ក្រុមហ៊ុនពាណិជ្ជកម្មអេឡិចត្រូនិកចិន អាលីបាបា នឹងបោះផ្សាយលក់ភាគហ៊ុនថ្មី ក្នុងចំនួន ១២លាន ៥សែនហ៊ុន ដែលតម្លៃក្នុងមួយហ៊ុន មិនលើសពី ១៨៨ ដុល្លារហុងកុងទេ ឬស្មើនឹងប្រមាណ ២៤ ដុល្លារអាមេរិក។
ការបន្តផ្ទុះបាតុកម្មតវ៉ា នៅក្នុងទីក្រុងហុងកុងនាពេលថ្មីៗ ត្រូវបានគេមើលឃើញថា អាចនឹងធ្វើឲ្យទស្សនវិស័យសេដ្ឋកិច្ចរបស់ហុងកុងអាចនឹងមានការផ្លាស់ប្ដូរ ប៉ុន្ដែ សម្រាប់ទីផ្សារភាគហ៊ុន គឺនៅតែមានភាពរឹងមាំ។យ៉ាងណាមិញ ការសម្រេចចិត្ត ចុះបញ្ចីនៅផ្សារហ៊ុនហុងកុង របស់អាលីបាបា បានធ្វើឲ្យទីផ្សារហ៊ុនបង្ហាញពីសន្ទុះងើបឡើងខ្លាំង ។
អត្ថបទទាក់ទង!
លោក Ronald Wan នាយកប្រតិបត្តិ ក្រុមហ៊ុន Partners Capital International បានលើកឡើងថា «យើងកំពុងទាក់ទាញវិនិយោគិនជាជនជាតិចិន និងវិនិយោគិននៅតំបន់អាស៊ី ដូច្នេះ ហុងកុង គ្រាន់តែកន្លែងPlatformមួយ វាគ្មានបញ្ហាអ្វីនោះទេ ទោះបីជាក្នុងស្ថានការណ៍ណាក៏ដោយ។» លោក Ronald Wan គូសបញ្ជាក់ទៀថា ផ្សារហ៊ុនហុងកុង នឹងមិនរងផលប៉ះពាល់ ដោយសារតែស្ថានភាពនាពេលថ្មីៗនេះនោះទេ។
គួរបញ្ជាក់ថា ក្រុមហ៊ុនពាណិជ្ជកម្មអេឡិចត្រូនិក អាលីបាបា ធ្លាប់បានចុះផ្សារហ៊ុនម្ដងរួចហើយ នៅផ្សារហ៊ុនក្នុងទីក្រុងញ៉ូយ័ក សហរដ្ឋអាមេរិក កាលពី៥ឆ្នាំមុន។ ជាមួយនឹងភាពមិនច្បាស់លាស់ជុំវិញទំនាក់ទំនងចិន និងអាមេរិក ក្រុមហ៊ុនយក្សរបស់ចិនមួយនេះត្រូវបានលើកទឹកចិត្ត ឲ្យស្វែងរកមធ្យោបាយដើម្បីបង្កាការពារទុកមុន។
លោក Wan បានគូសបញ្ជាក់ទៀតថា ពិសេស នៅក្នុងទំនាក់ទំនងរវាងចិន និងអាមេរិក មិនទាន់មានស្ថិរភាព នៅក្នុងប៉ុន្មានខែ ឬឆ្នាំកន្លងមក ដូច្នេះ និយាយក្នុងនាមជាយុទ្ធសាស្ត្ររបស់អាលីបាបា លោកជឿជាក់ថា ក្រុមហ៊ុននេះ ត្រូវការធ្វើពិពិធកម្ម ហើយការធ្វើពិពិធកម្មនាពេលនេះ វានឹងធ្វើឲ្យក្រុមហ៊ុនទទួលបានមូលនិធិកាន់តែទូលំទូលាយ។
ក្រុមហ៊ុនអាលីបាបា បានឲ្យដឹងដែរថា ភាគហ៊ុន នៅលើផ្សារហ៊ុនក្រុងញ៉ូយ័ក និងផ្សារហ៊ុនហុងកុង គឺអាចផ្លាស់ប្តូរគ្នាបាន ហើយជាមួយនឹងលទ្ធភាព គម្រោងដាក់បញ្ចូល រវាងទីផ្សារចិនដីគោក និងហុងកុង នាពេលអនាគត នោះភាគហ៊ុនអាលីបាបា អាចនឹងទទួលបានវិនិយោគិនធំៗកាន់តែច្រើនឡើងផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
