គំនិតផ្តួចផ្តើមដែលស្នើឡើងដោយអាមេរិកដើម្បីធ្វើឱ្យតំបន់ប៉ាស៊ីហ្វិចនេះ ជាតំបន់អាទិភាពយុទ្ធសាស្ត្ររបស់អាមេរិក គឺមិនអាចទៅរួចទេ និងបង្ហាញច្បាស់ណាស់ពីភាពបរាជ័យរបស់អាមេរិក។ នេះបើតាមការវិភាគរបស់សារព័ត៌មាន The Guardian។
បរាជ័យគឺនៅត្រង់ថា គំនិតផ្តួចផ្តើមរបស់អាមេរិក គឺផ្ទុយស្រឡះពីអ្វីដែលក្រុមប្រទេសក្នុងតំបន់ប៉ាស៊ីហ្វិកចង់បាន។ គោលបំណងរបស់អាមេរិក គឺចង់បង្កើនវត្តមាននៅក្នុងតំបន់ប៉ាស៊ីហ្វិច ដោយព្យាយាមទាក់ទាញការចាប់អារម្មណ៍ និងទាក់ទាញសំឡេងពីមេដឹកនាំក្រុមប្រទេសនៅក្នុងតំបន់ប៉ាស៊ីហ្វិក ដើម្បីយកមកទប់នឹងឥទ្ធិពលរបស់ចិន។ ប៉ុន្តែទាំងនេះមិនមែនជាអ្វីដែលមេដឹកនាំប្រទេសនៅតំបន់ប៉ាស៊ីហ្វិចចង់បាននោះទេ។
អ្វីដែលពួកគេចង់បាន គឺជាគំនិតផ្តួចផ្តើមច្បាស់លាស់មួយ សម្រាប់ជាផលប្រយោជន៍ដល់ជាតិរបស់គេ ដោយមិនមែនជាការប្រឆាំងនឹងប្រទេសណាមួយនោះឡើយ ជាពិសេសគឺប្រទេសចិន។
អត្ថបទគួរអាន
បើតាមការវិភាគរបស់ជំនាញភូមិសាស្ត្រនយោបាយអន្តរជាតិបានបញ្ជាក់ប្រាប់សារព័ត៌មានដ៏ល្បី The Guardian ថា មេដឹកនៃប្រទេសបណ្តាកោះក្នុងមហាសមុទ្រប៉ាស៊ីហ្វិកទាំងនោះ មិនចង់ត្រូវបានគេបង្ខំឱ្យជ្រើសរើសរវាង ចិន ឬ អាមេរិកនោះឡើយ ហើយពួកគេរឹតតែមិនចង់ក្លាយជាកូនអុកសម្រាប់មហាអំណាចណាមួយប្រើប្រាស់នោះទេ។ ផ្ទុយទៅវិញ ពួកគេមានបំណង និង មានផែនការផ្ទាល់ខ្លួន សម្រាប់ទាញយកប្រយោជន៍ពីប្រទេសមហាអំណាចធំៗសម្រាប់ប្រទេសជាតិរៀងៗខ្លួន។
សូមជម្រាបថា កិច្ចខិតខំប្រឹងប្រែងរបស់សហរដ្ឋអាមេរិកក្នុងការពង្រីកឥទ្ធិលរបស់ខ្លួននៅក្នុងតំបន់ប៉ាស៊ីហ្វិកតាមរយៈកម្លាំងយោធា បាននិងកំពុងរុញច្រានឲ្យប្រទេសក្នុងតំបន់មហាសមុទ្រប៉ាស៊ីហ្វិក មានហានិភ័យខ្ពស់ និងគម្រាមកំហែងដល់សន្តិសុខជាតិ ក្នុងករណីមានជម្លោះណាមួយកើតឡើង៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
