រុស្ស៊ីបានបរាជ័យក្នុងការបញ្ឈប់កិច្ចប្រជុំក្រុមប្រឹក្សាសន្ដិសុខអង្គការសហប្រជាជាតិ ដែលស្នើឡើងដោយសហរដ្ឋអាមេរិក ដោយកិច្ចប្រជុំនោះ បានបើកផ្លូវឲ្យប្រទេសទាំងពីរតទល់មុខគ្នាជាសាធារណៈ ទាក់ទងនឹងសកម្មភាពយោធារុស្សីនៅក្បែរព្រំដែនអ៊ុយក្រែន ដែលជាអ្វីដែលសហរដ្ឋអាមេរិក និង ប្រទេសដទៃទៀតហៅថា ជាការគំរាមកំហែងដល់សន្តិភាព និង សន្តិសុខអន្តរជាតិ។
ក៏ប៉ុន្តែ ក្រុមប្រឹក្សាសន្ដិសុខអង្គការសហប្រជាជាតិមិនអាចចាត់វិធានការណាមួយ លើសពីការនិយាយសម្របសម្រួលជុំវិញស្ថានភាពដ៏តានតឹងនេះទេ ដោយសាររុស្ស៊ីជាប្រទេសមួយក្នុងចំណោមមហាអំណាចវេតូទាំងប្រាំរបស់ក្រុមប្រឹក្សាអង្គការសហប្រជាជាតិ រួមជាមួយនឹងសហរដ្ឋអាមេរិក ចិន បារាំង និងអង់គ្លេសផងដែរ។ អំណាច Veto ឬ Veto power គឺសម្ដៅដល់អំណាចនៃសមាជិកអចិន្ត្រៃយ៍ទាំង៥របស់ក្រុមប្រឹក្សាសន្ដិសុខអន្តរជាតិ។
បើយោងតាមប្រសាសន៍របស់ឯកអគ្គរដ្ឋទូតសហរដ្ឋអាមេរិកប្រចាំនៅអង្គការសហប្រជាជាតិលោកស្រី Linda Thomas-Greenfield ដោយបានលើកឡើងនូវអំណះអំណាង ទៅកាន់ក្រុមប្រឹក្សាសន្ដិសុខ UN ដែលមានសមាជិក ១៥ រូបថា "ការគំរាមកំហែងនៃការឈ្លានពាននៅតាមព្រំដែននៃប្រទេសអ៊ុយក្រែន គឺជាការបង្កហេតុ ឬញុះញុងឲ្យមានសង្គ្រាម ស្របពេលដែលទំនាក់ទំនងរវាងសហរដ្ឋអាមេរិក និងរុស្ស៊ីក៏កំពុងមានការធ្លាក់ចុះស្រាប់ផងនោះ។
អត្ថបទគួរអាន
ស្របពេលជាមួយគ្នានោះដែរ លោកស្រី Thomas-Greenfield បានចោទប្រកាន់រុស្ស៊ីថា បានដាក់ទាហានជាង ១សែននាក់នៅតាមព្រំដែនអ៊ុយក្រែនជាមួយរុស្ស៊ី និង បេឡារូស ដើម្បីរៀបចំ "ធ្វើសកម្មភាពវាយលុកចូលអ៊ុយក្រែន" ។ ឯកអគ្គរដ្ឋទូតអាមេរិកប្រចាំ UN រូបនេះ បានបន្ថែមថា ទីក្រុងវ៉ាស៊ីនតោនបានឃើញភស្តុតាងដែលថា ទីក្រុងមូស្គូគ្រោងនឹងដាក់ពង្រាយទាហានចំនួន ៣ ម៉ឺន នាក់បន្ថែមទៀតនៅក្នុងប្រទេសបេឡារុស្សនៅដើមខែកុម្ភៈនេះ។
ដោយឡែក ឯកអគ្គរដ្ឋទូតរុស្ស៊ីរបស់អង្គការសហប្រជាជាតិលោក វ៉ាស៊ីលី ណេប៊ីនសៀរ ( Vassily Nebenzia) បានច្រានចោលការចោទប្រកាន់របស់អាមេរិក ហើយបានតបទៅវិញថា អាមេរិកលើក កិច្ចពិភាក្សានេះឡើង គឺជាការញុះញង់ និង ចង់ឲ្យមានសង្គ្រាមកើតឡើង។
គួរបញ្ចាក់ផងដែរថា សហរដ្ឋអាមេរិកបានត្រូវការសំឡេងបោះឆ្នោតយ៉ាងហោចណាស់៩សំឡេង នៃសមាជិកក្រុមប្រឹក្សាសន្ដិសុខអង្គការសហប្រជាជាតិទាំង១៥ប្រទេស ដើម្បីអាចចាប់ផ្ដើមកិច្ចប្រជុំក្រុមប្រឹក្សានេះបាន បន្ទាប់ពីរុស្ស៊ីបានជំទាស់កិច្ចប្រជុំនេះ។ ក្នុងនោះ សមាជិក១០ប្រទេសបានបោះឆ្នោតគាំទ្រ រីឯរុស្ស៊ី និងចិនបោះឆ្នោតមិនគាំទ្រ ខណៈឥណ្ឌា ហ្គាបុង និងកេនយ៉ាបោះឆ្នោតអនុបវាទ៕
អត្ថបទ វ៉ាន់ ស្រីរ័ត្ន
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
