បន្ទាប់ពីទទួលបានជោគជ័យលើការគ្រប់គ្រងកូវីដ-១៩ អស់រយៈពេលជាច្រើនខែ វៀតណាមថ្មីៗនេះ បានដាក់ការរឹតត្បិតខ្លាំងទៅលើទីក្រុងសំខាន់ៗរបស់ខ្លួន បន្ទាប់ពីមានការឆ្លងរីករាលដាលខ្លាំង ដោយសារមេរោគបំប្លែងថ្មី ឌែលតា។
ជាមួយគ្នានេះដែរ អូស្ត្រាលី ចេញមុខមកជ្រោមជ្រែង ដោយបានសម្រេចបរិច្ចាគវ៉ាក់សាំងAstraZeneca ផលិតនៅអូស្ត្រាលី ព្រមជាមួយថវិកាប្រមាណ៣០លានដុល្លារអាមេរិក ដើម្បីជួយវៀតណាមក្នុងការបញ្ជាទិញវ៉ាក់សាំងនេះ គឺធ្វើឡើងបន្ទាប់ពីមានកិច្ចប្រជុំមួយរវាងឧបនាយករដ្ឋមន្ត្រីវៀតណាម ផាម បិញមិញ និង រដ្ឋមន្ត្រីពាណិជ្ជកម្ម ទេសចរណ៍ និង វិនិយោគ អូស្ត្រាលី។តាមការអះអាងរបស់រដ្ឋាភិបាលវៀណាមនៅថ្ងៃអង្គារសប្ដាហ៍នេះ បានឲ្យដឹងថា ក្រៅតែពីជំនួយវ៉ាក់សាំងអូស្ត្រាលី វៀតណាមនឹងទទួលបានវ៉ាក់សាំង AstraZeneca ចំនួន១លានដូសបន្ថែមទៀតពីប្រទេសចិននៅក្នុងខែកក្កដានេះ។
កម្មវិធីចាក់វ៉ាក់សាំងរបស់វៀតណាម ដែលបានចាប់ផ្ដើមកាលពីខែមីនា មកទល់ពេលនេះ គឺប្រើប្រាស់វ៉ាក់សាំងប្រភេទ AstraZeneca ហើយសាធារណជនក៏បានអំពាវនាវឲ្យរដ្ឋាភិបាលវៀតណាមពន្លឿនការចាក់វ៉ាក់សាំងថែមទៀត។
អត្ថបទគួរអាន
រហូតមកដល់ពេលនេះ ប្រជាជនវៀតណាមបានចាក់វ៉ាក់សាំងដូសទី១សរុបជិត៤លាននាក់ ខណៈដែលបានចាក់គ្រប់ ២ដូស មានជាង ២៨ម៉ឺននាក់ នៃចំនួនប្រជាជនសរុបរបស់ប្រទេសវៀតណាមមានដល់ទៅ ៩៨លាននាក់។
ប្រទេសវៀតណាម ថ្មីៗនេះ កំពុងប្រឈមនឹងការឆ្លងកាន់តែខ្លាំងក្លាមែនទែន ដោយក្នុងនោះ ទីក្រុងហានូយកំពុងក្លាយជាតំបន់ក្ដៅដែលមានករណីឆ្លងខ្ពស់ជាងគេ ហើយអ្នកជំនាញបានចាត់ទុកការឆ្លងកូវីដ-១៩ នៅក្នុងទីក្រុងនេះ ថាជាការផ្ទុះឆ្លងរាលដាលមិនអាចព្យាករទុកបានឡើយ។ នៅថ្ងៃអង្គារសប្ដាហ៍នេះ វៀតណាមមានអ្នកឆ្លងកូវីដ-១៩សរុប ជិត១ពាន់នាក់ ខណៈដែលមកទល់ពេលនេះ អ្នកឆ្លងសរុបនៅវៀតណាមកើនដល់ ៣ម៉ឺននាក់ហើយ និង ស្លាប់មានជាង១០០នាក់ហើយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
