ក្រុមហ៊ុនផលិតជីដ៏ធំបំផុតមួយរបស់រៀតណាម គឺក្រុមហ៊ុន Vinachem ដែលគ្រប់គ្រងដោយរដ្ឋបានបង្ហាញពីប្រាក់ចំណេញកើនឡើង ៣១ ដង ដល់ទៅជាង ១៧៥ លានដុល្លារអាមេរិក ខណៈប្រាក់ចំណូលកើនឡើង ២៦ % ដល់ទៅជាង ១ពាន់៤ រយលានដុល្លារ។ ទន្ទឹមនឹងនោះ ក្រុមហ៊ុនបុត្រសម្ព័ន្ធរបស់ក្រុមហ៊ុន Vinachem ដូចជាក្រុមហ៊ុន Vietnam Apatite ក្រុមហ៊ុន Southern Fertilizer JSC និងក្រុមហ៊ុន DAP-Vinachem ក៏បានរាយការណ៍ថា ប្រាក់ចំណេញបានកើនឡើងដល់អត្រាជាងបីខ្ទង់ចន្លោះពីជាង ២០០ ទៅ៤០០ភាគរយផងដែរ។
ក្រុមហ៊ុនជីឯកជនវៀតណាម Duc Giang Chemicals ដែលជាក្រុមហ៊ុននាំមុខគេបាននិយាយថា ប្រាក់ចំណេញរបស់ខ្លួនបានកើនឡើងជិត ៦ ដង ដល់ទៅជាង ១ រយលានដុល្លារ ពោល គឺមានខ្ពស់ជាងគោលដៅប្រចាំឆ្នាំដល់ទៅ៤ដងឯណោះ។
អត្ថបទគួរអាន
មែនទែនទៅ កំណើននៃប្រាក់ចំណេញ ដែលបានកើនឡើងនៅក្នុងក្រុមហ៊ុនជីវៀតណាមទាំងអស់នេះ ត្រូវបានជំរុញដោយតម្រូវការកាន់តែខ្ពស់ពីទីផ្សារក្នុងស្រុក និង អន្តរជាតិ ខណៈដែលតម្លៃឡើងថ្លៃទូទាំងសកល។ ប៉ុន្តែ បើតាមក្រុមហ៊ុន VnDirect ដែលជាឈ្មួញកណ្ដាល បានព្យាករ តម្លៃជីនឹងធ្លាក់ចុះនៅឆ្នាំក្រោយ ដោយសារប្រទេសចិនបង្កើនទិន្នផល ហើយតម្លៃនៅអាមេរិកខាងជើងបាន និងកំពុងធ្លាក់ចុះរួចទៅហើយ។
គួរជម្រាបថា ការនាំចេញជីក្នុងប្រទេសវៀតណាមបានកើនឡើងដល់ជិត ១ លានតោន កើនឡើង៤៥% និងមានតម្លៃជាទឹកប្រាក់ ៦៤៧ លានដុល្លារ កើនឡើងជិត៣ដង បើធៀបកាលពីឆ្នាំមុន ការនាំចេញក្នុងតម្លៃ ៥៥៩ លានដុល្លារ។
សូមបញ្ជាក់ថា ទន្ទឹមនឹងមានការផលិតជីផ្គត់ផ្គង់ក្នុងស្រុក និងនាំចេញទៅក្រៅប្រទេស វៀតណាមក៏មានការនាំចូលជីពីក្រៅប្រទេសផងដែរ ដូចជានាំនាំចូលចិន និងរុស្ស៊ី។ យ៉ាងណាមិញ នៅអំឡុងពេលនៃវិបត្តិសង្គ្រាមនៅអ៊យក្រែន វៀតណាម មានការនាំចូលជីពីរុស្ស៊ីកើនឡើងខ្ពស់គួរឲ្យកត់សម្គាល់ ពោលគឺ នៅរយៈពេល៥ខែ ដំបូងនៅឆ្នាំនេះ វៀតណាមនាំចូលជីពីរុស្ស៊ីក្នុងតម្លៃជិត៨៧លានដុល្លារ កើនឡើង៦០% បើធៀបនឹងរយៈពេលដូចគ្នាកាលពីឆ្នាំមុន៕
