ការសម្រេចសាងសង់រោងចក្រនេះ ធ្វើឡើងក្រោយថ្នាក់ដឹកនាំក្រុមហ៊ុន RMA Cambodia សង្កេតឃើញពីកំណើនប្រើប្រាស់រថយន្ត ថ្មីៗមានការកើនឡើង និងទំនោរប្រើប្រាស់រថយន្តមួយទឹកនៅកម្ពុជាមានការថយចុះ គួបផ្សំក្រុមហ៊ុនចង់ឲ្យទីផ្សាររថយន្តថ្មីកាន់តែល្អប្រសើរ និងទូលំទូលាយជាងមុន។ រោងចក្រដំឡើងរថយន្ត Ford នេះ ត្រូវបានរំពឹងថា នឹងចូលរួមចំណែកជួយទាក់ទាញក្រុមហ៊ុនផ្សេងៗឲ្យមកវិនិយោគរោងចក្រដំឡើងរថយន្តនៅកម្ពុជាកាន់តែច្រើន និងផ្តល់បច្ចេកវិទ្យាថ្មីៗដល់បុគ្គលិក និងយុវជនកម្ពុជាផងដែរ។
បើគ្មានអ្វីប្រែប្រួលទេរោងចក្របង្គុំ និង ដំឡើងរថយន្ត Ford ដ៏ថ្មីសន្លាងមួយ នឹងបង្ហាញរូបរាងនៅលើទឹកដីខេត្តពោធិ៍សាត់ក្នុងពេលឆាប់ខាងមុខនេះហើយ។ បើតាម លោក ងន សាំង នាយកក្រុមហ៊ុន RMA Cambodia ដែលជាក្រុមហ៊ុនមេ នាំចូលរថយន្តម៉ាក Ford បានបញ្ជាក់ប្រាប់ខេមបូណូមីសថា រោងចក្រនេះបានចាប់ផ្តើមដំណើរការសាង់សង់ហើយ ហើយតាមផែនការគ្រោងបញ្ចប់ការសាងសង់នៅចុងត្រីមាសទី១ក្នុងឆ្នាំ២០២២។
អត្ថបទទាក់ទង
ពាក់ព័ន្ធមូលហេតុ ដែលក្រុមហ៊ុន RMA សម្រេចបង្កើតរោងចក្រដំឡើងរថយន្ត Ford នៅកម្ពុជានេះ ត្រូវបានលោក ងន សាំង គូសបញ្ជាក់ថា គឺបន្ទាប់ពីក្រុមហ៊ុនមើលឃើញពីសន្ទុះនៃកំណើនការប្រើប្រាស់រថយន្តថ្មីនៅកម្ពុជាមានការកើនឡើង ហើយទំនោរប្រើប្រាស់រថយន្តមួយទឹកមានការថយចុះ។ ម្យ៉ាងទៀតក្រុមហ៊ុនចង់ចូលរួមចំណែកជួយលើលើកកម្ពស់ទីផ្សាររថយន្តថ្មីនៅកម្ពុជា ក៏ដូចជាជួយសម្រូលឲ្យតម្លៃរថយន្តថ្មីលើទីផ្សារមានភាពល្អប្រសើរជាងមុន។
នាយកក្រុមហ៊ុន RMA Cambodia រូបនេះ មានសុទិដ្ឋិនិយមថា តាមរយៈវត្តមានរបស់រោងចក្រដំឡើងរថយន្ត Ford នេះ វាបានផ្តល់អត្ថប្រយោជន៍យ៉ាងច្រើនដល់សេដ្ឋកិច្ចកម្ពុជា តាមរយៈការជួយទាក់ទាញក្រុមហ៊ុនបរទេសឲ្យមកបោះទុនវិនិយោគនៅកម្ពុជា ផ្តល់ការងារជូនប្រជាពលរដ្ឋ និងនាំបច្ចេកវិទ្យាថ្មីសម្រាប់យុវជនក្នុងការអភិវឌ្ឍន៍សមត្ថភាពលើវិស័យយានយន្តនេះជាដើម។
គួរបញ្ជាក់ថា រោងចក្រដំឡើងរថយន្ត Ford នេះ សាងសង់លើផ្ទៃដី៤ហិកតា ស្ថិតនៅភូមិសាវ័ន ឃុំស្នាអន្យា ស្រុកក្រគរ ខេត្តពោធិ៍សាត់។ រោងចក្រនេះអាចស្រូបទាញកម្លាំងពលកម្មបានប្រមាណ៥០០នាក់ និងមានសមត្ថភាពអាចផលិតរថយន្តបានប្រមាណ១ម៉ឺនគ្រឿងក្នុងមួយឆ្នាំ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
