ប៉ុន្ដែ បច្ចុប្បន្នបណ្ណនេះ ក៏កំពុងមានការលួចធ្វើបណ្ណក្លែងក្លាយ
ចំពោះអ្នកដែលមិនបានចាក់វ៉ា់ក់សាំង ឬមិនបានតេស្ដរកកូវីដ-១៩ផងដែរ
ដោយបញ្ហានេះ កំពុងកើតមានកាន់តែច្រើននៅអាមេរិក និងអឺរ៉ុប។
មកទល់នឹងពេលនេះ មានប្រទេសមួយចំនួននៅអឺរ៉ុប និងនៅអាមេរិកផងដែរ បានយកបណ្ណសុខភាព ទាំងនេះមកប្រើប្រាស់សម្រាប់តម្រូវការនៅក្នុងប្រទេសរៀងៗខ្លួន ហើយថែមទាំងបានបង្កើតច្បាប់សម្រាប់ការប្រើប្រាស់នេះទៀតផង។
ជាក់ស្តែង នៅសហរដ្ឋអាមេរិក និងប្រទេសបារាំង ពលរដ្ឋដែលមានបណ្ណសម្គាល់សុខភាពថាអវិជ្ជមានកូវីដ១៩ ឬបណ្ណដែលបញ្ជាក់ថាខ្លួនបានចាក់វ៉ាក់សាំងរួច ទើបអាចមានសិទ្ធិចូលធ្វើការនៅការិយាល័យ ចូលថ្នាក់រៀន ដើរទិញទំនិញ ចូលញ៉ាំអាហារ មើលកុន និងធ្វើសកម្មភាពផ្សេងៗបាននៅទីសាធារណៈ។ កិច្ចខិតខំប្រឹងប្រែងនេះ ធ្វើឡើងដើម្បីជំរុញឲ្យពលរដ្ឋទៅចាក់វ៉ាក់សាំងបានកាន់តែច្រើន និងធានាបានថាកូវីដ-១៩មិនអាចចម្លងចូលក្នុងសហគមន៍ក្នុងទ្រង់ទ្រាយធំម្តងទៀត។
អត្ថបទទាក់ទង
ទោះយ៉ាងណា ប្រការនេះបានធ្វើឲ្យពលរដ្ឋមួយចំនួន ដែលមិនព្រមទៅចាក់វ៉ាក់សាំង ជាពិសេសពលរដ្ឋបារាំងជាច្រើនខឹងសម្បារ និងមិនពេញចិត្តនោះទេ ហើយពេលខ្លះវាបានឈានទៅដល់ការធ្វើបាតុកម្មថែមទៀត ដោយសារពួកគេអះអាងថា វាជាការបំបិទសិទ្ធិសេរីភាពរបស់ពួកគេ។ ទន្ទឹមនឹងនេះ មានពលរដ្ឋខ្លះបានឈានដល់ការលួចបន្លំធ្វើលិខិតបញ្ជាក់សុខភាពក្លែងក្លាយ បណ្ណចាក់វ៉ាក់សាំងក្លែងក្លាយ ឬប្រើប្រាស់បណ្ណរបស់អ្នកដទៃ ដើម្បីអាចចូលទៅទីតាំង ដែលជាប់កាតព្វកិច្ចខាងលើថែមទៀតផង។
ជាក់ស្តែង នៅក្នុងប្រទេសបារាំង ទោះរងការរិះគន់ និងការធ្វើបាតុកម្មអស់ពេលជាច្រើនសប្តាហ៍ជាប់ៗគ្នាក្តី ប៉ុន្តែបណ្ណសុខភាពត្រូវអនុវត្តជាផ្លូវការ ចាប់ពីថ្ងៃចន្ទទី ៩សីហាតទៅ។ នៅបារាំង មុននឹងចូល ភោជនីយដ្ឋាន មន្ទីរពេទ្យ ហាងកាហ្វេ គេចាំបាច់ត្រូវតែបង្ហាញបណ្ណសុខភាព ដែលអាចជាលិខិតចាក់វ៉ាក់សាំងកូវីដទាំងពីរដូស ឬលទ្ធផលតេស្តកូវីដអវិជ្ជមាន។
ប្រសិនបើគ្មានបណ្ណពិសេសនេះ ពលរដ្ឋបារាំងគ្មានសិទ្ធិទៅចូលភោជនីយដ្ឋាន ទៅកន្លែងហាត់ប្រាណ កន្លែងតាំងពិព័រណ៌ ចូលក្នុងហាងទំនិញ និង ចូលមន្ទីរពេទ្យក្នុងករណីគ្មានជំងឺធ្ងន់ធ្ងរនោះទេ។ ប្រការនេះបានធ្វើឲ្យ បណ្ណសុខភាពក្លែងក្លាយកំពុងពេញនិយម សម្រាប់អ្នកដែលចង់ចូលទីតាំងជាប់កាតព្វកិច្ចខាងលើ ប៉ុន្តែមិនចង់ចាក់វ៉ាក់សាំង ឬធ្វើតេស្តរកមេរោគកូវីដ១៩។ អាជ្ញាធរបារាំង បានសំគាល់ឃើញថា មានការកើនឡើងនៃករណីបន្លំ ផលិតបណ្ណសុខភាពក្លែងក្លាយ ហើយមនុស្សជាច្រើននាក់ត្រូវបានអាជ្ញាធរបារាំងចាប់ឃាត់ខ្លួន ពីបទផលិតបណ្ណបញ្ជាក់សុខភាពកូវីដក្លែងក្លាយនេះ។
ទោះបីជាមានភាពចម្រូងចម្រាស់បែបនេះក្តី រដ្ឋមន្ត្រីក្រសួងសុខាភិបាលបារាំង លោក អូលីវីយ៉េ វឺរ៉ាន (Olivier Veran) បានអះអាងថា វាជាមធ្យោបាយសំខាន់មួយ ដើម្បីទប់ស្កាត់ការរីករាលដាលជំងឺកូវីដ និងជួយប្រជាជនបារាំងឲ្យជៀសផុតពីបម្រាមគោចរ ឬ ការបិទខ្ទប់ប្រទេសសាជាថ្មី។ នេះបើតាមការចុះផ្សាយទីភ្នាក់ងារសារព័ត៌មានបារាំង AFP។
ដោយឡែក នៅសហរដ្ឋអាមេរិកឯណោះវិញ ក៏មិនខុសគ្នាពីបារាំងប៉ុន្មានដៃរ។ ថ្វីបើមិនមានបាតុកម្មប្រឆាំងនឹងបណ្ណបញ្ជាក់សុខភាព ដូចនៅបារាំង ប៉ុន្តែចំនួនអ្នកធ្វើបណ្ណក្លែងបន្លំ បានកើនឡើងជាបន្តបន្ទាប់។
បើតាមការចុះផ្សាយរបស់កាសែតរបស់អាមេរិក The Wall Street Journal បានឲ្យដឹងថា រដ្ឋាភិបាលអាមេរិក បានដាក់ចេញវិធានការជាច្រើនសម្រាប់កម្មករនិយោជិត រួមមានការតម្រូវឲ្យបុគ្គលិកនិយោជិតទាំងអស់ ត្រូវចាក់វ៉ាក់សាំងបង្ការកូវីដ១៩ជាកំហិត និងត្រូវពាក់ម៉ាស់ និងរក្សាគម្លាត។ ខណៈអ្នកដែលធ្វើការនៅក្នុងរដ្ឋ California វិញ ត្រូវធ្វើតេស្តរកកូវីដ១៩នៅរៀងរាល់មួយសប្តាហ៍ម្តង ស្របពេលដែលទីក្រុង New York ក៏ត្រៀមនឹងដាក់ឲ្យប្រើប្រាស់លិខិតបញ្ជាក់សុខភាពនៅតាមទីកន្លែងសាធារណៈដូចនៅបារាំងដែរ។
ស្រដៀងគ្នានេះដែរ សូម្បីតែសិស្សនិស្សិត ដែលសិក្សានៅតាមសាកលវិទ្យាល័យ និង មហាវិទ្យាល័យនៅអាមេរិក ក៏ត្រូវបានគេតម្រូវឲ្យមានបណ្ណសម្គាល់ការចាក់វ៉ាក់សាំងដែរ មុននឹងអាចចូលរៀននៅក្នុងថ្នាក់វិញបាន។
មិនខុសគ្នាពីនៅបារាំងទេ ការដាក់ចេញនូវបទបញ្ញត្តិទាំងនេះ បានជំរុញឲ្យនិន្នាការធ្វើបណ្ណបញ្ជាក់សុខភាពក្លែងក្លាយ កំពុងមានការកើនឡើងកាន់តែច្រើន សម្រាប់អ្នកដែលមិនបានចាក់ ឬ មិនចង់ចាក់វ៉ាក់សាំងតែម្តង។ ភាគច្រើនការទិញដូរលិខិតបញ្ជាក់សុខភាពក្លែងក្លាយនៅអាមេរិក ធ្វើឡើងនៅលើបណ្តាញសង្គម ដូចជា Telegram និង គេហទំព័រខុសច្បាប់ជាច្រើន។ នេះបើតាមអ្នកជំនាញខាងសន្តិសុខអ៊ីនធឺណែតរបស់អាមេរិក។
បញ្ហាទាំងអស់នេះ ត្រូវបានចោទជាសំណួរឡើងជាច្រើនថា តើវាជាការចាំបាច់ដែរឬទេ ដែលតម្រូវឲ្យមានលិខិតបញ្ជាក់សុខភាព ឬ បញ្ជាក់ការចាក់វ៉ាក់សាំង ទើបអាចដើរហើរបាន? តើវាជាការបំបិទសិទ្ធិសេរីភាពពេកដែរទេ សម្រាប់អ្នកដែលមិនស្ម័គ្រចិត្តទៅចាក់វ៉ាក់សាំង?
មែនទែនទៅ សម្រាប់ប្រទេសដែលមានអត្រាចាក់វ៉ាក់សាំងនៅទាប ក៏ដូចជាប្រទេស ដែលមានការគំរាមកំហែងខ្លាំងពីរលកឆ្លងកូវីដ១៩ម្តងទៀត បទបញ្ញត្តិនេះពិតជាមានសារសំខាន់ណាស់ ក្នុងការជំរុញឲ្យពលរដ្ឋទៅចាក់វ៉ាក់សាំងឲ្យបានច្រើនគ្រប់ៗគ្នា និងបង្កើនភាពស៊ាំនៅក្នុងសហគមន៍ ជៀសវាងពីការផុងខ្លួន បិទខ្ទប់ប្រទេសដោយសារកូវីដ១៩ម្តងទៀត។
ជាក់ស្តែង បារាំងគិតត្រឹមចុងសប្តាហ៍មុន មានពលរដ្ឋតែជាង ៤៤លាននាក់ប៉ុណ្ណោះ បានចាក់វ៉ាក់សាំង១ដូស នៅក្នុងនោះ មនុស្ស៣៧លាននាក់ ឬ ៥៥%នៃប្រជាជនសរុបបានចាក់វ៉ាក់សាំង ២ដូស ខណៈអត្រាគោលដៅគឺនឹងចាក់វ៉ាក់សាំងដល់ទៅ ៨០%នៃប្រជាជនបារាំងសរុប។
សម្រាប់សហរដ្ឋអាមេរិកវិញ ទោះបីជា ខ្លួនបានចាក់វ៉ាក់សាំងក្នុងចំនួនច្រើនហើយក៏ដោយ ប៉ុន្តែវាជារឿងចាំបាច់ដូចគ្នា ក្នុងការប្រើប្រាស់លិខិតបញ្ជាក់សុខភាពនៅកន្លែងសាធារណៈ ដើម្បីអាចធានាបានថា មិនមានការចរាចរកូវីដ១៩ ពិសេសកូវីដ១៩បំប្លែងខ្លួនឌែលតានៅក្នុងសហគមន៍របស់ខ្លួន ស្របពេលដែលបច្ចុប្បន្ន អាមេរិកកំពុងកត់ត្រាពីការកើនឡើងវិញនៃករណីវិជ្ជមានកូវីដ១៩ ភាគច្រើនជាកូវីដ១៩បំប្លែងខ្លួនថ្មី ឌែលតា។
បើមើលទៅលើតួលេខករណីឆ្លងកូវីដ១៩ប្រចាំថ្ងៃនៅអាមេរិក នៅមួយរយៈចុងក្រោយនេះ មានប្រមាណ ១០ម៉ឺននាក់ក្នុងមួយថ្ងៃ គឺមានការកើនឡើងដល់ទៅ ១០ដងបើធៀបនឹងករណីឆ្លងប្រចាំថ្ងៃកាលពីខែមិថុនា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
