នាយកដ្ឋានសុខាភិបាលសាធារណៈរបស់អាមេរិកអះអាងថា រដ្ឋាភិបាលអាមេរិកនឹងផ្តល់វ៉ាក់សាំងដូសទី៣ឬដូសជំរុញ ដល់ពលរដ្ឋណាដែលបានចាក់វ៉ាក់សាំងដូសទី២ ប្រភេទ ម៉ូឌឺណា និង ហ្វាយហ្សឺ រួច យ៉ាងហោចណាស់៨ខែ។ ប្រការនេះ បានចោទជាសំណួរឡើងដល់អ្នកដែលបានចាក់វ៉ាក់សាំង Johnson & Johnson តែមួយដូស ថាតើពួគគេត្រូវចាក់ដូសជំរុញដែរឬយ៉ាងណា?
ជាក់ស្តែង បើតាមមន្ត្រីសេតវិមានអាមេរិកបានគូសបញ្ជាក់ថា អ្នកដែលចាក់វ៉ាក់សាំង Johnson & Johnson តែមួយដូស ក៏តម្រូវឲ្យចាក់ដូសជំរុញដូចគ្នាដែរ គ្រាន់តែគេមិនទាន់បានសម្រេចពីប្រភេទវ៉ាក់សាំងដែលត្រូវប្រើសម្រាប់ដូសជំរុញនេះ។
ប្រធានាធិបតីអាមេរិកលោក ចូ បៃឌិន បានគូសបញ្ជាក់ថា ការចាក់វ៉ាក់សាំងដូសជំរុញ ជាវិធីល្អបំផុតដើម្បីការពារខ្លួន ពីការឆ្លងកូវីដ១៩បំប្លែងខ្លួនឌែលតា។ លោក ចូ បៃឌិន បានលើកឡើងថា វានឹងធ្វើឲ្យពលរដ្ឋមានសុវត្ថិភាពយូរជាងមុន និងឆាប់បានឈានទៅបិទបញ្ចប់ជំងឺរាតត្បាតនេះ បានលឿនជាងមុនផងដែរ។
បើតាមការគ្រោងទុកជំហានដំបូង រដ្ឋាភិបាលអាមេរិក គ្រោងនឹងផ្តល់វ៉ាក់សាំងដោយឥតគិតថ្លៃប្រមាណ ១០០លានដូស ដោយចែកចាយទៅកាន់តំបន់តូចធំជាង ៨ម៉ឺនកន្លែងនៅទូទាំងប្រទេសអាមេរិកតែម្តង។
អត្ថបទគួរអាន
តើអាមេរិកមើលឃើញពីភាពចាំបាច់អ្វីខ្លះ ដែលប្រញាប់ប្រញាល់ចាក់វ៉ាក់សាំងដូសទី៣ ឬដូសជំរុញដូចប្រទេសមួយចំនួនផ្សេងទៀតយ៉ាងដូច្នេះ?
បើតាមការអះអាងពីរដ្ឋាភិបាលអាមេរិក នៅក្នុងសេចក្តីប្រកាសព័ត៌មានពីការចាក់វ៉ាក់សាំងដូសជំរុញ បានបញ្ជាក់ថា មានមូលហេតុធំៗចំនួនពីរដែលជំរុញ ឲ្យសហរដ្ឋអាមេរិកចាប់ផ្តើមដំណើរការចាក់វ៉ាក់សាំងដូសទី៣ ឬដូសជំរុញទូទាំងប្រទេសនេះ។ មូលហេតុទី១ គឺការធ្លាក់ចុះប្រសិទ្ធិភាពការពាររបស់វ៉ាក់សាំងក្រោយពីចាក់បាន ៦ខែ ឬច្រើនជាងនេះ ជាពិសេសខែលការពារមេរោគកូវីដ បានធ្លាក់ចុះខ្លាំង សម្រាប់មនុស្សចាស់ដែលមានជំងឺប្រចាំកាយ។
មូលហេតុទី២ គឺការកម្រើកឡើងវិញដ៏គួរឲ្យព្រួយបារម្ភ នូវមេរោគបំប្លែងថ្មីឌែលតា នៅសហរដ្ឋអាមេរិកផ្ទាល់តែម្តង។ ទិន្នន័យបង្ហាញថា មួយរយៈចុងក្រោយ សហរដ្ឋអាមេរិកមានអ្នកស្លាប់ដោយសារកូវីដ១៩ចំនួនជាង ៥០០នាក់ក្នុងមួយថ្ងៃ ខណៈករណីឆ្លងថ្មីបានកើនឡើងពី១ម៉ឺនករណីក្នុងមួយថ្ងៃកាលពីខែកក្កដា កើនឡើងដល់ជាង ១៥ម៉ឺននាក់ក្នុងខែសីហានេះ ដែលភាគច្រើន ជាករណីមេរោគឌែលតា។
តាមការសិក្សាមួយរបស់ក្រុមហ៊ុនផលិតវ៉ាក់សាំង Pfizer-BioNTech បានបង្ហាញថា ប្រសិទ្ធភាពនៃវ៉ាក់សាំងរបស់ខ្លួន គឺនឹងមានការធ្លាក់ចុះទាបជាងមុនបន្ទាប់ពីការចាក់ដូសទី ២ រួចក្រោយរយៈពេល៦ខែ ពោលគឺធ្លាក់ចុះប្រសិទ្ធភាព ១៣ពិន្ទុភាគរយ ដូច្នេះហើយ ទើបខាងក្រុមហ៊ុនបានស្នើទៅដល់រដ្ឋាភិបាលអាមេរិកឲ្យមានការចាក់ដូសទី៣ ឬដូសជំរុញ ដើម្បីបង្កើនប្រសិទ្ធភាពការពារប្រជាពលរដ្ឋអាមេរិកាំង។
សូមជម្រាបថា នៅចំពោះមុខការគម្រាមកំហែងនៃមេរោគកូវីដ១៩ឌែលតានៅទូទាំងពិភពលោក មិនមែនមានតែសហរដ្ឋអាមេរិកនោះទេ ដែលកំពុងចាត់ចែងចាក់វ៉ាក់សាំងដូសជំរុញដល់ពលរដ្ឋ។ ក្នុងនោះមានប្រទេសជាច្រើនរួចហើយ ដែលបាននិងកំពុងចាក់វ៉ាក់សាំងដូសជំរុញដល់ប្រជាជនខ្លួន ក្នុងនោះមាននៅអឺរ៉ុប អារ៉ាប់ និង តំបន់អាស៊ីអាគ្នេយ៍ ជាក់ស្តែងរួមមានកម្ពុជាយើងក៏កំពុងចាក់ដូសជំរុញនេះផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
