កម្ពុជានឹងដឹកនាំកិច្ចប្រជុំក្រុមប្រឹក្សាទេសាភិបាលស៊ាសិនឆ្នាំ២០២៣ ដែលមាន១៩ប្រទេសចូលរួម

កិច្ចប្រជុំក្រុមប្រឹក្សាទេសាភិបាលស៊ាសិន គឺជាកិច្ចប្រជុំថ្នាក់តំបន់ដ៏សំខាន់មួយ ដែលមានគោលបំណងពិនិត្យពីលទ្ធផលកាងារដែលមជ្ឈមណ្ឌលស៊ាសិនសម្រេចបាននៅឆ្នាំឆ្នាំ២០២១ និងដាក់ចេញនូវគោលនយោបាយបន្តឆ្នាំ២០២២ ដើម្បីពង្រឹងការបណ្តុះបណ្តាលសមត្ថភាពជំនាញ និងកិច្ចសហប្រតិបត្តិការក្នុងតំបន់ សំដៅពង្រឹងប្រសិទ្ធភាពការងាររបស់ធនាគារកណ្តាលជាសមាជិក។

នៅក្នុងកិច្ចប្រជុំក្រុមប្រឹក្សាទេសាភិបាលមជ្ឈមណ្ឌលបណ្តុះបណ្តាលអាស៊ីអាគ្នេយ៍ South East Asia Training Center ហៅកាត់ថា ស៊ាសិន លើកទី៤១ និងសន្និសីទថ្នាក់ទេសាភិបាលនិងសិក្ខាសាលាជាន់ខ្ពស់ស៊ាសិនលើកទី៥៧  បានធ្វើឡើងកាលពីថ្ងៃទី ០៦ ខែធ្នូ ឯកឧត្តម ជា ចាន់តូ អគ្គទេសាភិបាល ធនាគារជាតិនៃកម្ពុជា បានគូសបញ្ជាក់ថា ដ្បិតពិភពលោកស្ថិតក្នុងវិបត្តិជំងឺកូវីដ-១៩ ក៏ដោយ តែកិច្ចការមជ្ឈមណ្ឌលស៊ាសិន និងការងារផ្សេងៗទៀត នៅតែអាចដំណើរការដោយរលូន។

តាមរយៈកិច្ចប្រជុំតាមប្រព័ន្ធអនឡាញនេះ ឯកឧត្តមទេសាភិបាលនៃធនាគារជាតិកម្ពុជា បានស្វាគមន៍សហការរៀបចំវគ្គបណ្តុះបណ្តាលមួយចំនួនរបស់មជ្ឈមណ្ឌលស៊ាសិន នៅឆ្នាំ២០២២ខាងមុខ។ ជាមួយគ្នានោះ ឯកឧត្តម ក៏បានស្នើឱ្យមានការបង្កើនរៀបចំការបណ្តុះបណ្តាលដោយផ្ទាល់ ជាលំដាប់នៅពេលដែលស្ថានភាពនៃជំងឺកូវីដ-១៩ មានការធូរស្បើយ។ ខណៈនៅឆ្នាំ២០២១នេះ ធនាគារជាតិនៃកម្ពុជា បានចាត់មន្ត្រីចំនួន ១៣២ រូប ឱ្យចូលរួមវគ្គបណ្តុះបណ្តាលនិងស្រាវជ្រាវនានា ពាក់ព័ន្ធនឹងការអនុវត្តនិងមុខងារភារកិច្ចធនាគារកណ្តាលនិងភាពជាអ្នកដឹកនាំ ដែលរៀបចំដោយមជ្ឈមណ្ឌលស៊ាសិន។

សូមបញ្ជាក់ថា កិច្ចប្រជុំក្រុមប្រឹក្សាទេសាភិបាលស៊ាសិន គឺជាកិច្ចប្រជុំថ្នាក់តំបន់ដ៏សំខាន់មួយ ដែលមានគោលបំណងពិនិត្យពីលទ្ធផលកាងារដែលមជ្ឈមណ្ឌលស៊ាសិនសម្រេចបាននៅឆ្នាំក្នុងឆ្នាំ២០២១ នេះ និងដាក់ចេញនូវគោលនយោបាយនាឆ្នាំ២០២២ ដើម្បីពង្រឹងការបណ្តុះបណ្តាលសមត្ថភាពជំនាញ និងកិច្ចសហប្រតិបត្តិការក្នុងតំបន់ សំដៅពង្រឹងប្រសិទ្ធភាពការងាររបស់ធនាគារកណ្តាលជាសមាជិក។ មជ្ឈមណ្ឌលស៊ាសិន មានសមាជិកចំនួន ១៩ប្រទេស នៅក្នុងតំបន់អាស៊ីអាគ្នេយ៍ ព្រមទាំងមានសមាជិកបម្រុង ៨ សមាជិកសង្កេតការណ៍ ៨ និងដៃគូយុទ្ធសាស្ត្រជាច្រើនទៀត ដោយមានបេសកកម្មផ្តោតលើការពង្រឹងសមត្ថភាពជំនាញរបស់មន្ត្រីធនាគារកណ្តាលនៃប្រទេសជាសមាជិក៕