ក្នុងន័យនេះ អង្គការសុខភាពពិភពលោក ចង់បញ្ជាក់ថា កុមារ ក៏ដូចជាក្មេងវ័យជំទង់ខ្លះគឺមិនសូវប្រឈម គ្រោះថ្នាក់ពីការឆ្លងកូវីដ១៩នោះទេ ដូច្នេះ ការចាក់ដូសទី៣ ឬដូសជំរុញ ក៏មិនមានភាពចាំបាច់នោះដែរ។ បើទោះជាបែបនេះក្ដីគេមើឃើញថា មានប្រទេសជាច្រើន រួមទាំងសហរដ្ឋអាមេរិកផងដែរ គឺបាននិងកំពុង សម្រុកចាក់វ៉ាក់សាំងដូសជំរុញ ឬដូសទី៣នេះ សម្រាប់ក្មេងៗចាប់ពីអាយុ១២ ដល់១៥ឆ្នាំនៅក្នុងប្រទេសរបស់ខ្លួន ស្របពេលដែលប្រទេសខ្លះពិសេស ប្រទេសក្រីក្រ កំពុងនៅខ្វះខាត វ៉ាក់សាំង សម្រាប់ ចាក់ជូន ប្រជាជន របស់ខ្លួននៅឡើយ។ នេះបើយោងតាមការចុះផ្សាយដោយសារព័ត៌មានអន្តរជាតិធំៗជាច្រើន។
ថ្លែងនៅក្នុងសន្និសីទសារព័ត៌មានមួយ ប្រធានអ្នកវិទ្យាសាស្ត្ររបស់អង្គការសុខភាពពិភពលោកបាននិយាយថា ខណៈពេលដែលមនុស្សជាច្រើនហាក់ដូចជាមានការថយចុះនៃភាពស៊ាំនៃវ៉ាក់សាំងប្រឆាំងនឹងមេរោគអូមីក្រុងដែលកំពុងរីករាលដាលយ៉ាងឆាប់រហ័សនោះ អង្គការសុខភាពពិភពលោកក៏មានការសិក្សាស្រាវជ្រាវបន្ថែមទៀតដើម្បីបញ្ជាក់ ថាតើអ្នកណាពិតជាត្រូវការកម្រិតវ៉ាក់សាំងដូសជំរុញពិតប្រាកដមែន។អត្ថបទគួរអាន
បើតាមប្រធានអ្នកវិទ្យាសាស្ត្ររបស់អង្គការសុខភាពពិភពលោករូបនេះលោកស្រី ស៊ូម្យ៉ា ស្វានីណាថាន់ បានឱ្យដឹងថា មិនទាន់មានភស្តុតាងណាមួយដែលបញ្ជាក់ថាកុមារ ឬក្មេងជំទង់ដែលមានសុខភាពល្អមិនចាំបាច់ត្រូវការចាក់វ៉ាក់សាំងនោះទេ។
ក្រុមអ្នកជំនាញកំពូលរបស់អង្គការសុខភាពពិភពលោកនឹងជួបប្រជុំគ្នានៅចុងសប្តាហ៍នេះ ដើម្បីពិនិត្យទៅលើថាតើក្រុមមនុស្សណាខ្លះដែលត្រូវតែផ្ដល់ជូនការចាក់វ៉ាក់សាំងដូសជំរុញ។ គោលបំណងកិច្ចប្រជុំនេះ គឺដើម្បីការពារអ្នកដែលងាយរងគ្រោះបំផុត និងការពារអ្នកដែលមានហានិភ័យខ្ពស់បំផុតពីជំងឺធ្ងន់ធ្ងរ និងការស្លាប់។ បើតាមអ្នកជំនាញអង្គការសុខភាពពិភពលោក អ្នកទាំងដែលត្រូវចាក់ដូសជំរុញគឺភាគច្រើន គឺជាមនុស្សវ័យចំណាស់ អ្នកដែលមានភាពស៊ាំចុះខ្សោយ និងបុគ្គលិកថែទាំសុខភាពតែប៉ុណ្ណោះ។
យ៉ាងណាក៏ដោយចុះ មានប្រទេសមួយចំនួន បានចាប់ផ្ដើមចាក់វ៉ាក់សាំងដូសជំរុញជូនកុមារ និងមនុស្សវ័យជំទង់។ ក្នុងនោះរួមមានប្រទេសអ៊ីស្រាអែលបានចាប់ផ្តើមផ្តល់ការចាក់ដូសជំរុញដល់កុមារដែលមានអាយុក្រោម ១២ ឆ្នាំ ហើយរដ្ឋបាលចំណីអាហារ និងឱសថរបស់សហរដ្ឋអាមេរិកកាលពីដើមខែមករានេះបានអនុញ្ញាតឱ្យប្រើប្រាស់វ៉ាក់សាំង Pfizer ជាដូសទី៣ សម្រាប់កុមារដែលមានអាយុពី ១២ ទៅ ១៥ ឆ្នាំផងដែរ។ មិនត្រឹមតែបានចាក់ដូសទី៣ប៉ុណ្ណោះទេ បច្ចុប្បន្នប្រទេសខ្លះក៏កំពុងបន្ដមានយុទ្ធនាការចាក់ដូសទី៤ផងដែរ រួមទាំងប្រទេសអ៊ីស្រាអែល និងកម្ពុជាជាដើម៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
