យោងតាមកាសែត South China Morning Post ដែលចុះផ្សាយកាលពីថ្ងៃទី២៤ ខែមេសា ឆ្នាំ២០២០ ក្នុងពេលតែ ២សប្ដាហ៍ ឥស្សរជនដ៏មានឥទ្ធិពលមកពីប្រទេសមហាអំណាចសេដ្ឋកិច្ចធំបំផុតចំនួន ៣ ក្នុងចំណោមមហាអំណាចសេដ្ឋកិច្ចធំបំផុតទាំង ៤ របស់ពិភពលោក បានប្រកាសជាសាធារណៈ ឬបានពិភាក្សាអំពីផែនការ ដើម្បីអូសទាញប្រទេសរបស់ខ្លួន ឲ្យចាកចេញពីប្រទេសចិន បន្ទាប់ពីជួបប្រទះភាពរាំងស្ទះការផ្គត់ផ្គង់ បណ្ដាលមកពីការបិទដំណើរការសេដ្ឋកិច្ចចិន ដោយសារវីរុសកូវីដ១៩។
នៅដើមសប្ដាហ៍នេះ ស្នងការពាណិជ្ជកម្មសហភាពអឺរ៉ុប លោក Phil Hogan បាននិយាយថា សហភាពអឺរ៉ុបនឹងរិះរកមធ្យោបាយ"កាត់បន្ថយការពឹងផ្អែកពាណិជ្ជកម្ម"លើប្រទេសចិន បន្ទាប់ពីការផ្ទុះឡើងនូវជំងឺរាតត្បាតកូវីដ១៩។
សប្ដាហ៍មុន ប្រទេសជប៉ុនបានប្រកាសដាក់ចេញនូវមូលនិធិ ២,២ពាន់លានដុល្លារអាមេរិក ដើម្បីទាក់ទាញរោងចក្រផលិតធំៗរបស់ជប៉ុននៅក្នុងប្រទេសចិន ឲ្យវិលត្រឡប់ទៅជប៉ុនវិញ ឬទៅតំបន់អាស៊ីអាគ្នេយ៍។
អត្ថបទទាក់ទង
ការប្រកាសរបស់ជប៉ុននេះ ធ្វើឡើងបន្ទាប់ពីនាយកក្រុមប្រឹក្សាសេដ្ឋកិច្ចជាតិរបស់សហរដ្ឋអាមេរិក លោក Larry Kudlow បានលើកឡើងថា រដ្ឋាភិបាលក្រុងវ៉ាស៊ិនតោនគួរតែចេញសោហ៊ុយរើចេញឲ្យដល់ក្រុមហ៊ុនអាមេរិកាំង ដើម្បីនាំយករោងចក្រផលិតចេញពីប្រទេសចិន និងវិលត្រឡប់ទៅអាមេរិកវិញ។
ប៉ុន្តែ ទោះជាយ៉ាងនេះក្ដី មកទល់នឹងពេលនេះ សហរដ្ឋអាមេរិកពុំទាន់មានកម្មវិធីមាតុភូមិនិវត្តន៍ក្រុមហ៊ុនផ្លូវការ នៅឡើយទេ។
ក្រុមហ៊ុនមកពីអាមេរិក ជប៉ុន និងអឺរ៉ុប បាននិងកំពុងរើប្រតិបត្តិការផលិតរបស់ខ្លួន ចេញពីប្រទេសចិន មួយរយៈមកហើយ ដោយសារតែការកើនឡើងនូវចំណាយថ្លៃដើម និងផលប៉ះពាល់ពីសង្គ្រាមពាណិជ្ជកម្មអាមេរិក-ចិន ប៉ុន្តែ បច្ចុប្បន្ន សម្ពាធកាន់តែខ្លាំងក្លាថែមទៀត ដែលនឹងពន្លឿននិន្នាការនេះ ដោយសារតែការផ្ទុះឡើងនូវជំងឺរាតត្បាតកូវីដ១៩ បានបង្ហាញឲ្យឃើញថា ពិភពលោកទាំងមូលនេះពឹងផ្អែកខ្លាំងជ្រុលលើទំនិញផលិតនៅក្នុងប្រទេសចិន ជាពិសេស ផលិតផលវេជ្ជសាស្ត្រចាំបាច់ៗ។
អត្ថបទកាសែតដដែល បានសរសេរផងដែរថា សម្រាប់រដ្ឋាភិបាលនានាដែលគិតច្បាស់ថាពិតជាចង់រើក្រុមហ៊ុនចេញពីប្រទេសចិន គេអាចមើលគំរូរបស់តៃវ៉ាន់។ ប៉ុន្មានឆ្នាំចុងក្រោយនេះ តៃវ៉ាន់បានធ្វើកិច្ចការនេះដោយជោគជ័យ។
គិតត្រឹមថ្ងៃទី៦ ខែមេសា ឆ្នាំ២០២០ តៃវ៉ាន់បានអនុម័តយល់ព្រមដល់ក្រុមហ៊ុនតៃវ៉ាន់ចំនួន ១៨០ ដោយវិនិយោគទឹកប្រាក់ ២៥ពាន់លានដុល្លារអាមេរិក ទៅលើការនាំយករោងចក្រផលិតពីប្រទេសចិន ត្រឡប់មកកោះតៃវ៉ាន់វិញ ដោយចាប់ផ្ដើមតាំងពីដើមឆ្នាំទៅមិញ។
ក្រុមហ៊ុនតៃវ៉ាន់ទាំងនេះ រងផលប៉ះពាល់ដោយសារសង្គ្រាមពាណិជ្ជកម្មអាមេរិក-ចិន និងបានវិនិយោគនៅក្នុងប្រទេសចិនលើសពី ២ឆ្នាំ នៅមុនពេលរើចេញ។ រដ្ឋាភិបាលតៃវ៉ាន់បានជួយដល់ក្រុមហ៊ុនទាំងនេះ នៅក្នុងការទិញដី ជួយលើទឹក ភ្លើង កម្លាំងពលកម្ម ហិរញ្ញប្បទាន និងការលើកលែងពន្ធ ជាដើម ។ល៕
