មន្ត្រីជាន់ខ្ពស់ក្រសួងកសិកម្មអះអាងថា បញ្ហាដឹកជញ្ជូនឡើងថ្លៃ និងខ្វះខាតទូកុងតឺន័រនេះ មិនមែនកើតមានតែនៅកម្ពុជានោះទេ គឺ បាននឹងកំពុងកើតមាននៅទូទាំងសកលលោក។ យ៉ាងណាក៏ដោយចុះ ក្រសួងកសិកម្មបានលើកទឹកចិត្តដល់ក្រុមហ៊ុននាំចេញស្វាយត្រូវបន្តខិតខំលើការងារផលិតកម្មបន្ថែមទៀត ពិសេសការអនុវត្តនីតិវិធីភូតគាមអនាម័យ ដែលជាគោលការណ៍គ្រឹះ សម្រាប់នាំចេញទៅទីផ្សារក្រៅប្រទេស។
នៅក្នុងជំនួបជាមួយនឹងឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១២ ខែឧសភា នាយកចាត់ការទូទៅរបស់ក្រុមហ៊ុន ហ្គ្រីន ស៊ី អេហ្គ្រីខលឆ័រ លោក Jacky បានលើកឡើងពីក្ដីបារម្ភថា បច្ចុប្បន្នការដឹកជញ្ជូន គឺជាបញ្ហាចម្បងសម្រាប់ក្រុមហ៊ុនក្នុងការនាំចេញស្វាយទៅកាន់ទីផ្សារប្រទេសចិន។ ទោះយ៉ាងណា លោកថា ក្រុមហ៊ុនរបស់លោកនឹងរៀបចំមធ្យោបាយដឹកជញ្ជូនឡើងវិញ រួមទាំងទូត្រជាក់ ដើម្បីកាត់បន្ថយថ្លៃដើម។
ដោយឡែក ការងារបច្ចេកទេស ក្រុមហ៊ុនបានដាក់ពាក្យចុះបញ្ជីចម្ការស្វាយនៅអគ្គនាយកដ្ឋានកសិកម្មរួចហើយ ខណៈអគ្គនាយកដ្ឋានកសិកម្ម ក៏បានបញ្ជូនមន្រ្តីជំនាញចុះមកណែនាំអំពី បច្ចេកទេសដាំ ប្រមូលផល វេចខ្ចប់ និងជាពិសេសលក្ខខណ្ឌតម្រូវនៃភូតគាមអនាម័យជាទូទៅផងដែរ។
អត្ថបទគួរអាន
ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកទឹកចិត្តដល់ក្រុមហ៊ុនឲ្យបន្តខិតខំលើការងារផលិតកម្មបន្ថែមទៀត ពិសេសការអនុវត្តនីតិវិធីភូតគាមអនាម័យដែលជាគោលការណ៍គ្រឹះ សម្រាប់នាំចេញ បើទោះសកម្មភាពនៃការនាំចេញបាននិងកំពុងតែប្រឈម ហើយនេះមិនមែនតែប្រទេសកម្ពុជាទេ តែជាបញ្ហាសកលដែលមិនអាចចៀសវាងបាន។ មួយវិញទៀត ក្រុមហ៊ុនក៏ត្រូវសហការជាមួយអគ្គនាយកដ្ឋានកសិកម្ម និងមន្ទីរកសិកម្ម រុក្ខាប្រមាញ់ និងនេសាទខេត្ត ធ្វើយ៉ាងណាឲ្យកិច្ចដំណើរការនៃការវិនិយោគនេះប្រព្រត្តិទៅដោយរលូន និងទទួលបានជោគជ័យ។
សូមបញ្ជាក់ថា តាមការអះអាងរបស់លោក Jack នាយកចាត់ការទូទៅរបស់ក្រុមហ៊ុន ហ្គ្រីន ស៊ី អេហ្គ្រីខលឆ័រ ក្រុមហ៊ុននេះបានចំណាយលើការវិនិយោគដំណាំស្វាយនៅកម្ពុជាអស់៧០លានដុល្លារហើយ ដោយក្នុងនោះ បច្ចុប្បន្នក្រុមហ៊ុនមានការដាំដុះស្វាយ មានពូជពីតៃវ៉ាន់ អាមេរិក និងអូស្ត្រាលី នៅលើផ្ទៃដីជាង១ពាន់២រយហិកតា ក្នុងចំណោមផ្ទៃដីសរុបជិត១ម៉ឺនហិកតា ដែលមានទីតាំងស្ថិតនៅឃុំ អូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង៕
អត្ថបទ សោម ស្រីពេជ្រ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
