រឿងពោតធ្លាក់ថ្លៃ... ថវិកា៣០លានដុល្លារនឹងត្រូវបញ្ចេញដើម្បីជួយសង្គ្រោះ

បន្ទាប់ពីទីផ្សារម្រេចនិងដំឡូងមីបាននិងកំពុងបន្តធ្លាក់ថ្លៃ ឥឡូវនេះ កសិករជាអ្នកដាំពោតក៏កំពុងតែរងទុក្ខមិនចាញ់អ្នកដាំម្រេចនិងដំឡូងមីប៉ុន្មានដែរ ពោលគឺតម្លៃកសិផលពោតនៅឆ្នាំបានធ្លាក់ចុះខ្លាំងពី ៤៤៤រៀលក្នុងមួយគីឡូក្រាម មកនៅត្រឹមតែ ៣៦០រៀលប៉ុណ្ណោះក្នុងមួយគីឡូក្រាម។

ធនាគារអភិវឌ្ឍន៍ជនបទត្រៀមបញ្ចេញថវិកាជិត ៣០លានដុល្លារដើម្បីសង្គ្រោះពោតធ្លាក់ថ្លៃ។

ឆ្លើយតបទៅនឹងបញ្ហានេះ នៅសប្ដាហ៍នេះ ក្រសួងពាណិជ្ជកម្មបានបើកកិច្ចប្រជុំអន្តរក្រសួងមួយ ដើម្បីស្វែងរកដំណោះស្រាយបន្ទាន់សម្រាប់ប្រជាកសិករជាអ្នកដាំពោត ហើយក្នុងនោះ ធនាគារអភិវឌ្ឍន៍ជនបទ បានគ្រោងបញ្ចេញទុនជិត ៣០លានដុល្លារដើម្បីជួយសង្គ្រោះពោតដែលធ្លាក់ថ្លៃ។

ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានលើកឡើងថា ការធ្លាក់ចុះនៃតម្លៃកសិផលពោតនៅឆ្នាំនេះ ផ្ដើមឡើងធំដោយសារតែបញ្ហាអាកាសធាតុមានភ្លៀងធ្លាក់ច្រើន ដែលធ្វើឲ្យទិន្នផលមិនសូវទទួលបានគុណភាពល្អ ខណៈដែលកសិករភាគច្រើនមិនមានឡសម្ងួត និងកន្លែងស្តុកគ្រប់គ្រាន់នៅឡើយ។

ឯកឧត្ដម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម។

មិនតែប៉ុណ្ណោះ នៅឆ្នាំនេះកសិករបាននាំគ្នាដាំពោតច្រើនជាងឆ្នាំកន្លងទៅ ស្របពេលដែលប្រទេសជិតខាងក៏មានទិន្នផលពោតកើនឡើងដែរ ដូច្នេះ ពួកគេក៏មិនសូវបញ្ជាទិញពោតពីកម្ពុជាច្រើនដូចមុនៗនោះឡើយ។

យ៉ាងណាក៏ដោយ ឯកឧត្ដមរដ្ឋមន្ត្រីបាននិងកំពុងសិក្សាលើដំណោះស្រាយមួយចំនួនជាមួយក្រសួងពាក់ព័ន្ធដើម្បីធ្វើយ៉ាងណា បង្កើតឲ្យមានហេដ្ឋារចនាសម្ព័ន្ធសម្រាប់ផលិតកម្មពោតរបស់កម្ពុជា ដូចជា ការបង្កើតឲ្យមានឡសម្ងួត និងឃ្លាំងស្ដុកទុកបន្ថែមដើម្បីលក់ចេញវិញនៅពេលមានទីផ្សារឡើងវិញ។

លើសពីនេះ ឯកឧត្តមក៏នឹងស្នើទៅកាន់ក្រសួងពាក់ព័ន្ធដើម្បីធ្វើយ៉ាងណា កាត់បន្ថយការចំណាយក្រៅផ្លូវការដែលតែងតែកើតមាននាពេលកន្លងមក។ គួបផ្សំនឹងបង្កើតជាសមាគមអ្នកដាំពោតដើម្បីសម្រួលដល់ការនាំចេញ និងធ្វើឲ្យមានប្រសិទ្ធភាពជាងមុនលើការបង្កើតផលិតកម្មកសិកម្មតាមកិច្ចសន្យាដើម្បីនឹងបង្កើនទំនុកចិត្តខ្ពស់រវាងអ្នកលក់ និងអ្នកទិញជាដើម។

ឯកឧត្តមរដ្ឋមន្ត្រីបានគូសបញ្ជាក់ថា ការបង្កើតនូវហេដ្ឋារចនាសម្ព័ន្ធទាំងនេះ គឺជាចំណុចដ៏សំខាន់មួយដែលនឹងជំរុញឲ្យតម្លៃពោតអាចងើបឡើងវិញបាន។

ឯកឧត្តម កៅ ថាច អគ្គនាយកធនាគារអភិវឌ្ឍន៍ជនបទ បានលើកឡើងថា ដើម្បីឆ្លើយតបនឹងបញ្ហាពោតធ្លាក់ថ្លៃនេះ ខាងធនាគារអភិវឌ្ឍន៍ជនបទ ក៏គ្រោងនឹងយកយន្ដការដែលធ្លាប់អនុវត្តលើបញ្ហាស្រូវធ្លាក់ថ្លៃកាលពីឆ្នាំមុនមកធ្វើការដោះស្រាយ ពោលគឺនឹងប្រើប្រាស់ទុន ២៧លានដុល្លារ ដែលសល់ពីការជួយសង្គ្រោះតម្លៃស្រូវធ្លាក់ចុះកាលពីឆ្នាំមុន មកប្រើប្រាស់នៅលើបញ្ហាធ្លាក់ចុះនៃកសិផលពោតវិញ ដោយប្រើប្រាស់ជាកម្ចីសម្រាប់ទុនបង្វិល និងឥណទានវិនិយោគ ដែលមានអត្រាការប្រាក់ទាបជាងមុន គឺអាចមានចន្លោះពី ៥ ទៅ ៧% ប៉ុណ្ណោះក្នុងមួយឆ្នាំ។

លោកបានបញ្ជាក់ថា ការយកមូលនិធិសម្រាប់ដោះស្រាយបញ្ហាស្រូវមកប្រើប្រាស់លើបញ្ហាពោតធ្លាក់ថ្លៃនេះ គឺដោយសារតែកសិផលទាំងពីរនេះ មានរដូវប្រមូលផលខុសគ្នា ស្របពេលដែលកាលពីឆ្នាំមុន ក្នុងចំណោមទឹកប្រាក់ ២៧លានដុល្លារ ខាងធនាគារអភិវឌ្ឍន៍ជនបទបានប្រើប្រាស់ទុនអស់ប្រមាណតែ ៣លាន៥សែនប៉ុណ្ណោះ ខណៈដែលទុនសម្រាប់ត្រៀមប្រើប្រាស់លើបញ្ហាពោតធ្លាក់ថ្លៃនេះ អាចនឹងមានរហូតដល់ ៥០លានដុល្លារឯណោះនៅឆ្នាំនេះ។

លោក ប៉ុល គិរីសម្បត្តិ អគ្គនាយកក្រុមហ៊ុនផលិតចំណីសត្វ វីតា ហ្វីតមីល បានលើកឡើងថា គុណភាពពោតរបស់កម្ពុជាសម្រាប់យកមកផលិតជាចំណីសត្វ គឺមានគុណភាពល្អជាងពោតមកពីបណ្ដាប្រទេសនានាឯទៀត។

ប៉ុន្ដែ លោកថា បញ្ហាពោតធ្លាក់ថ្លៃនេះ គឺដោយសារតែការកែច្នៃពោតមកធ្វើជាចំណីសត្វមានការថយចុះ តួយ៉ាង លោកថា គិតត្រឹមរយៈពេល៦ខែដើមឆ្នាំនេះ រោងចក្រភាគច្រើនមានការថមថយការផលិតរបស់ខ្លួនប្រមាណ ៥០% ធៀបនឹង៦ខែមុន ឬ៦ខែឆ្នាំមុន។

លោកគូសបញ្ជាក់ថា បញ្ហាថយចុះការផលិតនេះ គឺដោយសារតែការផលិតចំណីសត្វភាគច្រើនសម្រាប់តែផ្គត់ផ្គង់ក្នុងស្រុកប៉ុណ្ណោះ ប៉ុន្ដែ ងាកមកទីផ្សារក្នុងស្រុកបែរជាបាត់បង់អ្នកចិញ្ចឹមសត្វជាក់ស្ដែងការចិញ្ចឹមជ្រូក សឹងតែលែងមានអ្នកចិញ្ចឹមទៅហើយ។ យ៉ាងណាក៏ដោយ លោកថា រដ្ឋាភិបាលគួរណាស់តែរឹតត្បិតការនាំចូលសត្វរស់ ឬសាច់សត្វមកពីប្រទេសជិតខាង ដើម្បីធ្វើឲ្យអ្នកចិញ្ចឹមក្នុងស្រុកមានទឹកចិត្តឡើងវិញ ហើយនេះក៏នឹងនាំឲ្យកសិផលនានាមានតម្រូវការទីផ្សារឡើងវិញផងដែរ។

លោក យ៉ង់ ប៉ាក់ អ្នកតាមដានសង្គម និងសេដ្ឋកិច្ចនៅកម្ពុជា។

ដោយឡែក លោក យ៉ង់ ប៉ាក់ ជាអ្នកតាមដានសង្គមនិងសេដ្ឋកិច្ចមួយ ដែលមានបទពិសោធន៍ធ្វើការងារជាមួយវិស័យឯកជន និងអង្គការក្រៅរដ្ឋាភិបាល លើផ្នែកកសិកម្មនិងសេដ្ឋកិច្ច បានផ្ដល់យោបល់ពីរចំណុចជុំវិញដំណោះស្រាយរឿងពោតធ្លាក់ថ្លៃ។

ទីមួយ លោកថា កម្ពុជាត្រូវត្រៀមលក្ខណៈបច្ចេកទេសទីផ្សារសម្រាប់កសិករទុកជាមុន។ ឧ. ត្រូវដឹងថា ខែណាប្រមូលផលអ្វី ចំនួនប៉ុន្មាន ហើយឲ្យមានទីផ្សារចាំទទួលទុក។ ទីពីរ ជាលក្ខណៈយូរអង្វែង គឺថា ត្រូវធ្វើជាកុងត្រាកសិកម្ម គឺទាំងអ្នកផលិត ទាំងអ្នកទិញ ត្រូវដឹងពីគ្នាទៅវិញទៅមក។ ឧ. ក្រុមហ៊ុនផលិតចំណីសត្វត្រូវប្រាប់ពីចំនួននៃតម្រូវការពោតដែលគេត្រូវការដើម្បីយកទៅផលិតចំណីសត្វ ដល់កសិករ។ កសិករដឹងហើយ ត្រូវផលិតឲ្យត្រូវទៅតាមចំនួនតម្រូវការដែលបានកុងត្រាជាមួយគេ។

សូមបញ្ជាក់ថា រោងចក្រផលិតចំណីសត្វធំៗនៅកម្ពុជាមានប្រមាណ ១៥ក្រុមហ៊ុន ដែលមានសមត្ថភាពផលិតចំណីសត្វបានយ៉ាងច្រើនក្នុងមួយឆ្នាំៗ។ សូមបញ្ជាក់ដែរថា ការនាំចេញពោតកាលពីឆ្នាំ២០១៦ មានប្រមាណជាង ១០ម៉ឺនតោន ស្មើនឹងទឹកប្រាក់ជាង ១៤លានដុល្លារ ខណៈដែលទិន្នផលពោតទូទាំងប្រទេសនៅឆ្នាំនេះ ត្រូវបានប៉ាន់ប្រមាណថា នឹងមានរហូតដល់ជាង១លានតោន៕