ឧកញ៉ា សៀ ឫទ្ធី៖ កត្តា៣យ៉ាង​ធ្វើឲ្យវិនិយោគិនបរទេសចូលចិត្តមកវិនិយោគនៅកម្ពុជា

លោកឧកញ៉ាពន្យល់ថា៖ «កត្តាទី១ គឺកត្តាសន្តិភាពដែលជាគន្លឹះមួយធ្វើប្រទេសអភិ​វឌ្ឍន៍ទៅបាន បើគ្មានសន្តិភាពទេ ប្រទេសមិនអាចអភិវឌ្ឍន៍បានទេ។ ទី២ គឺកត្តាស្ថិរនយោបាយនៅកម្ពុជាមានលក្ខណៈល្អបំផុតបើធៀបនឹងប្រទេសក្នុងតំបន់ និងកត្តាទី៣ គឺកំណើនសេដ្ឋកិច្ច។ …យើងហ៊ាននិយាយដោយមោទនភាពថា ក្នុងអំឡុងពេល​២០ឆ្នាំចុងក្រោយនេះ កម្ពុជាមានកំណើនសេដ្ឋកិច្ចGDP៧ភាគរយឡើង។ បើនិយាយពីកំណើន ប្រទេសកម្ពុជាយើងស្ថិតនៅTop10នៅក្នុងពិភពលោកដែលមានកំណើនសេដ្ឋកិច្ចជាតិល្អ»។   

បើតាមលោកឧកញ៉ា សៀ ឫទ្ធី​ ក្រៅពីកត្តាទាំង៣ខាងលើ គោលនយោបាយគាំទ្រអ្នកវិនិយោគ ក៏ជាកត្តាដែលធ្វើឲ្យវិនិយោគិនទាំងក្នុងស្រុក និងបរទេស ជាប់ចិត្តក្នុងការបណ្តាក់ទុនវិនិយោគនៅកម្ពុជា។

លោកឧកញ៉ាបញ្ជាក់យ៉ាងដូច្នេះថា៖ «គោលនយោបាយរបស់កម្ពុជា ត្រូវបានទទួលស្គាល់ដោយអ្នកវិនិយោគក្នុងតំបន់ និងក្នុងពិភពលោក។ អ្នកវិនិយោគដែលចូលមក​វិនិយោគនៅស្រុកខ្មែរ រាជរដ្ឋាភិបាល ចាត់ទុកអ្នកវិនិយោគនោះមានតម្លៃស្មើភាពគ្នាទាំងអស់ បានន័យថា មិនបែងចែកវិនិយោគនេះ ឬអ្នកវិនិយោគនោះ…ប្រទេសខ្លះនៅ​លើពិភពលោកគេបែងចែកអ្នកវិនិយោគ តែសម្រាប់រដ្ឋាភិបាលកម្ពុជា បានទទួលស្វាគមន៍អ្នកវិនិយោគស្មើគ្នា។ មួយវិញទៀត ប្រទេសកម្ពុជា បានផ្តល់លក្ខណៈងាយស្រួល​ដល់អ្នកវិនិយោគ។ ខ្ញុំហ៊ាននិយាយថា រដ្ឋាភិបាលកម្ពុជា ជារដ្ឋាភិបាលគាំទ្រអ្នកជំនួញ…»។

លោកឧកញ៉ាបន្តថា៖ «ប្រទេសកម្ពុជា មិនបែងចែករូបិយប័ណ្ណ គឺយើងនៅប្រើរូបិយប័ណ្ណអាមេរិក ធ្វើឲ្យអ្នកវិនិយោគងាយស្រួលក្នុងមកវិនិយោគនៅស្រុកខ្មែរ ដោយគេមិនចាំបាច់គិតពីដូរពីរូបិយប័ណ្ណគេទៅ រូបិយប័ណ្ណអាមេរិកមករូបិយប័ណ្ណកម្ពុជា ដែលនេះធ្វើឲ្យគេមានការលំបាកចំពោះការឡើងចុះនៃអត្រាការប្រាក់។ ចំណុចមួយទៀត គេងាយស្រួលក្នុងការផ្ញើលុយចូល និងផ្ញើលុយចេញ ឲ្យតែធ្វើអ្វីដែលមានលក្ខណៈជាផ្លូវច្បាប់។ ដូច្នេះ លក្ខណៈងាយស្រួលទាំងអស់នេះ បានធ្វើឲ្យអ្នកវិនិយោគទាំងក្នុងស្រុក និងក្រៅស្រុកចាប់អារម្មណ៍វិនិយោគនៅកម្ពុជា»៕