ការសម្រេចចិត្តរបស់រដ្ឋាភិបាលអូស្ត្រាលីបែបនេះ ទទួលបានការិះគន់យ៉ាងចាស់ដៃពីសំណាក់ក្រុមអាជីវកម្ម និង ឧស្សាហកម្មជាច្រើន រួមទាំងសមាជិកនៃគណបក្សរបស់លោក ស្កុត ម៉ូរីសុន នាយករដ្ឋមន្ត្រីអូស្ត្រាលីផងដែរ។
បច្ចុប្បន្នអូស្ត្រាលី នៅបន្ដមានជើងហោះហើរដឹកពលរដ្ឋអូស្ត្រាលីដែលនៅក្រៅប្រទេសចូលមកកាន់ប្រទេសអូស្ត្រាលីវិញ ហើយថ្មីៗនេះ មានពលរដ្ឋអូស្ត្រាលីប្រហែល ៩ពាន់នាក់ កំពុងព្យាយាមធ្វើដំណើរត្រឡប់ពីប្រទេសឥណ្ឌាមកកាន់អូស្ត្រាលីផងដែរ ប៉ុន្ដែ ជើងយន្ដហោះដែលត្រឡប់មកពីឥណ្ឌាលើកដំបូងកាលពីថ្ងៃសៅរ៍សប្ដាហ៍មុននេះ បែរជាមានអ្នកដំណើរជិះតែពាក់កណ្ដាលប៉ុណ្ណោះ ដោយសារតែភាគច្រើននៃពលរដ្ឋអូស្ត្រាលីនៅឥណ្ឌាត្រូវបានតេស្ដរកឃើញវិជ្ជមានកូវីដ-១៩ មិនអាចធ្វើដំណើរមកបានទេ។
ជុំវិញនឹងបញ្ហានេះនាយករដ្ឋមន្ត្រីអូស្ត្រាលី លោកស្កុត ម៉ូរីសុន បានលើកឡើងថា លោកទទួលបានការសំណូមពរជាច្រើន ដែលចង់ឲ្យដឹកពលរដ្ឋអូស្ត្រាលីដែលមានវិជ្ជមានកូវីដ-១៩ ពីក្រៅប្រទេសចូលមកកាន់មាតុភូមិវិញ ប៉ុន្ដែវាមិនសមហេតុផលដែលត្រូវធ្វើបែបនេះទេ។ លោកថា រដ្ឋាភិបាលក៏ដូចជាពលរដ្ឋអូស្ត្រាលី គឺចង់ជួយគាំទ្រអ្នកដែលមានវិជ្ជមានកូវីដ-១៩ នៅក្រៅប្រទេសទាំងនោះ តាមដែលអាចធ្វើទៅបាន ប៉ុន្ដែ ការនាំចូលកូវីដ-១៩ចូលប្រទេស គឺលោកយល់ថា មិនត្រូវធ្វើទេ! ព្រោះថា វាមានហានិភ័យខ្ពស់ណាស់។
អត្ថបទគួរអាន
ប្រទេសអូស្ត្រាលី គឺជាប្រទេសមួយក្នុងចំណោមប្រទេសជាច្រើនទៀតក្នុងពិភពលោក ដែលមានកិច្ចខិតខំប្រឹងប្រែងទទួលបានជោគជ័យក្នុងការប្រយុទ្ធប្រឆាំងនឹងជំងឺឆ្លងកូវីដ-១៩ ដោយតាំងពីមានផ្ទុះរាលដាលកូវីដ-១៩មកទល់ពេលនេះ អូស្ត្រាលីមានអ្នកស្លាប់បាត់បង់ជីវិត ប្រមាណ៩០០នាក់ប៉ុណ្ណោះ ខណៈអ្នកឆ្លងសរុបមានប្រមាណ ៣ម៉ឺននាក់។ អូស្ត្រាលី ត្រូវបានគេដឹងថា មានការរឹតត្បិតតឹងរឹងក្នុងការបិទច្រកព្រំដែន ការតាមដានជាប់លាប់ចំពោះការចម្លង ពិសេសគឺការអនុវត្តគោលការណ៍រក្សាគម្លាតសង្គមជាដើម។
សូមបញ្ជាក់ថា បើក្រឡេកទៅមើល នៅបណ្ដាប្រទេសលោកខាងលិច គេសង្កេតឃើញថា ការបន្ធូរបន្ថយវិធានការរឹតត្បិតកូវីដ-១៩ ត្រូវបានធ្វើឡើងជាបន្ដបន្ទាប់ ជាពិសេសនៅអាមេរិក និងអឺរ៉ុប នោះក៏ដោយសារតែប្រទេសទាំងនេះ បាននិងកំពុងសម្រុកការចាក់វ៉ាក់សាំងកូវីដ-១៩បានលឿនសម្រាប់ពលរដ្ឋរបស់ខ្លួន។ តួយ៉ាង នៅអឺរ៉ុបថ្មីៗនេះ បានប្រកាសថា នឹងបើកឲ្យពលរដ្ឋដែលមានលិខិតបញ្ជាក់កូវីដ-១៩ អាចធ្វើដំណើរឆ្លងព្រំដែន នៃប្រទេសសមាជិកអឺរ៉ុបទាំង២៧បាន នៅថ្ងៃឈប់សម្រាករដូវក្ដៅខាងមុខនេះ ខណៈដែលសហរដ្ឋអាមេរិកឯណោះវិញ ថ្មីៗនេះ ក៏បានប្រកាសអនុញ្ញាតឲ្យពលរដ្ឋរបស់ខ្លួនដែលបានចាក់វ៉ាក់សាំងរួច អាចចេញដើរហើរដោយមិនចាំបាច់ពាក់ម៉ាសទៀតនោះទេ ហើយបច្ចុប្បន្ន មានទីក្រុងមួយចំនួននៅអាមេរិកបាននិងកំពុងចាប់ផ្ដើមអនុវត្តការណែនាំនេះបណ្ដើរៗហើយដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
