ជុំវិញទៅនឹងស្ថានភាពសេដ្ឋកិច្ច និង ការវិនិយោគនៅកម្ពុជាក្នុងឆ្នាំនេះដែរ ត្រូវបាន អ្នកឧកញ៉ា សៀ ឬទ្ធី ប្រធានក្រុមប្រឹក្សាភិបាល នៃក្រុមហ៊ុន វើលដ៍ប្រ៊ីដគ្រុប ដែលជាអ្នកជំនួញដឹកជញ្ជូននិង ឡូជីស្ទីក និងជាអ្នកវិនិយោគអចលនទ្រព្យដ៏ល្បីល្បាញរបស់កម្ពុជាបានអះអាងថា លោកនៅនូវតែជឿជាក់និងមានសុទិដ្ឋិនិយមខ្ពស់ចំពោះកំណើនសេដ្ឋកិច្ចកម្ពុជានៅឆ្នាំ២០២១ ដោយរំពឹងថានឹងស្ទុះងើបឡើងវិញយ៉ាងឆាប់រហ័សនៅឆ្នាំនេះ ប្រសិនបើរាជរដ្ឋាភិបាលអាចគ្រប់គ្រងព្រឹត្តិការណ៍សហគមន៍២០កុម្ភៈ និង ចាក់វ៉ាក់សាំងជូនពលរដ្ឋឲ្យបាន១០លានដូសក្នុងពេលឆាប់ៗខាងមុខ។
ដោយឡែក អ្នកឧកញ៉ា លី ហួរ ប្រធានក្រុមប្រឹក្សាភិបាលក្រុមហ៊ុនលីហួរគ្រុប ដែលជាអ្នកជំនួញរកស៊ីពហុវិស័យដ៏ល្បីល្បាញនៅកម្ពុជាផងដែរនោះក៏បានលើកឡើងប្រាប់សារព័ត៌មានឌីជីថល ខេមបូណូមីស ដែរថា បើសិនជាការចាក់វ៉ាក់សាំងកូវីដ-១៩ សម្រាប់ប្រជាពលរដ្ឋកម្ពុជាអាចធ្វើបានលឿន នោះសេដ្ឋកិច្ចកម្ពុជាអាចនឹងមានការស្ទុះងើបឡើងលឿនដែរ ដោយសារតែកម្ពុជាមានសក្ដានុពលខ្ពស់សម្រាប់ការវិនិយោគ និងការធ្វើពាណិជ្ជកម្ម។ ជាក់ស្ដែងថ្មីៗនេះ កម្ពុជាបានចុះហត្ថលេខាលើកិច្ចព្រមព្រៀងពាណិជ្ជកម្មសេរី ជាមួយចិន និងទើបតែបញ្ចប់កិច្ចចរចាពាណិជ្ជកម្មសេរីជាមួយកូរ៉េខាងត្បូង និងកំពុងបន្ដសិក្សានូវលទ្ធភាពធ្វើកិច្ចព្រមព្រៀងពាណិជ្ជកម្មនេះជាមួយនឹងប្រទេសជាច្រើនផ្សេងទៀត។ ជាមួយគ្នានោះ កម្ពុជាក៏មានចុះកិច្ចព្រមព្រៀងពាណិជ្ជកម្មថ្នាក់តំបន់ដ៏ធំ គឺ RCEP ដោយកិច្ចព្រមព្រៀងទាំងអស់នេះ គឺជាកត្តាសំខាន់ណាស់ ក្នុងការទាក់ទាញការវិនិយោគ ពាណិជ្ជកម្មកាន់កាន់កម្ពុជាកាន់តែច្រើនឡើងថែមទៀត។
អត្ថបទទាក់ទង
ជាមួយគ្នានេះ ឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ ធ្លាប់បានអះអាងថា មានតែវ៉ាក់សាំងកូវីដ-១៩ ប៉ុណ្ណោះ ដែលអាចជួយស្តារសេដ្ឋកិច្ចរបស់កម្ពុជាឲ្យមានភាពរីកចម្រើន និងល្អប្រសើរឡើងវិញក្នុងរយៈពេលដ៏ខ្លីខាងមុខ។ តាមគម្រោងរបស់រាជរដ្ឋាភិបាល នៅឆ្នាំ២០២១ កម្ពុជានឹងចាក់វ៉ាក់សាំងជូនពលរដ្ឋយ៉ាងតិច១០លានដូស ។
ឯកឧត្តម វង្សី វិស្សុត បានអះអាងទៀតថា ទោះបីកម្ពុជាជាប្រទេសក្រីក្រ តែមានលទ្ធភាពគ្រប់គ្រាន់ក្នុងការទិញវ៉ាក់សាំងកូវីដ-១៩ ដើម្បីចាក់ជូនប្រជាពលរដ្ឋរបស់ខ្លួន។ ប៉ុន្តែអ្វី ដែលជាបញ្ហាចោទសម្រាប់កម្ពុជា ក៏ដូចប្រទេសលើពិភពលោកនោះ គឺប្រទេសជាអ្នកផលិតអត់មានវ៉ាក់សាំងលក់ទៅវិញទេ។
គិតមកទល់ពេលនេះ កម្ពុជាមានវ៉ាក់សាំងកូវីដ-១៩ ទាំងការទិញ និងទទួលបានជំនួយសរុបមានជាង៣លានដូសហើយ ខណៈគិតត្រឹមថ្ងៃទី៤ មេសា មានអ្នកចាក់វ៉ាក់សាំងសរុបជាង ៥៧ម៉ឺននាក់។
សូមរំឭកដែរថា បើតាមរបាយការណ៍ពីធនាគារពិភពលោកថ្មីៗនេះបានព្យាករថា សេដ្ឋកិច្ចកម្ពុជានឹងមានកំណើនប្រមាណ ៤%នៅឆ្នាំ២០២១ នេះ បន្ទាប់ពីបានធ្លាក់ចុះជាង-៣% កាលពីឆ្នាំ២០២០។ ទោះយ៉ាងណា អ្នកជំនាញសេដ្ឋកិច្ចមួយចំនួនបានកត់សម្គាល់ឃើញថា កំណើន៤% នៅឆ្នាំនេះ ទំនងជាមិនអាចសម្រេចបានតាមការព្យាករនោះទេ ពោលគឺអាចមានទាបជាងអ្វីដែលបានព្យាករ ដ្បិតថាសេដ្ឋកិច្ចកម្ពុជាបាននិងកំពុងរងផលប៉ះពាល់ដោយសារតែព្រឹត្តិការណ៍សហគមន៍២០កុម្ភៈ ដែលបានអូសបន្លាយជាង១ខែមកហើយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
