ទាំងប៉េកាំង ដែលជាបេះដូងរបស់ចិន និងសៀងហៃ ធ្លាប់ភ្លក់រសជាតិបិទខ្ទប់អស់ពីរខែម្តងរួចហើយនោះ សុទ្ធតែកំពុងខ្លាចរអាយ៉ាងខ្លាំងអំពីស្ថានភាពសេដ្ឋកិច្ច ហើយរំពឹងថា ករណីឆ្លងនឹងធ្លាក់ចុះវិញឆាប់ៗ ដែលអនុញ្ញាតឱ្យគេបើកទូលាយទីក្រុងឡើងវិញ។ នេះបើតាមការចុះផ្សាយដោយសារព័ត៌មានអន្តរជាតិធំៗជាច្រើន។
រាប់ចាប់ពីថ្ងៃចន្ទដើមសប្តាហ៍នេះ ចិនបានស្គាល់ពីកំណើនករណីឆ្លងកូវីដ១៩ ក្នុងសហគមន៍ដ៏លឿនរហ័សក្នុងចំនួនជិត៣ម៉ឺនករណី។ ចិនមិនធ្លាប់កត់ត្រាពីអត្រាឆ្លងសហគមន៍ច្រើនដូចនេះទេ កាលពីមុនមក។ ក្នុងចំណោមករណីឆ្លងទាំងជិត៣ម៉ឺន មានជិតពាក់កណ្តាលត្រូវបានរកឃើញក្នុងទីក្រុង ហ្គ័ងចូវ(Guangzhou)ភាគខាងជើង និងទីក្រុងឆុងឈីង(Chongqing) ភាគនិរតី។
ដោយឡែក នៅរដ្ឋធានីប៉េកាំង ករណីឆ្លងបាននិងកំពុងឡើងដល់កម្រិតខ្ពស់ជារៀងរាល់ថ្ងៃ ដែលជំរុញឱ្យមានការអំពាវនាវពីរដ្ឋអំណាចឱ្យអ្នករស់នៅក្នុងទីក្រុងបន្តស្នាក់នៅក្នុងផ្ទះ បើមិនមានភាពចាំបាច់ក្នុងការចេញទៅខាងក្រៅ និងត្រូវបង្ហាញលទ្ធផលតេស្តថា ខ្លួនអវិជ្ជមានកូវីដ១៩មិនឱ្យលើសពី៤៨ ម៉ោង មុននឹងអនុញ្ញាតឱ្យចូលទៅក្នុងអគារ ឬកន្លែងសាធារណៈណាមួយ។
នៅក្នុងប៉េកាំងតែឯង រកឃើញជិត៣ពាន់ករណីរាប់ចាប់ពីថ្ងៃទី២០ មកទល់ថ្ងៃទី ២២ខែវិច្ឆិកានេះ។
អត្ថបទគួរអាន
កាលពីល្ងាចថ្ងៃទី២២វិច្ឆិកា មជ្ឈមណ្ឌលហិរញ្ញវត្ថុទីក្រុងសៀងហៃបានប្រកាសថា ចាប់ពីថ្ងៃទី២៤វិច្ឆិកា សម្រាប់អ្នកដែលទើបចូលមកដល់ទីក្រុងសៀងហៃមិនទាន់បាន៥ថ្ងៃ នឹងមិនអនុញ្ញាឱ្យចូលទៅកាន់កន្លែងសាធារណៈដូចជាផ្សារទំនើប និងភោជនីយដ្ឋានទេ ប៉ុន្តែពួកគេនៅតែអាចទៅការិយាល័យធ្វើការ និងប្រើប្រាស់សេវាដឹកជញ្ជូនសាធារណៈបានធម្មតា។ នៅមុនវិធានការនេះ សៀងហៃដែលមានប្រជាជនរស់នៅ២៥លាននាក់បានបញ្ជាឱ្យបិទខ្ទប់កន្លែងវប្បធម៌និងកម្សាន្ត នៅក្នុងសង្កាត់ចំនួន៧ក្នុងចំណោម១៦សង្កាត់សរុបរបស់ខ្លួន បន្ទាប់ពីបានរកឃើញការចម្លងក្នុងស្រុកថ្មីចំនួន៤៨ករណី។
គិតពីចុងសប្តាហ៍មុន មកទល់ពេលនេះ មានបុគ្គលិកសុខាភិបាលជួររមុខរបស់ចិន ៥នាក់ហើយដែលបានបាត់បង់ជីវិត ក្នុងការប្រយុទ្ធប្រឆាំងនឹងកូវីដ១៩។ នេះបើតាមសារព័ត៌មានរ៉យទ័រដដែល។
បើទោះបីជា ចិនបានព្យាយាមបញ្ចៀសការបិទខ្ទប់ទាំងស្រុងក្នុងទីក្រុង ដោយជំនួសមកវិញការបិទតាមកន្លែង និងសង្កាត់ក៏ដោយ ប៉ុន្តែចិននៅតែជាប្រទេស ដែលមានវិធានការណ៍កូវីដតឹងរ៉ឹងជាងគេបំផុតក្នុងលោកគិតត្រឹមចុងឆ្នាំ២០២២នេះ។ ប្រការនេះកំពុងធ្វើឱ្យវិនិយោគិនព្រួយបារម្ភជាថ្មីអំពីស្ថានភាពប្រទេសដែលមានសេដ្ឋកិច្ចធំលំដាប់ទីពីររបស់ពិភពលោកមួយនេះ ពិសេសគឺទៅលើបញ្ហាភាគហ៊ុន និងកាត់បន្ថយតម្រូវការប្រេងនៅចុងឆ្នាំនេះ។
យ៉ាងណាក៏ដោយ រដ្ឋាភិបាលអះអាងថា គោលនយោបាយកូវីដស្មើសូន្យរបស់ប្រធានាធិបតីចិនគឺបានជួយសង្គ្រោះជីវិតមនុស្ស និងដែលជារឿងចាំបាច់ ដើម្បីការពារប្រព័ន្ធសុខាភិបាល។ ក៏ប៉ុន្តែ អ្នកប្រើប្រាស់បណ្តាញសង្គមជាច្រើននៅចិនបានបង្ហាញការខកចិត្ត ដែលរដ្ឋអំណាចរបស់ខ្លួននៅប្រើវិធានការតឹងរ៉ឹងនេះ៕
