លោក ហាន ឃ្លុង (Hans Kluge) នាយកប្រចាំតំបន់របស់អង្គការសុខភាពពិភពលោកប្រចាំទ្វីបអឺរ៉ុបបាននិយាយថា បើទោះបីជា ការចាក់វ៉ាក់សាំងបង្ការកូវីដ១៩មានការឡើងខ្ពស់នៅក្នុងទ្វីបអឺរ៉ុបក៏ដោយ តែអត្រាអ្នកឆ្លងនៅតែមានការហក់ឡើង ព្រោះថា ក្នុងពេលជាមួយគ្នានេះ អត្រាចាក់វ៉ាក់សាំងក្នុងប្រទេសមួយចំនួននៅអឺរ៉ុបខាងកើតស្ថិតនៅទាបបំផុត ស្របពេលដែលតំបន់អឺរ៉ុបក៏ចាប់ផ្ដើមបន្ធូរបន្ថយនូវវិធានការសុខភាពសាធារណៈ និងគម្លាតសង្គមឡើងវិញ។ ប្រការនេះ ត្រូវបានគេចាត់ទុកថា អាចនឹងបង្កឱ្យមានរលកឆ្លងទីបួននៅក្នុងតំបន់នេះផងដែរ។
ដូចនេះហើយ នាយកប្រចាំតំបន់អឺរ៉ុបរបស់អង្គការសុខភាពពិភពលោករូបនេះ បានអះអាងថា បើទោះបីជាមានការបើកដំណើរការប្រទេសឡើងវិញក៏ដោយ តែវិធានការកូវីដ១៩ ដូចជា ការពាក់ម៉ាស់ ការលាងដៃ គម្លាតសង្គម ជាពិសេសនៅក្នុងសាលារៀន ត្រូវតែបន្តអនុវត្ត ។
អត្ថបទគួរអាន
ជាក់ស្ដែង ជំងឺកូវីដកំពុងរាលដាលឆ្លងក្នុងសាលារៀនជាច្រើននៅប្រទេសអង់គ្លេស ក្រោយសិស្សសាលាបានបោះបង់ចោលនូវវិធានការ ការពារកូវីដ១៩។ លើសពីនេះទៅទៀត វាត្រូវបានគេគិតថា អាចនឹងមានការបិទប្រទេសម្ដងទៀតនៅរដូវរងាខាងមុខនេះ។
សូមជម្រាបថា អង្គការសុខភាពពិភពលោកបានព្រមានថា ទ្វីបអឺរ៉ុបអាចនឹងមានអ្នកស្លាប់កន្លះលាននាក់ទៀតនៅខែកុម្ភៈឆ្នាំក្រោយ ខណៈត្រឹមតែរយៈពេល 4 សប្តាហ៍ចុងក្រោយនេះ អត្រាអ្នកជំងឺសម្រាកព្យាបាលនៅមន្ទីរពេទ្យបានកើនឡើងទ្វេដង។ គួរបញ្ជាក់ថា អឺរ៉ុបជា ចំណុចកណ្តាល នៃការផ្ទុះឡើងវិញជាថ្មីទៀតនៃជំងឺកូវីដ១៩ជាសកល ដែលបង្កឡើងដោយមេរោគបំប្លែងថ្មី ឌែលតា។
ទោះជាស្ថានការណ៍កាន់តែអាក្រក់ទៅៗក្ដី ប៉ុន្ដែសម្រាប់ថ្ងៃបុណ្យណូអែលដែលខិតជិតមកដល់ឆាប់ៗនេះ ពលរដ្ឋនៅតំបន់អឺរ៉ុបនៅតែអាចប្រារព្ធកម្មវិធីបុណ្យនេះបានជាធម្មតា ប៉ុន្តែត្រូវតែមានសុវត្ថិភាព ដោយព្យាយាមរក្សាគម្លាតសង្គម អនុវត្តវិធានារកូវីដ និងកាត់បន្ថយចំនួនមនុស្សនៅពេលជួបជុំ៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
