ឧកញ៉ា នួន រិទ្ធី៖ សំណង់ព្រោងព្រាតនៅតំបន់ផ្លូវ ៦០ម៉ែត្រ នឹងធ្វើឲ្យខណ្ឌមានជ័យប្រែប្រួលមុខមាត់ខ្លាំង

លោកឧកញ៉ា នួន រិទ្ធី អគ្គនាយកក្រុមហ៊ុនសេវាអចលនទ្រព្យ KFA មានប្រសាសន៍ថា កត្តាហេដ្ឋារចនាសម្ព័ន្ធផ្លូវធំទូលាយ ខ្វាត់ខ្វែង តភ្ជាប់ទៅគ្រប់ផ្លូវជាតិសំខាន់ៗ បានធ្វើឲ្យខណ្ឌមានជ័យ ពោល តំបន់សងខាងមហាវិថី សម្ដេចតេជោ ហ៊ុន សែន ដែលស្ថិតក្នុងគម្រោងទីក្រុងរណប អ៊ីង ស៊ីធី ដែលគេហៅជាធម្មតាថា តំបន់ផ្លូវ ៦០ម៉ែត្រ ក្លាយជាតារាកំពុងរះ សម្រាប់ការវិនិយោគសាងសង់តំបន់ពាណិជ្ជកម្ម បុរីលំនៅដ្ឋាន ខុនដូ ផ្សារទំនើប ជាដើម។

លោកឧកញ៉ា នួន រិទ្ធី មានប្រសាសន៍ថា «ក្រុមហ៊ុនអភិវឌ្ឍន៍ធំៗជាច្រើន មាន ចិន សិង្ហបុរី មិនតិចជាង ៤ក្រុមហ៊ុនទេ ដែលកំពុងអភិវឌ្ឍគម្រោងខុនដូ និងលំនៅដ្ឋាន នៅតំបន់ផ្លូវ ៦០ម៉ែត្រ។ ក្នុងនោះអ្វីដែលគេចាប់អារម្មណ៍លើតំបន់នេះខ្លាំង គឺ ក្រុមហ៊ុន ប៉េង ហួត ដែលជាក្រុមហ៊ុនក្នុងស្រុកលេចធ្លោជាងគេខាងគម្រោងសង់លំនៅដ្ឋានបែបបុរីលំដាប់អន្តរជាតិ ក៏កំពុងសម្រុកពង្រីកគម្រោងសាងសង់លំនៅដ្ឋានរបស់ខ្លួន នៅផ្លូវ ៦០ម៉ែត្រនេះដែរ»។

លោកឧកញ៉ា បន្ថែមថា ផ្សារទំនើប អ៊ីអន ដ៏ជោគជ័យរបស់ជប៉ុន ដែលប្រកាសបើកសាខាទីបី នៅតំបន់ផ្លូវ ៦០ម៉ែត្រ ក្នុងទីក្រុងរណប ING City (អ៊ីង ស៊ីធី) នេះ រួមទាំងសាលាអន្តរជាតិដ៏ធំបំផុត ដែលមានវត្តមាននៅទីនោះស្រាប់ ក៏ជាកត្តាស្រូបទាញការវិនិយោគទៅកាន់តំបន់នេះដែរ។