តើកម្ពុជាអាចជំរុញការដាំដុះ និងនាំចេញផ្លែប៊័របានដែរទេ?

ដំណាំប៊័រ ឬភាសាអង់គ្លេសហៅថា អាវូកាដូ ដែលត្រូវបានគេស្គាល់ថា មានការដាំដុះច្រើននៅខេត្តភាគឦសាននៃប្រទេសកម្ពុជា ហើយបច្ចុប្បន្នក៏មានសន្ទុះដាំដុះនៅខេត្តផ្សេងទៀតដែរ ដូចជា ខេត្តកំពង់ឆ្នាំង ពោធិ៍សាត់ជាដើម ដើម្បីបំពេញតម្រូវការក្នុងស្រុក ខណៈដែលពលរដ្ឋខ្មែរកាន់តែច្រើនចូលចិត្តទទួលទាន។ 

លោកបណ្ឌិត យ៉ង សាំងកុមារ អ្នកជំនាញផ្នែកកសិម្ម និងជាអ្នកបង្កើតសហគមន៍កសិកម្មសម្បូរសប្បាយនៅតាមបណ្ដាខេត្តមួយចំនួននៅកម្ពុជា បានចាប់ផ្តើមគម្រោងវិនិយោគដាំដើមប៊័រ ឬ អាវ៉ូកាដូ តាមរយ:សហគមន៍សម្បូរអាវ៉ូកាដូ ដោយមានការចូលរួមពីអ្នកចូលចិត្តបរិភោគផ្លែប៊័រ និងអ្នកដែលចង់បានចំណូលពីផ្លែប៊័រ ដោយឆ្នាំនេះលោកកំពុងដាំ ១០០០ ដើម នៅក្នុងសហគមន៍សម្បូរសប្បាយអូរសោម។

លោកបណ្ឌិត យ៉ង សាំងកុមារ បន្ថែមទៀតថា លោកនិងក្រុមការងារ កំពុងសិក្សាពូជប៊័រ ដែលមាននៅកម្ពុជានិងប្រទេសជិតខាង ដោយនឹងរៀបចំផលិតពូជទៅតាមតំរូវការទីផ្សារ និងរដូវ ដោយសារកន្លងមកលោកសង្កេតឃើញថា អ្នកនិយមបរិភោគផ្លែប៊័រនៅកម្ពុជា កំពុងបារម្ភ និងបញ្ហាប្រឈម៣យ៉ាង រួមមាន ទី១ គឺការជ្រើសរើសពូជ​ឲ្យត្រូវ​នឹង​ចំណង់ចំណូលចិត្ត​អ្នកប្រើប្រាស់ ដោយអ្នកប្រើប្រាស់ភាគច្រើន​និយមចូលចិត្ត​ទទួលទាន​ពូជប៊័រ​ដែលមានសាច់ល្មួត។ ទី២ គឺការនាំចូល ដែលកន្លងមក​មានផ្លែប៊័រ​​ជាច្រើន​ត្រូវបាននាំចូលពីប្រទេសជិតខាងដូចជាវៀតណាមជាដើម។ និងទី៣ គឺកត្តាតម្លៃ ដោយសារតែ​តម្លៃប៊័រក្នុងស្រុក នៅមានតម្លៃខ្ពស់នៅឡើយ​បើធៀបនឹងប៊័រនាំចូល។ ដូច្នេះ អ្វីដែល​កម្ពុជា​ត្រូវធ្វើ គឺត្រូវ​ជ្រើសពូជប៊័រ​ដាំឲ្យត្រូវនឹងតម្រូវការការទីផ្សារ ជាមួយនឹងការចំណាយថ្លៃដើមទាប ទើបអាចលក់ចេញ​ទៅវិញ​ក្នុងតម្លៃប្រកួតប្រជែង​ជាមួយ​ប៊័រ​នាំចូលបាន។

ជុំវិញទៅនឹង គម្រោងការដាំដុះដំណាំប៊័រទ្រង់ទ្រាយធំនេះដែរ ឯកឧត្តម វេង សាខុន រដ្ឋមន្រ្តីក្រសួងកសិកម្មកម្ពុជា បានបញ្ជាក់ថា ផ្លែប៊័រនេះ ក៏អាចចាត់ចូលជាកសិផល​សក្ដានុពលមួយ​របស់​កម្ពុជាដែរ​ ប៉ុន្ដែមកទល់ពេលនេះ ក្រសួងមិនទាន់មានគម្រោងលើមុខដំណាំប៊័រនេះនៅឡើយទេ ដោយសារទីផ្សារខាងក្រៅមិនទាន់មានតម្រូវការ ហើយការដាំដុះនៅក្នុងស្រុកនៅមានតិចតួចនៅឡើយ។

បើតាមលោកបណ្ឌិត យ៉ង សាំងកុមារ ដើមប៊័រ ឬអាវូកាដូ មានប្រភពដើមមកពីប្រទេសម៉ិចស៊ីកូ ដោយសារដំណាំនេះ ដុះលូតលាស់បានផលល្អនៅតំបន់ ដែលមានអាកាសធាតុចន្លោះពី១៥ ទៅ ៣០ អង្សារសេ ឬល្អបំផុត ២០ទៅ ២៥ អង្សារសេ។ តំបន់ខ្ពង់រាប និង ភ្នំជាពិសេសមណ្ឌលគីរី អូរសោម វាលវែង រតនគីរី មានស្ថានភាពសមស្របល្អសម្រាប់ដំណាំនេះ។ ជំនាញកសិកម្មរូបនេះ រំពឹងថា ក្នុងរយ:ពេល ៥ឆ្នាំខាងមុខ ការដាំអាវ៉ូកាដូនឹងនាំចំណូលរាប់រយលានដុល្លារសម្រាប់កម្ពុជា បើសិនជាមានការគិតគូររៀបចំផែនការដាំដុះសម្រាប់ការនាំចេញ៕