ឯកឧត្តម ស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលបានគូសបញ្ជាក់ថា រដ្ឋលេខាធិការអាកាសចរណ៍ស៊ីវិល បានសហការជាមួយក្រុមហ៊ុនផលិតយន្តហោះ Boeing ដើម្បីវាយតម្លៃ និងព្យាករណ៍ពីស្ថានភាពនៃការវិលត្រឡប់មករកភាពល្អប្រសើរឡើងវិញនៃការធ្វើដំណើរតាមផ្លូវអាកាសរបស់កម្ពុជា។ ក្នុងនោះក្រុមហ៊ុន Boeing បានព្យាករថា ចំនួនអ្នកដំណើរតាមផ្លូវអាកាសរបស់កម្ពុជានឹងអាចវិលមករកភាពល្អប្រសើរដូចពេលមិនទាន់មានកូវីដ-១៩ ក្នុងឆ្នាំ២០១៩ ឡើងវិញ នៅចុងឆ្នាំ២០២៣ ឬដើមឆ្នាំ២០២៤ ប្រសិនបើមិនមានហេតុការណ៍ ឬបញ្ហាសកលអ្វីមួយបានកើនឡើងបន្ថែមទៀតទេនោះ។
ការព្យាករបែបនេះរបស់ក្រុមហ៊ុន Boeing ធ្វើឡើងដោយផ្អែកលើការកំណើនជើងហោះហើរ និងចំនួនអ្នកដំណើរចូលមកកម្ពុជាតាមផ្លូវអាកាសមានកើនឡើងនៅប៉ុន្មានខែកន្លងមកនេះ។ មុនចេញលទ្ធផលព្យាករនេះ ក្រុមហ៊ុនបានសិក្សាវាយតម្លៃយ៉ាងល្អិតល្អន់លើស្ថានការណ៍ និងទិន្នន័យផ្សេងៗ ដែលបានមកការសហការរួមគ្នាជាមួយអង្គការអាកាសចរណ៍ស៊ីវិលអន្តរជាតិ(ICAO) សមាគមក្រុមហ៊ុនអាកាសចរណ៍អន្តរជាតិ(IATA), ក្រុមប្រឹក្សាអាកាសយានដ្ឋានអន្តរជាតិ និងភាគីពាក់ព័ន្ធជាច្រើនទៀត។
ជុំវិញបញ្ហានេះ លោក ធួន ស៊ីណាន ប្រធានសមាគមទីភ្នាក់ងារទេសចរណ៍អាស៊ីប៉ាស៊ីហ្វិកកម្ពុជាយល់ឃើញថា បើផ្អែកតាមស្ថានភាពបច្ចុប្បន្ន ដែលពិភពលោកកំពុងប្រឈមនឹងភាពតានតឹងភូមិសាស្ត្រនយោបាយលកស ការកើនឡើងអតិផរណានិងតម្លៃទំនិញ ការព្យាករនេះ ហាក់ដូចជាឆាប់រហ័សពេកសម្រាប់ការងើបឡើងវិញនៃវិស័យទេសចរណ៍។ អ្នកជំនាញវិស័យទេសចរណ៍រូបនេះបង្ហាញក្ដីសង្ឃឹមថា ប្រសិនបើប្រទេសចិនបើកឲ្យប្រជាជនខ្លួនធ្វើដំណើរដោយសេរីឡើងវិញ ក្រោយសមាជបក្សកុម្មុយនីយចិននៅអំឡុងខែតុលា ខាងមុខនេះ វិស័យទេសចណ៍អាចនឹងស្ទុះងើបឡើងវិញ។ ប៉ុន្តែ ប្រសិនបើចិនមិនបើកឲ្យប្រជាពលរដ្ឋធ្វើដំណើរទេ នោះលទ្ធផលអាចនឹងខុសឆ្ងាយពីការព្យាករនេះ។
អត្ថបទគួរអាន
ជាមួយគ្នានេះ លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាយល់ឃើញថា យ៉ាងហោចណាស់កម្ពុជាត្រូវការយ៉ាងតិច៣ឆ្នាំ ដើម្បីអាចស្តារស្ថានភាពវិស័យទេសចរណ៍ និងការធ្វើដំណើរតាមផ្លូវអាកាសឲ្យវិលមករកភាពល្អប្រសើរឡើងវិញ។ ការវាយតម្លៃបែបនេះ ធ្វើឡើងក្រោយអ្នកជំនាញរូបនេះមើលឃើញថា កម្ពុជា ក៏ដូចជាពិភពលោកបន្តរងការវាយលុកពីជំងឺរាតត្បាតកូវិដ-១៩ ហើយសង្គ្រាមរុស្ស៊ីវាយចូលឈ្លានពានអ៊ុយក្រែន ក៏មិនដឹងថានឹងបញ្ចប់នៅពេលណានោះដែរ។ ភាពមិនច្បាស់លាស់ទាំងនេះនៅតែជាបញ្ហាប្រឈមសម្រាប់ការស្តារវិស័យទេសចរណ៍ ក៏ដូចជាការធ្វើដំណើរតាមផ្លូវអាកាសរបស់កម្ពុជា។
បើតាមការគូសបញ្ជាក់របស់ឯកឧត្តម ស៊ីន ចាន់សិរីវុត្ថា នៅក្នុងរយៈពេល៨ខែឆ្នាំ២០២២ មានក្រុមហ៊ុនអាកាសចរណ៍ចំនួន២៥ក្រុមហ៊ុនបានដំណើរការហោះហើរឡើងវិញ ដែលជំរុញចំនួនអ្នកដំណើរចូលកម្ពុជាមានការកើនឡើងជាបន្តបន្ទាប់ពីមួយខែទៅមួយខែ។ ក្នុងនោះ កម្ពុជាទទួលបានអ្នកដំណើរជិត១លាន២សែននាក់នៅ៨ខែឆ្នាំ២០២២ កើនឡើងជិត៦០០% បើធៀបនឹងរយៈពេលដូចគ្នាកាលពីឆ្នាំមុន ប៉ុន្ដែបើធៀបនឹងរយៈពេលដូចគ្នាកាលពីឆ្នាំ២០១៩ ជាពេលមិនទាន់មានជំងឺកូវីដ-១៩រាតត្បាត ចំនួននេះបន្តធ្លាក់ចុះជាង៧២%។ ចំណែកចំនួនជើងហោះហើរ មានការកើនឡើងជាង១សែន៥ពាន់ជើងនៅក្នុងរយៈពេល៨ខែ ឆ្នាំ២០២២ មានការកើនឡើង១២៣% បើធៀបនឹងរយៈពេលដូចគ្នាកាលពីឆ្នាំ២០២១ ប៉ុន្ដែបើធៀបនឹងឆ្នាំ២០១៩ នៅបន្តធ្លាក់ចុះ៧០%នៅឡើយ៕
