ក្នុងកិច្ចព្រមព្រៀងនោះ សម្រាប់ឆ្នាំទី១ សហរដ្ឋអាមេរិក នឹងហិរញ្ញប្បទានប្រមាណជិត ៤២ លានដុល្លារ នឹងផ្ដល់ជូនសម្រាប់វិស័យសុខាភិបាល និងអប់រំ និង ជាង ២០លានដុល្លារទៀត ផ្ដល់សម្រាប់វិស័យកសិកម្ម និងបរិស្ថាន ដែលអនុវត្តដោយភ្នាក់ងារអនុវត្តគម្រោងនានានៅកម្ពុជា។ នេះបើយោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា។
តាមរយៈកិច្ចព្រមព្រៀងស្តីពីកិច្ចសហប្រតិបត្តិការអភិវឌ្ឍន៍ (DOAG) ដែលទើបតែចុះហត្ថលេខានេះ មានហិរញ្ញប្បទានសរុបប្រមាណ ៣៣៨ លានដុល្លារអាមេរិក នឹងគ្រោងផ្តល់ដោយរដ្ឋាភិបាលសហរដ្ឋអាមេរិកសម្រាប់រយៈពេល ៥ឆ្នាំ ចាប់ពីឆ្នាំ២០២១-២០២៥ ដើម្បីជំរុញកំណើនសេដ្ឋកិច្ចប្រកបដោយបរិយាប័ន្ន និងចីរភាព តាមរយៈការអនុវត្តគម្រោងក្នុងវិស័យកសិកម្ម និងបរិស្ថាន ព្រមទាំងការពង្រឹងសេវាសុខភាព អប់រំនិងគាំពារកុមារផងដែរ។
អត្ថបទគួរអាន
គិតចាប់តាំងពីឆ្នាំ១៩៩២ រហូតដល់ឆ្នាំ២០២១ រដ្ឋាភិបាលសហរដ្ឋអាមេរិកបានផ្តល់ហិរញ្ញប្បទានការគាំទ្រដល់ប្រទេសកម្ពុជាប្រមាណ ១ពាន់៧រយលានដុល្លារ សម្រាប់គាំទ្រដល់វិស័យអាទិភាពដូចជា វិស័យសុខាភិបាល អប់រំ បរិស្ថាន កសិកម្ម អភិបាលកិច្ច ការអភិវឌ្ឍបែបប្រជាធិបតេយ្យ និងកម្មវិធីដោះមីននិងយុទ្ធភ័ណ្ឌមិនទាន់ផ្ទុះ ដែលឆ្លើយតបទៅនឹងអាទិភាពរបស់រាជរដ្ឋាភិបាលកម្ពុជា ដូចមានចែងក្នុងយុទ្ធសាស្ត្រចតុកោណដំណាក់កាលទី៤ និងផែនការយុទ្ធសាស្រ្តអភិវឌ្ឍន៍ជាតិ ២០១៩-២០២៣។
សូមបញ្ជាក់ថា អាមេរិកមិនត្រឹមតែស្ថិតនៅក្នុងចំណោមប្រទេសម្ចាស់ជំនួយដ៏សំខាន់មួយសម្រាប់កម្ពុជាប៉ុណ្ណោះទេ ប៉ុន្ដែ អាមេរិក ក៏ជាទីផ្សារនាំចេញទំនិញដ៏ធំមួយរបស់កម្ពុជាផងដែរ។ ជាក់ស្ដែង នៅរយៈពេល៣ខែដំបូងនៅឆ្នាំ២០២២នេះ កម្ពុជាបាននាំចេញទៅអាមេរិកមានតម្លៃជាទឹកប្រាក់ជាង២ពាន់លានដុល្លារ កើនឡើងជិត៤៤% ខណៈការនាំចូលពីអាមេរិកមកវិញមានជិត៧៧លានដុល្លារ ធ្លាក់ចុះជិត១%។ នេះបើតាមតួលេខពីអគ្គនាយកដ្ឋានគយ និងរដ្ឋាករកម្ពុជា៕
អត្ថបទ សោម ស្រីពេជ្រ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
