ការប្រកាសដកខ្លួនចេញនេះ ត្រូវបានកូរ៉េខាងជើងស្តីបន្ទោសលើជំងឺរាតត្បាតកូវីដ១៩ដែលបន្តរាលដាលឥតឈប់ឈរ។ ជាមួយគ្នានេះដែរ កូរ៉េខាងជើងមិនភ្លេចឡើយឆ្លៀតស្តីបន្ទោស ចោទប្រកាន់អាមេរិក និងសម្ព័ន្ធមិត្តថាបានព្យាយាមធ្វើឲ្យព្រឹត្តិការណ៍កីឡាខាងលើប្រារព្ធឡើងមិនបានជោគជ័យ។
ទីភ្នាក់ងារសារព័ត៌មាន KCNA បានរាយការណ៍ថា គណៈកម្មាធិការអូឡាំពិក និងក្រសួងវប្បធម៌ និងកីឡារបស់ប្រទេសកូរ៉េខាងជើង បានផ្ញើលិខិតមួយទៅកាន់សមភាគីចិន រួមទាំងគណៈកម្មាធិការរៀបចំកីឡាអូឡាំពិកទីក្រុងប៉េកាំង ដោយបង្ហាញការគាំទ្ររបស់ពួកគេចំពោះការប្រកួតនេះ បើទោះបីជាពួកគេមិនបានចូលរួមក៏ដោយ។
មែនទែនទៅ ក្រោមទណ្ឌកម្ម និងការល្មើសនឹងច្បាប់របស់គណៈកម្មាធិការអូឡាំពិកអន្តរជាតិ ហៅកាត់ថា IOC ប្រទេសកូរ៉េខាងជើងត្រូវបានគេព្យួរសិទ្ធិចូលរួមប្រកួត រហូតដល់ដំណាច់ឆ្នាំ ២០២២។ ក្នុងន័យនេះ ព្យុងយ៉ាង នឹងខកខានការប្រកួតកីឡាអូឡាំពិករដូវរងានៅទីក្រុងប៉េកាំង រួចទៅហើយ បន្ទាប់ពីការខកខានមិនបានបញ្ជូនក្រុមកីឡាករទៅចូលរួមព្រឹត្តិការណ៍កីឡាអូឡាំពិកទីក្រុងតូក្យូកាលពីឆ្នាំមុនម្តងរួចមក ដោយលើកឡើងពីការព្រួយបារម្ភអំពីជំងឺកូវីដ១៩។
អត្ថបទគួរអាន
យ៉ាងណាមិញ ទីក្រុងព្យុងយ៉ាងបានព្យាយាមអះអាង និងទម្លាក់កំហុសនេះលើជំងឺកូវីដ១៩ និងទង្វើរបស់អាមេរិក រួមជាមួយសម្ព័ន្ធមិត្ត។ តាមរយៈលិខិតដែលផ្ញើរទៅប៉េកាំងដដែល របបក្រុងព្យុងយ៉ាង បន្តថា៖ «យើងមិនអាចចូលរួមក្នុងព្រឹត្តិការណ៍កីឡាអូឡាំពិកបានទេ ដោយសារចលនារបស់កម្លាំងអរិភាព និងការរាតត្បាតទូទាំងពិភពលោកនៃកូវីដ១៩ ប៉ុន្តែយើងនឹងគាំទ្រយ៉ាងពេញទំហឹងដល់សមមិត្តចិនក្នុងការងាររបស់ពួកគេ ដើម្បីរៀបចំព្រឹត្តិការណ៍អូឡាំពិកដ៏អស្ចារ្យនេះ។»
កូរ៉េខាងជើងដែលជាមិត្តជិតស្និទរបស់ចិន បានបន្តរិះគន់ការធ្វើពហិការការទូតរបស់សហរដ្ឋអាមេរិក និងសម្ព័ន្ធមិត្តរបស់ខ្លួនថាជា ការប្រមាថដល់ស្មារតីនៃធម្មនុញ្ញអូឡាំពិកអន្តរជាតិ និងជាទង្វើប៉ុនប៉ង ធ្វើឱ្យខូចដល់មុខមាត់លើឆាកអន្តរជាតិរបស់ប្រទេសចិន។
គួររំឭកថា កាលពីខែធ្នូឆ្នាំ២០២១ សហរដ្ឋអាមេរិកបានប្រកាសធ្វើពហិកាការទូត ក្នុងការប្រកួតអូឡាំពិករដូវរងាឆ្នាំ២០២២ នាទីក្រុងប៉េកាំងប្រទេស ក្រោមហេតុផលថាចិនបានបន្តរំលោភសិទ្ធិមនុស្សលើពលរដ្ឋដែលរស់នៅតំបន់ស៊ីនជាំងប្រទេសចិន។ ប្រទេសជាច្រើនទៀត រួមទាំងអង់គ្លេស អូស្ត្រាលី និងកាណាដា ក៏បានប្រកាសធ្វើពហិការការទូតផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
