ចំពោះការប្រែក្លាយពីគ្រឹះស្ថានមីក្រូហិរញ្ញវត្ថុ មកជាធនាគារនេះដែរ ត្រូវបានលោក ផល វ៉ាន់ឌី អះអាងថា ជាការឆ្លុះបញ្ជាំងដ៏ល្អមួយ នៅក្នុងវិស័យហិរញ្ញវត្ថុនៅកម្ពុជា។
គួរបញ្ជាក់ គ្រឹះស្ថានមីក្រូហិរញ្ញវត្ថុលីហួរ ដែលជាបុត្រសម្ព័ន្ធរបស់ក្រុមហ៊ុន លី ហួរ គ្រុប បានប្រែក្លាយមកជា ធនាគារ SBI លីហួរវិញ ក្រោមការសហការវិនិយោគជាមួយក្រុមហ៊ុនជប៉ុន គឺSBI Holdings ដែលក្រុមហ៊ុនយក្សមួយ មានទ្រព្យសកម្មសរុប ជិត ៥៣ ពាន់លានដុល្លារអាមេរិក។ ហើយសព្វថ្ងៃធនាគារ អេសប៊ីអាយ លីហួរ បានពង្រីកសាខាទូទាំង ២៥រាជធានីខេត្ត និងមានបុគ្គលិកបម្រើការជាង ១ពាន់នាក់។
ដោយឡែក ហត្ថាកសិករ លីមីតធីត បានក្លាយខ្លួនទៅជាធនាគារហត្ថា កាលពីអំឡុងខែសីហា ឆ្នាំ២០២០។ បើគិតត្រឹមថ្ងៃទី ៣០ ខែកញ្ញា ឆ្នាំ២០២០ ធនាគារនេះ មានទ្រព្យសកម្មសរុបជាង ១.៤០០លានដុល្លារអាមេរិក។
អត្ថបទទាក់ទង!
ចំណែក គ្រឹះស្ថានមីក្រូហិរញ្ញវត្ថុក្រេឌីតវិញ កាលពីឆ្នាំ២០១៩ មុនពេលបញ្ជូលគ្នាជាមួយធនាគារហ្វីលីព ស្ថាប័នហិរញ្ញវត្ថុមួយនេះ មានទ្រព្យសកម្មសរុបជាង ៣០០លានដុល្លារអាមេរិក។
តាមតួលេខពីធនាគារជាតិនៃកម្ពុជា បានប៉ាន់ស្មានថា នៅឆ្នាំ២០២០ ឥណទានអតិថិជននៅក្នុងវិស័យធនាគារសម្រេចបានដល់ទៅជាង ៣៧ពាន់លានដុល្លារ កើនឡើងជិត១៥% ធៀបនឹងឆ្នាំ២០១៩ ខណៈដែលប្រាក់បញ្ញើអតិថិជនវិញ មានប្រមាណជិត ៣៤ពាន់លានដុល្លារអាមេរិក កើនជាង១៥%។ ដោយឡែក ទ្រព្យសកម្មរបស់ប្រព័ន្ធធនាគារនៅឆ្នាំ២០២០វិញ មានដល់ទៅជាង ៥៩ពាន់លានដុល្លារ កើនជិត១៦%។ តាមតួលេខនេះ បង្ហាញថា ទ្រព្យសកម្មរបស់ប្រព័ន្ធធនាគារ មានប្រមាណជាង ២០០% នៃផលិតផលក្នុងស្រុកសរុបរបស់កម្ពុជា។
នៅឆ្នាំ២០២០ គណនីប្រាក់បញ្ញើរបស់គ្រឹះស្ថានធនាគារ និងមីក្រូហិរញ្ញវត្ថុមានជិត១០លានគណនី កើនជាង១៥% ខណៈដែលឥណទានមាន ៣លាន ២សែនគណនី កើនត្រឹមតែ ៣,៦%ប៉ុណ្ណោះ។
បើតាមធនាគារជាតិ ចំពោះការរៀបចំឥណទានឡើងវិញនៅក្នុងឆ្នាំ២០២០ គឺបានធ្វើឡើងចំនួនជាង ២៨ម៉ឺនគណនី ដែលានតម្លៃជាទឹកប្រាក់ប្រមាណ៤ពាន់២រយលានដុល្លារ ហើយការរៀបចំឥណទានឡើងវិញនេះ នឹងបន្ដរហូតដល់ត្រឹមពាក់កណ្ដាលឆ្នាំ២០២១នេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
