នៅលើទំព័រហ្វេសប៊ុក លោកឧកញ៉ា ម៉ុង ឫទ្ធី បានសរសេរថា ខណៈដែលឆ្នាំនេះ ដំណាំកៅស៊ូលូតលាស់បានល្អជាងឆ្នាំមុន រោងចក្របានជួសជុលនិងចាប់ផ្ដើមដំណើរការផលិតបាន ២តោន ក្នុងមួយម៉ោង បូករួមនឹងការអនុគ្រោះពន្ធនាំចេញពីរដ្ឋាភិបាល បែរជាខ្វះកម្លាំងពលកម្មប្រមូលផល និងទីផ្សារត្រូវបាត់បង់ដោយសារវីរុសកូវីដ១៩ទៅវិញ។
លោកឧកញ៉ា ម៉ុង ឫទ្ធី ថ្លែងតាមរយៈសំណេរលើហ្វេសប៊ុក ដូច្នេះថា "ជាអកុសល ខ្វះខាតកម្លាំងពលកម្មប្រមូលផលចំការកៅស៊ូសរុបចំនួន 2.500[ហិកតា] មានកម្លាំងប្រមូលផលបានតែចំនួន 700[ហិកតា] តែប៉ុណ្ណោះ វាស៊យកាន់តែធ្ងន់ធ្ងរមួយទៀតនោះគឺ COVID-19 បានធ្វើឲ្យបាត់បង់ទីផ្សារអស់រលីង"។
លោកឧកញ៉ា ម៉ុង ឫទ្ធី បានបន្តថា "បើផ្អាកមិនឲ្យកម្មករប្រមូលផល ពួកគាត់ត្រូវដាច់បាយ"។
អត្ថបទទាក់ទង
គិតត្រឹមថ្ងៃទី២៨ ខែមីនា ឆ្នាំ២០២០នេះ ករណីវិជ្ជមានវីរុសកូវីដ១៩ ដែលបានរកឃើញទាំងអស់នៅទូទាំងប្រទេស មានចំនួន ១០២នាក់ ក្នុងនេះ ស្រី ២៧នាក់ និងប្រុស ៧៥នាក់។ ករណីព្យាបាលជាសះស្បើយ មានចំនួន ១៣នាក់ ក្នុងនោះរួមមាន បុរសជនជាតិខ្មែរ ១១នាក់ បុរសជនជាតិចិន ០១នាក់ និងស្ត្រីជនជាតិអង់គ្លេស ០១នាក់។
ជុំវិញបញ្ហាផលប៉ះពាល់នៃវីរុសកូវីដ១៩ មកលើវិស័យកសិកម្ម លោក ប៉ាក់ យ៉ង់ នាយកប្រតិបត្តិក្រុមហ៊ុន Agribeeជាក្រុមហ៊ុន ដែលធ្វើការងារលើការគ្រប់គ្រងខ្សែសង្វាក់ផលិតកម្មកសិកម្មនៅកម្ពុជា បានប្រាប់ ខេមបូណូមីស ថា វិស័យកសិកម្មដែលមិនពាក់ព័ន្ធនឹងចំណីអាហារ គឺរងផលប៉ះពាល់ ដូចគ្នានឹងវិស័យផ្សេងៗដែរ ពីព្រោះក្នុងស្ថានភាពបែបនេះ អ្វីដែលមនុស្សត្រូវការចាំបាច់ គឺចំណីអាហារ។
លោក ប៉ាក់ យ៉ង់ ថ្លែងបន្តយ៉ាងដូច្នេះ ថា "វិស័យកសិកម្មដូចជា កៅស៊ូ ច្បាស់ជាប៉ះពាល់ហើយ។ ព្រោះក្នុងកាលៈទេសៈបែបនេះ មនុស្សមិនទិញកៅស៊ូទុកទេ គឺទិញអង្ករទុកបរិភោគ។"
កន្លងមក ប្រមុខរាជរដ្ឋាភិបាលបានប្រកាសថា កម្ពុជាបានត្រៀមថវិកាជាតិប្រមាណពី ៨០០ ទៅ ២០០០លានដុល្លារ ដើម្បីទប់ទល់នឹងផលប៉ះពាល់របស់ការឆ្លងរាតត្បាតនៃវីរុសកូវីដ១៩ មកលើសេដ្ឋកិច្ចរបស់ប្រទេសកម្ពុជា៕
