ក្រុមប្រឹក្សាអភិវឌ្ឍន៍កម្ពុជា(CDC) បានសម្រេចអនុម័តគម្រោងវិនិយោគអាជីវកម្មរ៉ែមាសរបស់ក្រុមហ៊ុន LATE CHENG MINING DEVELOPMENT CO., LTD មានទីតាំងវិនិយោគ ស្ថិតនៅឃុំសុចិត្រ ស្រុកសណ្តាន់ ខេត្តកំពង់ធំ។ បើតាមក្រុមប្រឹក្សាអភិវឌ្ឍន៍កម្ពុជា គម្រោងវិនិយោគនេះ មានទំហំទឹកប្រាក់ប្រមាណ ១៣លានដុល្លារអាមេរិក និងអាចបង្កើតការងារបានចំនួន ៣០០កន្លែង ដល់ប្រជាពលរដ្ឋនៅតំបន់នោះ។
បើតាមឯកឧត្តម អ៊ឹង ឌីប៉ូឡា អគ្គនាយកនៃអគ្គនាយកដ្ឋានក្រសួងរ៉ែ និងថាមពលបានគូសបញ្ជាក់ដែរថា គម្រោងអាជីវកម្មរ៉ែមាសនៅក្នុងខេត្តកំពង់ធំនេះ ជាអាជីវកម្មកម្រិតមធ្យម ដូច្នេះ អាចផលិតរ៉ែមាស ប្រមាណ ១៨០គីឡូក្រាម ប៉ុណ្ណោះ ក្នុងមួយឆ្នាំ។ យ៉ាងណាមិញ អគ្គនាយកនៃអគ្គនាយកដ្ឋានរូបនេះ បានបញ្ជាក់ថា បើគ្មានអ្វីប្រែប្រួលនោះទេ ក្រុមហ៊ុនអាជីវកម្មរ៉ែ ដែលស្ថិតក្នុងខេត្តកំពង់ធំ នេះអាចនឹងចាប់ផ្ដើមធ្វើអាជីវកម្ម នៅអំឡុងខែសីហា ឆ្នាំ២០២៣ ខាងមុខ។
អត្ថបទគួរអាន
មន្ត្រីជាន់ខ្ពស់ក្រសួងរ៉ែ និងថាមពល បានបញ្ជាក់ថា បច្ចុប្បន្នកម្ពុជា បានផ្ដល់អាជ្ញាបណ្ណដល់ក្រុមហ៊ុនចំនួន៨ ដើម្បីរុករក និងចម្រាញ់រ៉ែមាសនៅកម្ពុជា។ ប៉ុន្តែក្នុងចំណោមក្រុមហ៊ុនទាំងនេះ មានតែក្រុមហ៊ុនអូស្ត្រាលី រ៉ឺនេសង់ មីនើរ៉ល (ខេមបូឌា) លីមីតធីត មួយប៉ុណ្ណោះ ដែលបានបើករោងចក្រចម្រាញ់រ៉ែមាសជាលក្ខណៈឧស្សាហកម្មទ្រង់ទ្រាយនៅកម្ពុជា ដែលមានផែនការផលិតរ៉ែមាស ៣,៦តោន ក្នុងមួយឆ្នាំ។ ចំណែកក្រុមហ៊ុនផ្សេងៗ ទៀតកំពុងស្ថិតក្នុងដំណាក់កាលសិក្សា រុករក និងចម្រាញ់សាកល្បង។ បើតាមថ្នាក់ដឹកនាំអគ្គនាយកដ្ឋានធនធានរ៉ែ នៃក្រសួងរ៉ែ និងថាមពល រហូតមកដល់ពេលនេះ កម្ពុជា ផលិតបានរ៉ែមាសសរុបជាង ៣ ៨០០គីឡូក្រាម ខណៈរាជរដ្ឋាភិបាលទទួលបានចំណូលសួយសារជិត ៦លានដុល្លារអាមេរិក ចូលថវិកាជាតិ។
ជុំវិញបច្ចុប្បន្នភាពនៃវិស័យរ៉ែ វិញត្រូវបានឯកឧត្តម អ៊ឹង ឌីប៉ូឡា កត់សម្គាល់ឃើញថា បានបន្តរីកចម្រើនជាបន្តបន្ទាប់ ពិសេសចំណូលដែលប្រមូលបានពីវិស័យរ៉ែ តែម្ដង ព្រោះកម្ពុជា មានសក្ដានុពលលើវិស័យនេះ។ បើតាមអគ្គនាយកដ្ឋានធនធានរ៉ែ ខេត្តដែលមានសក្ដានុពលលើវិស័យរ៉ែមាស មានដូចជា មណ្ឌលគិរី រតនគិរី ក្រចេះ កំពង់ធំ ព្រះវិហារ និងបាត់ដំបង ជាដើម។ យ៉ាងណាមិញ ដើម្បីចូលរួមអភិវឌ្ឍវិស័យនេះ ឲ្យកាន់តែរីកចម្រើនបន្ថែមទៀត អគ្គនាយកដ្ឋានធនធានរ៉ែរូបនេះ ក៏បានបង្ហាញការស្វាគមន៍ជានិច្ចចំពោះក្រុមហ៊ុនវិនិយោគ ដែលមានបំណងវិនិយោគក្នុងវិស័យឧស្សាហកម្មរ៉ែ នៅកម្ពុជា៕
