អ្វីដែលគួរឲ្យចាប់អារម្មណ៍ខ្លាំងជាងគេ ក្នុងចំណោមអគារខ្ពស់ៗទាំង ៦៨៥អគារ គេសង្កេតឃើញមានអគារ Gold Tower ៤២ជាន់ គឺជាអគារដែលបានសាងសង់យូរជាងគេបង្អស់នៅកម្ពុជា និងអាចនិយាយបានថា ជាប់កំណត់ត្រាប្រវត្តិសាស្ត្រនៅក្នុងវិស័យសំណង់កម្ពុជា។
គម្រោងនេះត្រូវបានមជ្ឈដ្ឋានជាតិនិងអន្តរជាតិនានា កំពុងទន្ទឹងរង់ចាំមើលការត្រឡប់មកវិញនៃម្ចាស់គម្រោងដើម្បីបញ្ចប់មន្ទិលសង្ស័យ ប៉ុន្តែ ត្រូវបានម្ចាស់គម្រោងពន្យារពេលសាងសង់ម្តងហើយម្តងទៀត ថានឹងសាងសង់ឡើងវិញ ចុងឆ្នាំនេះ ដើមឆ្នាំនេះ ឬពាក់កណ្តាលឆ្នាំនេះ ឆ្នាំនោះ បើរាប់ទៅមិនតិចជាង១០ដងនោះឡើយ។
គិតមកដល់ពេលនេះ រយៈពេលជិត១០ឆ្នាំហើយ បន្ទាប់ពីអគារនេះបានចាប់ផ្តើមដំណើរការសាងសង់ក្នុងឆ្នាំ២០០៨ ហើយក៏ផ្អាកសាងសង់ទៅវិញក្នុងឆ្នាំ២០០៩ ដោយសារតែជួបវិបត្តិហិរញ្ញវត្ថុពិភពលោក ដែលបានធ្វើឲ្យរង្គោះរង្គើដល់ហិរញ្ញវត្ថុរបស់ក្រុមហ៊ុន ជាហេតុបណ្តាលឲ្យប៉ះពាល់ដល់អគារនេះដែរ។
អគារនេះសាងសង់បានត្រឹមជាន់ទី៣២។ បច្ចុប្បន្ន អគារភ្លោះ Gold Tower ៤២ជាន់ ស្ទើរតែក្លាយជាខ្មោចអគារទៅហើយ និងជានិមិត្តរូបមិនល្អមួយនៃការអភិវឌ្ឍវិស័យសំណង់នៅកម្ពុជា។ អគារ Gold Tower ៤២ជាន់ ស្ថិតនៅចំណុចប្រសព្វរវាងមហាវិថីព្រះមុនីវង្ស និងមហាវិថីព្រះសីហនុ ដែលកាលពីអំឡុងឆ្នាំ២០០៨ គឺជាគម្រោងអគារខ្ពស់ជាងគេមួយក្នុងចំណោមអគារខ្ពស់ៗនៅក្នុងទីក្រុង។ អគារមជ្ឈមណ្ឌលពាណិជ្ជកម្មកម្ពស់ ៤២ជាន់នេះ វិនិយោគដោយក្រុមហ៊ុន Yon Woo Cambodia ដែលមានតម្លៃទុនវិនិយោគសាងសង់ប្រមាណ ២៤០លានដុល្លារ ដែលគ្រោងនឹងត្រូវបញ្ចប់ការសាងសង់ក្នុងឆ្នាំ២០១៨។ នេះបើយោងតាមការបញ្ជាក់របស់គម្រោងប្លង់មេដើម។
បើតាមការឲ្យដឹងពីមន្ត្រីក្រសួងរៀបចំដែនដី ក្រុមហ៊ុនកូរ៉េខាងត្បូងដែលជាអ្នកវិនិយោគអគារមជ្ឈមណ្ឌលពាណិជ្ជកម្មភ្លោះ Gold Tower ៤២ជាន់នេះ បានដាក់ពាក្យស្នើសុំដើម្បីបន្តការសាងសង់ឡើងវិញ មកក្រសួងរៀបចំដែនដី នគរូបនីយកម្ម និងសំណង់ ជាច្រើនដងមកហើយ ប៉ុន្តែ នៅតែមិនទាន់មានសញ្ញាណាមួយចាប់ផ្តើមដំណើរការសាងសង់ឡើងវិញនៅឡើយ ខណៈដែលការដោះស្រាយបញ្ហាផ្ទៃក្នុងរបស់ក្រុមហ៊ុនអភិវឌ្ឍន៍គម្រោងនេះ នៅមិនទាន់ត្រូវបានដោះស្រាយរួចរាល់ស្រេចបាច់នៅឡើយនោះ។
បើតាមមន្ត្រីក្រសួងរៀបចំដែនដី ក្រុមហ៊ុននេះធ្លាប់អះអាងថា ចាប់ផ្តើមធ្វើការសាងសង់ឡើងវិញនៅក្នុងខែកុម្ភៈ ឆ្នាំ២០១៦ ប៉ុន្តែ គម្រោងនេះនឹងត្រូវពន្យារពេលសាងសង់ឡើងវិញ រហូតដល់ខែមិថុនា ឆ្នាំ២០១៦ រហូតមកដល់ពេលនេះ នៅតែពន្យារពេលដដែល មិនដឹងពីពេលវេលាកំណត់ច្បាស់លាស់ឡើយ។
របាយការណ៍ពីក្រសួងរៀបចំដែនដី នគរូបនីយកម្ម និងសំណង់ បង្ហាញថា នៅក្នុងឆ្នាំ២០១៦ ទុនវិនិយោគលើវិស័យសំណង់នៅកម្ពុជា មានចំនួនជាង ៨ពាន់ ៥០០លានដុល្លារអាមេរិក។ តួលេខនេះកើនឡើង ១៥៥% បើធៀបនឹងឆ្នាំ២០១៥៕
