ទេសាភិបាលធនាគារកណ្តាលអាហ្វហ្កានីស្ថានរត់គេចចេញពីប្រទេសបាត់ស្រមោល បន្សល់បញ្ហារូបិយបណ្ណធ្លាក់ចុះ

ប្រាក់ «អាហ្វហ្គានី» ដែលជារូបបិយបណ្ណផ្លូវការរបស់ប្រទេសអាហ្វហ្គានីស្ថាន បានដាំក្បាលចុះក្នុងអត្រាដល់ទៅជិត ២% កាលពីថ្ងៃអង្គារទី១៧ សីហាម្សិលមិញ។ តម្លៃប្រាក់ «អាហ្វហ្គានី» បានបន្តធ្លាក់ចុះ៤ថ្ងៃជាប់គ្នាៗ ចាប់តាំងពីក្រុមតាលីបង់វាយសម្រុកជិតដល់ក្រុងកាប៊ុល និងរហូតដល់ពេលដែលពួកគេកាន់កាប់បានរដ្ឋធានីមួយនេះទាំងស្រុង។

បើតាមទិន្នន័យដែលរៀបរាងឡើងដោយ Bloomberg ប្រាក់ ៨៣អាហ្វហ្គានី ប្តូរបានប្រាក់មួយដុល្លារអាមេរិក ខណៈនៅមុនពេលមានភាពច្របូកច្របល់ ប្រាក់៨០អាហ្វហ្គានី ប្តូរបាន១ដុល្លារអាមេរិក។

គួររំឭកថា កាលថ្ងៃសុក្រសប្តាហ៍មុន ទេសាភិបាលធនាគារកណ្តាលរបស់អាហ្វហ្គានីស្ថាន លោក លោក អាម៉ាឌី បានសរសេរនៅលើបណ្តាញ Twitter របស់ខ្លួនឲ្យដឹងថា នឹងមិនមានការបញ្ចេញប្រាក់ដុល្លារមកក្នុងចរន្តសាច់ប្រាក់ទៀតនោះទេ ហើយធនាគារនឹងកាត់បន្ថយការផ្គត់ផ្គង់រូបិយបណ្ណបន្ថែមផងដែរ។ ប្រការនេះ ធ្វើឲ្យពលរដ្ឋមានការព្រួយបារម្ភ និងស្លន់ស្លោរ សម្រុកនាំគ្នាទៅដកប្រាក់តាមម៉ាស៊ីនអេធីអឹមយ៉ាងច្រើនកកកុញ។

ក្នុងសំណេរលើបណ្តាញ Twitter ដដែលលោក អាម៉ាឌី បានបន្តថា រដ្ឋាភិបាលអាហ្វហ្គានីស្ថានមិនមានផែនការជម្លៀសមន្ត្រីរបស់ខ្លួនចេញពីប្រទេសនោះទេ ហើយការចាកចេញរបស់ប្រធានាធិបតីលោក អាសាហ្វ ហ្គានី ដោយមិនបានបង្កើតរដ្ឋាភិបាលអន្តរកាលមួយ ក៏បានរួមចំណែកដល់ភាពវឹកវរក្នុងសង្គម និងហិរញ្ញវត្ថុរបស់ប្រទេសផងដែរ។

គួរជម្រាបថា ទេសាភិបាលធនាគារកណ្តាលអាហ្វហ្កានីស្ថានលោក អាម៉ាឌី បានរត់ចេញពីប្រទេសតាមរយៈយន្តហោះយោធា នៅព្រលានយន្តហោះក្រុងកាប៊ុល ក្នុងថ្ងៃតែមួយដែលប្រធានាធិបតី និងមេដឹកនាំអាហ្វហ្គានីស្ថានឯទៀតបានចាកចេញដូចគ្នា៕