ថ្មីៗនេះ ខេមបូណូមីស មានកិត្តិយសដែលបានជួបលោកឧកញ៉ា សៀ ឫទ្ធី ហើយលោកឧកញ៉ាបានផ្ដល់នូវគន្លឹះសំខាន់ៗ ដើម្បីឲ្យមុខជំនួញមួយទទួលបានជោគជ័យ។
លោកឧកញ៉ាមានប្រសាសន៍ថា ដើម្បីអាជីវកម្មមួយជោគជ័យទៅបាន ចំណុចដែលត្រូវគិត គឺមានចំនួន ៣៖
១. តើយើងចង់រកស៊ីអី ? យើងត្រូវរកមុខរបរហ្នឹងឲ្យបានច្បាស់។ ដើម្បីរកមុខរបរហ្នុងបាន គឺយើងត្រូវសិក្សាពីទីផ្សារ។ តើវាមានទីផ្សារ ឬទេ ?២. បើសិក្សាឃើញថា មានទីផ្សារហើយ យើងត្រូវសួរថា យើងមានធនធាន ឬនៅ ?
៣. បើយើងមានធនធានហើយ តើយើងមានមនុស្សសម្រាប់រៀបចំមុខរបរនោះហើយ ឬនៅ ?
ចំណុចទាំងអស់ខាងលើ គឺធ្វើឲ្យជំនួញរបស់យើងអាចទៅមុខបាន។
លោកឧកញ៉ា សៀ ឫទ្ធី មានប្រសាសន៍បន្ថែមថា «កុំនាំគ្នាឃើញគេលក់ពោតដាច់ យើងនាំគ្នាទៅបង្កើតឆ្នាំងពោតនៅក្បែរកន្លែងគេ។ មនុស្សម្នាក់ៗ អ្នករកស៊ីម្នាក់ៗមានគន្លឹះរៀងខ្លួន។ អ្នកដែលមានការគិតវៃឆ្លាតជាងដៃគូប្រកួតប្រជែង អ្នកនោះហើយជាមនុស្សជោគជ័យ»។
ប្រវត្តិរកស៊ីរបស់ឧកញ៉ា សៀ ឫទ្ធី
ឧកញ៉ា សៀ ឫទ្ធី ជាអ្នកណា ?
លោកឧកញ៉ា សៀ ឫទ្ធី ជាអ្នកជំនួញដ៏ជោគជ័យមួយរូបនៅក្នុងព្រះរាជាណាចក្រកម្ពុជា ដែលគ្រប់គ្រងធុរកិច្ចនិងក្រុមហ៊ុនជាច្រើន រយៈពេលជាង ២០ឆ្នាំមកហើយ។
ដំបូងឡើយ លោកឧកញ៉ាបម្រើការងារឲ្យអង្គការសហប្រជាជាតិ សម័យកាលអ៊ុនតាក់ចូលប្រទេសកម្ពុជាដើម្បីរៀបចំការបោះឆ្នោតលើកដំបូង ក្នុងនាមជាមន្ត្រីសវនកម្មផ្នែកដឹកជញ្ជូនទំនិញ។
ជាមនុស្សដែលពោរពេញដោយការជឿជាក់លើខ្លួនឯង លោកឧកញ៉ាបានបង្កើតមុខជំនួញធំៗជាច្រើនជាហូរហែប្រកបដោយជោគជ័យ នៅក្នុងទីផ្សារប្រទេសកម្ពុជា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
