគមន៍អាស៊ានមួយ ប្រកបដោយបរិយាប័ន្ន ភាពធន់រឹងមាំ និងការតភ្ជាប់គ្នាយ៉ាងល្អផងដែរ៕
