អេ អឹម ខេ ទទួលបាន “ពានរង្វាន់និយោជកឆ្នើមក្នុងប្រទេសកម្ពុជា” ៣ឆ្នាំជាប់គ្នា

នៅថ្ងៃទី១០ ខែមករា ឆ្នាំ២០២៣ គឺជាពេលវេលាដ៏សំខាន់មួយ ដែល អេ អឹម​ ខេ​ ទទួលបាននូវពានរង្វាន់ “និយោជកឆ្នើម” ជាលើកទី៣ ពីស្ថាប័ន World HRD Congress ដែលកម្មវិធីបានរៀបចំឡើងនៅក្នុងទីក្រុងបាងកក ប្រទេសថៃ ហើយគណៈកម្មការជ្រើសរើសចង់បង្ហាញការទទួលស្គាល់ពីការប្ដេជ្ញាចិត្ត និងការវិនិយោគរបស់គ្រឹះស្ថានក្នុងការយកចិត្តទុកដាក់ចំពោះបុគ្គលិករបស់ពួកគេ។ អេ អឹម ខេ បានឆ្លងកាត់ការតាមដាន និងវាយតម្លៃយ៉ាងយកចិត្តទុកដាក់ពីគណៈកម្មការមុនពេលត្រូវបានជ្រើសរើសក្លាយជាម្ចាស់ពានរង្វាន់នេះ ដើម្បីប្រាកដថាពិតជាបានអនុវត្តល្អប្រសើរ និងមានការយកចិត្តទុកដាក់ជាមួយបុគ្គលិករបស់ខ្លួនមែន។

ក្នុងរយៈពេល ២០ឆ្នាំកន្លងមកនេះ អេ អឹម ខេ បានរីកចម្រើនកាន់តែធំ និងកាន់តែរឹងមាំ ហើយបានផ្ដល់នូវផលិតផល និងសេវាកម្មហិរញ្ញវត្ថុជាច្រើនសម្បូរបែប ក៏ដូចជាការវិនិយោគបន្ថែមទៅលើធនធានមនុស្ស និងប្រើប្រាស់បច្ចេកវិទ្យាថ្មីៗ ដើម្បីបំពេញការផ្លាស់ប្ដូរពីតម្រូវការរបស់អតិថិជនឲ្យទាន់ពេលវេលា។ ក្នុងនាមជាគ្រឹះស្ថានមីក្រូហិរញ្ញវត្ថុឈានមុខគេលើសេវាប្រាក់បញ្ញើក្នុងប្រទេសកម្ពុជា ដែលបានបម្រើឲ្យអតិថិជនរាប់លាននាក់ទូទាំងប្រទេសកម្ពុជា អេ អឹម ខេ បានដឹងយ៉ាងច្បាស់ថា បុគ្គលិកគឺជាធនធានយ៉ាងសំខាន់ដែលរួមចំណែកក្នុងភាពជោគជ័យនេះ។

អ្នកស្រី ដេត សុជាតិ នាយិកាប្រតិបត្តិធនធានមនុស្ស អេ អឹម ខេ បានមានប្រសាសន៍ថា “ទោះបីជាពួកយើងបានផ្ដល់នូវអត្ថប្រយោជន៍ជាច្រើនសម្រាប់បុគ្គលិករបស់យើង ក៏ថ្នាក់គ្រប់គ្រងរបស់យើងនៅតែបន្ដសួរខ្លួនឯងជារៀងរាល់ថ្ងៃ ដើម្បីប្រាកដថាបុគ្គលិករបស់យើងទទួលបានអត្ថប្រយោជន៍ល្អប្រសើរ។ កិច្ចការចម្បងរបស់យើងប្រចាំថ្ងៃគឺ សុវត្ថិភាព និងសេចក្ដីពេញចិត្តរបស់បុគ្គលិកយើង។ មិនថាស្ថិតក្នុងស្ថានភាពដ៏លំបាក(កូវីដ១៩) ក៏យើងមិនកាត់បន្ថយបុគ្គលិកសូម្បីតែម្នាក់។ ពានរង្វាន់នេះបានឆ្លុះបញ្ចាំង ក៏ដូចជាការទទួលស្គាល់នូវកិច្ចខិតខំប្រឹងល្អៗដែលយើងបានធ្វើ និងការលើកទឹកចិត្តយើងឲ្យបន្ដអនុវត្តបន្ថែមទៀតដល់បុគ្គលិករបស់យើង។ សំខាន់ជាងនេះទៅទៀត ពានរង្វាន់នេះមិនមែនផ្ដោតលើបុគ្គលណាម្នាក់នៅក្នុង អេ អឹម​ ខេ នោះទេ ពាននេះគឺសម្រាប់អ្នកគ្រប់គ្នា រួមទាំងម្ចាស់ភាគហ៊ុន និងបុគ្គលិកទាំងអស់។ វាគឺជាលទ្ធផលនៃកិច្ចខិតខំប្រឹងប្រែងក្នុងការរក្សាបាននូវវប្បធម៌ការងារល្អ បរិយាកាសការងារល្អ ការប្ដេជ្ញាចិត្តខ្ពស់ពីសំណាក់បុគ្គលិក និងថ្នាក់គ្រប់គ្រង ការបើកទូលាយ តម្លាភាព ការបណ្តុះបណ្តាល និងអភិវឌ្ឍន៍ ដូចជាភាពច្នៃប្រឌិត ស្របជាមួយនឹងការបណ្តុះនូវគុណតម្លៃស្នូល ទៅកាន់បុគ្គលិកគ្រប់ជាន់ថ្នាក់។”

គួរបញ្ជាក់ផងដែរថា ថ្នាក់គ្រប់គ្រង និងក្រុមប្រឹក្សាភិបាលរបស់ អេ អឹម ខេ តែងតែតាមដាន និងយកចិត្តទុកដាក់រាល់ការអនុវត្តនូវយន្តការក្នុងការរក្សាសុខុមាលភាព និងភាពពេញចិត្តរបស់បុគ្គលិកចំពោះ អេ អឹម ខេ ។ របាយការណ៍នេះក៏មានកំណត់នូវសូចនាករជាប្រចាំដែលហៅថា “ទំនួលខុសត្រូវចំពោះបុគ្គលិក” សម្រាប់តាមដានថាតើ អេ អឹម ខេ បានធ្វើអ្វីខ្លះដើម្បីបំពេញចិត្តបុគ្គលិករបស់ខ្លួន។