អភិបាលរាជធានីបាងកកលោក Chadchart Sittipunt បានដឹកនាំកិច្ចប្រជុំតាមអនឡាញមួយនាពេលថ្មីៗនេះ អំពីការគ្រប់គ្រងទឹកជំនន់ ជាមួយមន្ត្រីមកពីនាយកដ្ឋានរៀបចំប្រព័ន្ធលូ និងការរំដោះទឹករបស់រាជធានីបាងកក (BMA) ការិយាល័យខណ្ឌ និងភ្នាក់ងាររដ្ឋចំនួន ៥០ ដើម្បីរិះរកវិធីដើម្បីបញ្ចប់បញ្ហាទឹកជំនន់នៅក្នុងរាជធានីមួយនេះ។
នៅក្នុងកិច្ចប្រជុំនេះអាជ្ញាធរថៃបានព្យាករថា នឹងមានការធ្លាក់ភ្លៀងជោគជាំប្រហែល ៦០% ទៅ៨០% នៅទូទាងរាជធានីបាងកកក្នុងខែនេះ ដែលមានបរិមាណទឹកភ្លៀងក្នុងកម្រិតពី ២០០-២៥០ មីល្លីម៉ែត្រ ហើយលោកអភិបាលក្រុងបាងកកបាននិយាយថា ទីក្រុងនេះ ជាទូទៅពឹងផ្អែកលើប្រព័ន្ធរំដោះទឹកចំនួន ២ សំខាន់ៗ គឺព្រែកជីក និងលូអង្កប់ក្រោមដី។
មកទល់នឹងពេលនេះ សាលារាជធានីបាងកកបានអនុវត្តគម្រោងលូក្រោមដីចំនួន ៤ គឺប្រព័ន្ធរំដោះទឹកបន្តចេញពីព្រែកប្រាចាខន (Prachakon) លូក្រោមដី ប្រឡាយមួយចំនួន ព្រមទាំងលូក្រោមដីដែលបង្កប់នៅពីក្រោមប្រឡាយ Bang Sue ផងដែរ។
អត្ថបទគួរអាន
លោក Chadchart បាននិយាយថា ប្រព័ន្ធលូស្នូលរបស់រាជធានីបាងកក គឺប្រព័ន្ធប្រឡាយតែម្ដងព្រោះវាអាចជួយរំដោះទឹកចេញទៅកាន់ទន្លេចៅប្រាយ៉ាបានយ៉ាងលឿន។ ប្រព័ន្ធប្រឡាយគឺមានប្រសិទ្ធភាពក្នុងការរំដោះទឹកបានល្អប្រសើរជាងប្រព័ន្ធលូផ្សេងទៀត ដូច្នេះហើយចាំបាច់ត្រូវតែផ្ដោតលើការបង្កើតប្រព័ន្ធប្រឡាយឱ្យបានខ្លាំងជាងគម្រោងលូក្រោមដី។
ដើម្បីធានាបាននូវប្រសិទ្ធភាពនៃការបូមទឹកចេញបានលឿននោះ អាជ្ញាធរពាក់ព័ន្ធត្រូវតែពិនិត្យមើលលើគ្រប់កន្លែងទាំងអស់នៅទូទាំងរាជធានីបាងកក រួមទាំងប្រព័ន្ធអគ្គិសនីនៅតាមស្ថានីយ៍ទឹកចំនួន ១៩០ កន្លែងផងដែរ។
ការបូមទឹកចេញពីប្រឡាយក៏ជាការចាំបាច់មួយត្រូវធ្វើផងដែរ ដើម្បីបង្ហូរទឹកឱ្យបានលឿនបន្ថែមពីលើបច្ចេកទេសនៃការចោះដាក់បំពង់លូចេញពីព្រែកដើម្បីធ្វើឱ្យទឹកអាចហូរចេញពីព្រែកឱ្យបានកាន់តែលឿនជាងមុន។
លោក Chadchart បាននិយាយថា ច្រកទ្វារទឹកជំនន់ និងការបូមទឹកមិនចំណាយប្រាក់ច្រើនដូចគម្រោងដាក់លូក្រោមដីនោះទេ ប៉ុន្តែអ្វីដែលសំខាន់បំផុតនោះគឺត្រូវអភិវឌ្ឍទាំងប្រឡាយ និងលូបង្កប់ក្រោមដីឱ្យស្មើៗគ្នាព្រោះប្រព័ន្ធទាំងពីរនេះគឺត្រូវពឹងផ្អែកលើគ្នាទៅវិញទៅមក៕
អត្ថបទ៖ សុខ ជា
