ADB បានទាញទម្លាក់សេដ្ឋកិច្ចតំបន់អាស៊ីពីការព្យាករក្នុងខែមេសាដែលមានអត្រា ៥,២% មកនៅត្រឹម៤,៦%ប៉ុណ្ណោះក្នុងខែកក្កដានេះ។ ដោយឡែកសម្រាប់ឆ្នាំ២០២៣ ADB ព្យាករណ៍ថា សេដ្ឋកិច្ចតំបន់មួយនេះនឹងមានកំណើន ៥,២%វិញ ពោលគឺធ្លាក់ចុះ 0,១% ពីការព្យាករណ៍លើកមុន ដែលថានឹងមានកំណើនដល់ ៥,៣%។
ធនាគារអភិវឌ្ឍន៍អាស៊ីបានឱ្យដឹងទៀតថា ខណៈពេលដែលការរាតត្បាតនៃមេរោគឆ្លងបានធូរស្រាលបន្តិចក្ដី ប៉ុន្ដែការធ្លាក់ចុះនៃកំណើនសេដ្ឋកិច្ចតំបន់នៅតែមាន ដោយសារការលុកលុយរបស់រុស្សីទៅលើអ៊ុយក្រែន។
សង្គ្រាមបានបង្អាក់ដល់ខ្សែចង្វាក់ផ្គត់ផ្គង់ និងខណៈការដាក់ទណ្ឌកម្មលើប្រទេសរុស្ស៊ីបាននាំឱ្យមានការកើនឡើងនៃតម្លៃទំនិញជាសកល។ ក្រោយមើលឃើញពីភាពរអាក់រអួលទាំងនេះ ADB រំពឹងអត្រាអតិផរណានៅក្នុងតំបន់អាស៊ីថា នឹងកើនឡើងដល់ ៤,២%ឯណោះ ក្នុងឆ្នាំ២០២២នេះ ពោលគឺបានកើនឡើងពីការព្យាករណ៍ ៣,៧% កាលពីខែមេសា។ យ៉ាងណាមិញអតិផរណានៅឆ្នាំក្រោយត្រូវបានគេរំពឹងថា នឹងធ្លាក់ចុះមកនៅត្រឹម៣,៥%។ ប៉ុន្ដែ ចំនួននេះ នៅតែជាអត្រាមួយខ្ពស់ បើធៀបនឹងការព្យាការកាលពីខែមេសា ដែលថា អតិផរណានឹងធ្លាក់ចុះដល់ ៣.១%នៅឆ្នាំ២០២៣។
អត្ថបទគួរអាន
ជាមួយគ្នានេះ សេដ្ឋកិច្ចមហាយក្សចិនដែលកំពុងតែមានការកើនឡើងយឺត ក៏បានជះឥទ្ធិពលដល់សេដ្ឋកិច្ចតំបន់អាស៊ីផងដែរ។ នៅចុងក្រោយនេះ ADBព្យាករថា សេដ្ឋកិច្ចចិន ត្រូវបានគេរំពឹងថា នឹងកើនឡើង ៤%នៅឆ្នាំនេះ ជំនួសឱ្យអត្រា ៥%ដែលធ្លាប់បានព្យាករពីមុន។ សេដ្ឋកិច្ចចិនកើនយឺត ក៏ដោយសារតែប្រទេសចិនបានជាប់គាំងនៅក្នុងគោលនយោបាយកូវីដ១៩ស្មើសូន្យ រួមមានការអនុវត្តវិធានការណ៍ទប់ស្កាត់ទ្រង់ទ្រាយធំម្តងហើយម្តងទៀត ពិសេសគឺការបិទខ្ទប់ ដើម្បីប្រយុទ្ធប្រឆាំងនឹងការផ្ទុះឡើងនៃមេរោគកូវីដ១៩ប្រភេទ។
សូមជម្រាបថា ទោះបីជា សេដ្ឋកិច្ចនៅក្នុងតំបន់អាស៊ីទាំងមូលប្រឈមនឹងមានការកំណើនថមថយចុះក្ដី ប៉ុន្ដែ សម្រាប់កំណើនសេដ្ឋកិច្ចនៅក្នុងតំបន់អាស៊ីអាគ្នេយ៍របស់យើងវិញ ត្រូវបាន ADB រំពឹងថានឹងមានភាពប្រសើរឡើងបន្តិច។ GDP នៅអាស៊ីអាគ្នេយ៍នឹងកើនឡើងដល់៥% ពោលគឺកើន ០,១% ពីអត្រាដែលបានព្យាករពីខែមេសាដែលថា មាន ៤.៩%៕
