យោងតាមរបាយការណ៍ពីក្រសួងសុខាភិបាលដដែល គិតត្រឹមព្រឹកថ្ងៃទី ១៣ ខែមីនា ឆ្នាំ២០២១ ចំនួនអ្នកឆ្លងកូវីដ-១៩ សរុបទាំងអស់មាន១.២៦៤នាក់ ក្នុងនោះ មានដល់ទៅ៧៥១នាក់ គឺជាករណីឆ្លងចូលក្នុងព្រឹត្តិការណ៍សហគមន៍២០កុម្ភៈ។ ទោះយ៉ាងណាចំនួនអ្នកដែលបានជាសះស្បើយក៏មានការកើនឡើងសរុបដល់ទៅ ៦២៤នាក់ រួមទាំងនៅព្រឹកថ្ងៃទី ១៣ ខែមីនានេះ អ្នកជាសះស្បើយថ្មីមានចំនួន៤នាក់ផងដែរ។
តាំងពីថ្ងៃទី ០៤ ខែមីនាមក ខេត្តព្រះសីហនុនៅតែបន្ដបិទជាបណ្ដោះអាសន្នសម្រាប់ការធ្វើដំណើរចេញចូលពីសំណាក់ប្រជាពលរដ្ឋ លើកលែងតែការដឹកជញ្ជូនទំនិញតែប៉ុណ្ណោះ ក្រោយពេលដែលខេត្តនេះ ត្រូវបានរកឃើញអ្នកឆ្លងកូវីដ-១៩ក្នុងចំនួនច្រើនជាបន្ដបន្ទាប់។ ទោះយ៉ាងណា ខេត្តព្រះសីហនុក៏បានចាប់ផ្ដើមបើកឲ្យដំណើរការឡើងវិញនូវទាំងអាជីវកម្មមួយចំនួនបណ្ដើរៗផងដែរ បន្ទាប់ពីទីតាំងទាំងនោះ ត្រូវបានផ្អាកដំណើរការដើម្បីតាមដាន និងទប់ស្កាត់ការឆ្លងមេរោគកូវីដ-១៩។ គិតមកទល់ព្រឹកនេះ ចំនួនអ្នកឆ្លងកូវីដ-១៩ នៅក្នុងខេត្តព្រះសីហនុបានកើនឡើងដល់ទៅជាង១០០នាក់ហើយ។
អត្ថបទទាក់ទង!
ខេត្តកណ្ដាល និងខេត្តព្រៃវែងឯណោះវិញ ក៏កំពុងក្លាយជាចំណុចក្ដៅមួយក្នុងការឆ្លងរីករាលដាលនៃមេរោគកូវីដ-១៩ បន្ទាប់ពីរាជធានីភ្នំពេញ និងខេត្តព្រះសីហនុផងដែរ ដោយនៅរយៈពេលប៉ុន្មានថ្ងៃចុងក្រោយនេះ ចំនួនអ្នកឆ្លងរកឃើញថ្មីៗនៅក្នុងខេត្តទាំងពីរនេះ មានការកើនឡើងជាបន្ដបន្ទាប់។
ប្រមុខរាជរដ្ឋាភិបាល ក៏ដូចជាក្រសួងសុខាភិបាល បន្ដអំពាវនាវឲ្យប្រជាពលរដ្ឋទាំងអស់ចូលរួមអនុវត្តវិធានការការពារមួយចំនួនដូចជា វិធានការ ៣ ការពារ (ពាក់ម៉ាស់ ឡាងដៃញឹកញាប់ និងរក្សាគម្លាតសុវត្ថិភាព) និងវិធានការ៣កុំ (កុំទៅកន្លែងមានមនុស្សច្រើនកកកុញ, កុំទៅកន្លែងបិទជិតគ្មានខ្យល់ចេញចូល និងប្រើម៉ាស៊ីនត្រជាក់ច្រើនពេក និងកុំប៉ពាល់គ្នា ចាប់ដៃ កៀកស្មា ឱបគ្នា នៅពេលជួបគ្នា)៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
