ហេតុអ្វីអ្នកត្រូវបង្កើតអាជីវកម្មទៅជា Franchise?
នៅពេលដែលនិយាយពី Franchise នៅកម្ពុជា មានមនុស្សតិចណាស់ដែលលើកឡើងពីការបង្កើត Franchise ប៉ុន្ដែ ម្នាក់ៗបែរជាជាប់មាត់ ជាប់ចិត្តនឹងការទិញយីហោពីគេ ឬទិញយីហោពីក្រៅប្រទេសមកលក់នៅក្នុងស្រុកទៅវិញ។
ទាំងនេះហើយ គឺជាកម្សោយមួយដែលសហគ្រិនក្នុងស្រុកកម្ពុជា គួរតែគិតគូរអភិវឌ្ឍខ្លួនឡើងវិញ ដើម្បីឈានទៅដល់ការនាំយីហោរបស់ខ្មែរ ចេញទៅលក់នៅក្រៅប្រទេសបានច្រើន ដូចដែលយីហោបរទេសកំពុងមកលក់ភ្លូកទឹកភ្លូកដីនៅស្រុកខែ្មរដែរ។
មានហេតុផលជាច្រើនដែលអាជីវកម្មលោកអ្នកគួរតែគិតគូររៀបចំដើម្បីក្លាយខ្លួនជាអាជីវកម្ម Franchise មួយដែលមានសមត្ថភាព រួមមាន៖
តើអ្នកបានអានអត្ថបទនេះឬនៅ?
១- អ្នកអាចប្រើប្រាស់នូវលុយអ្នកដទៃ ឬ Other People's Money (OPM)
ដើម្បីពង្រីកបន្ថែមសាខា ក៏ដូចជាវិសាលភាពនៃយីហោរបស់ខ្លួន លោកអ្នកមិនបាច់ប្រើលុយខ្លួនឯងសូម្បីតែមួយកាក់ ឬមួយសេនឡើយ។ ព្រោះនៅពេលដែលអាជីវកម្មអ្នកមានសមត្ថភាពគ្រប់គ្រាន់ មានគេទិញសិទ្ធិបន្ត នោះរាល់ការចំណាយគ្រប់សព្វសុទ្ធតែជាបន្ទុករបស់អ្នកទិញ (Franchisee)។ មិនតែប៉ុណ្ណោះ លោកអ្នកក៏ទទួលបាននូវផលកម្រៃមួយចំនួនធំ ពីការលក់សិទ្ធិធុរកិច្ចបន្តនេះផងដែរ ព្រមទាំងកម្រៃប្រចាំខែមួយចំនួនទៀតផង។
២- ប្រើពេលវេលារបស់អ្នកដទៃ ឬ Other People's Time (OPT)
ប្រសិនបើអ្នកមានតែហាង១ ឬ២ គ្រប់គ្រង់ដោយខ្លួនឯង លោកអ្នកប្រហែលនៅមានពេលវេលាគ្រប់គ្រាន់ដើម្បីមើលការខុសត្រូវ ចុះបើលោកអ្នកចង់ពង្រីកសាខាឲ្យបានរាប់រយ រាប់ពាន់កន្លែង នោះប្រហែលជាលោកអ្នកមិនអាចទៅរួចនោះទេ។ ប៉ុន្ដែ បើលោកអ្នកបង្កើតអាជីវកម្មទៅជាប្រព័ន្ធគ្រប់គ្រងបែប Franchise នោះលោកអ្នកនឹងអាចឲ្យអ្នកដទៃ ដែលមានទឹកចិត្តធ្វើការអស់ពីសមត្ថភាព មិនកិបកេងពេលវេលា មកជួយគ្រប់គ្រងហាងរបស់លោកអ្នកយ៉ាងមានប្រសិទ្ធភាព។
តើអ្នកបានអានអត្ថបទនេះ ឬនៅ?
៣- ប្រើប្រាស់បទពិសោធន៍ ទេពកោសល្យ និងជំនាញរបស់អ្នកដទៃ (OPE/T/S)
លោកអ្នកប្រហែលឆ្ងល់ថា ហេតុអ្វីបានជាហាងយីហោ Franchise ខ្លះនៅស្រុកដើមរបស់គេលក់មិនសូវជាដាច់ណាស់ណាទេ ប៉ុន្ដែ ពេលយកមកបើកនៅខ្មែរដាច់ភ្លូកទឹកភ្លូកដី។ នេះគឺដោយសារម្ចាស់ដើមអាជីវកម្ម (Franchisor) នោះ រើសបានដៃគូដែលជាអ្នកទិញសិទ្ធិយកទៅចែកចាយបន្ដ (Master Franchisee) ដែលពោរពេញទៅដោយសមត្ថភាព ទេពកោសល្យ និងជំនាញ ក្នុងការគ្រប់គ្រង ក៏ដូចជាប្រតិបត្តិអាជីវកម្មនេះ។ ដូច្នេះ Franchisor មិនចាំបាច់ធ្វើអ្វីក៏លុយហូរចូលដែរ។
៤- យកឱកាសមកបំបែកឱកាសបន្ត
លោកអ្នកមួយចំនួនប្រហែលជាបានដឹងខ្លះៗហើយថា អាជីវកម្ម Franchise គឺតែងតែតម្រូវឲ្យអ្នកទិញសិទ្ធិបន្តទាំងអស់ ត្រូវទិញយកវត្ថុធាតុដើមសម្រាប់ការផលិតនិងសម្ភារៈសំខាន់ៗសម្រាប់ការប្រតិបត្តិអាជីវកម្ម ពីម្ចាស់ដើមអាជីវកម្ម (Franchisor)។
ដូច្នេះ នៅពេលអ្នកមានសាខារាប់សិប រាប់រយ ឬរាប់ពាន់ អ្នកនឹងអាចបង្កើតអាជីវកម្មថ្មីមួយទៀត ក្រៅពីអាជីវកម្ម Franchise នេះ ដើម្បីជាមធ្យោបាយផ្គត់ផ្គង់វត្ថុធាតុដើមទាំងនោះ សម្រាប់ដៃគូដែលជាអ្នកទិញសិទ្ធិបន្តទាំងឡាយ។ ឧទាហរណ៍ ប្រសិនបើអ្នកមានហាងលក់មាន់បំពង២ពាន់សាខា នោះលោកអ្នកនឹងអាចបើកកសិដ្ឋានចិញ្ចឹមមាន់សាច់មួយកន្លែងដើម្បីផ្គត់ផ្គង់ទៅឲ្យដៃគូរបស់អ្នកបានយ៉ាងងាយ។
តើអ្នកបានអានអត្ថបទនេះឬនៅ?
អាជីវកម្មណាខ្លះដែលអាចធ្វើទៅជា Franchise?
មនុស្សភាគច្រើនតែងយល់ច្រឡំថា អាជីវកម្ម Franchise ទាល់តែមានហាងធំៗ ទំនើបបែបស្ដង់ដារ ទើបអាចអភិវឌ្ឍទៅជា Franchise បាន។ យ៉ាងណាក៏ដោយ នៅបណ្ដាប្រទេសមួយចំនួន អាជីវកម្ម Franchise ខ្នាតតូចហាក់មានចំនួនច្រើនគួរឲ្យកត់សម្គាល់ តួយ៉ាងនៅប្រទេសថៃអាហារលក់តាមរទេះ ក៏អាចអភិវឌ្ឍទៅជា Franchise បានដែរ។
លោកអ្នកអាចសម្លឹងមើលទៅលើប្រភេទអាជីវកម្មណា ដែលមានសក្ដានុពលយូរអង្វែង ឬជាអាជីវកម្មដែលមានតម្រូវការមិនចេះដាច់ តួយ៉ាង វិស័យម្ហូបអាហារនិងភេសជ្ជៈ វិស័យសេវាកម្ម ការលក់រាយ ការអប់រំ និងផ្នែកសុខភាព និងសម្រស់ ជាដើម។ល។
យ៉ាងណាក៏ដោយ អាជីវកម្មដែលទាក់ទងនឹងការប្រើប្រាស់បច្ចេកទេស និងការប្រើប្រាស់នូវភាពច្នៃប្រឌិតខ្ពស់ អាចនឹងមានការលំបាកសម្រាប់ការធ្វើទៅជា Franchise ព្រោះអាជីវកម្មទាំងនោះ មិនងាយនឹងអាចបើកសាខាបានលឿន និងច្រើននោះទេ ដោយសារតែវាពិបាកក្នុងការគ្រប់គ្រងគុណភាព និងធនធានមនុស្ស។ ឧទាហរណ៍៖ មន្ទីរពេទ្យ ក្រុមហ៊ុនផ្ដល់សេវាជួសជុល (អគ្គិសនី យានយន្ដ គ្រឿងអេឡិចត្រូនិក) និងក្រុមហ៊ុនផ្ដល់សេវាម៉ាឃីតធីងជាដើម។ល។
សូមរង់ចាំអាន ភាគទី៣ បន្តទៀត ដែលនឹងផ្ដោតលើគន្លឹះមួយចំនួនក្នុងការបង្កើត Franchise!
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
