របាយការណ៍របស់ធនាគារជាតិបានបង្ហាញថា ទំហំកម្ចីសរុប ដែលគ្រឹះស្ថានធនាគារនៅកម្ពុជាបានផ្តល់ឲ្យទៅអតិថិជននៅត្រឹមដំណាច់ខែមិថុនាឆ្នាំនេះ មានចំនួនសរុបជាង ២៦ ពាន់លានដុល្លារ ហើយក្នុងនោះ កម្ចីទិញផ្ទះជាកម្មសិទ្ធិផ្ទាល់ខ្លួនមានចំណែកជាង ១១ ភាគរយនៃកម្ចីសរុប ពោលគឺស្មើនឹងចំនួនទឹកប្រាក់ប្រមាណ ៣ ពាន់លានដុល្លារ។
ផ្អែកតាមរបាយការណ៍ដដែលនេះ កម្ចីទិញផ្ទះត្រូវបានបែងចែកដាច់ដោយឡែកពីកម្ចីដែលធនាគារផ្តល់ទៅឲ្យវិស័យសំណង់ស្មើនឹងជាង ៩ ភាគរយ ខណៈកម្ចីសម្រាប់ការជួញដូរអចលនទ្រព្យ ស្មើនឹង ៨ ភាគរយ នៃកម្ចីសរុប។
អត្ថបទទាក់ទង!
ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា បានបញ្ជាក់ក្នុងរបាយការណ៍ប្រចាំឆមាសទី១ថា ក្នុងអំឡុងឆមាសទីមួយឆ្នាំនេះ ធនាគារជាតិបានអនុវត្តវិធានការបុរេសកម្មមួយចំនួនដើម្បីទប់ស្តាត់វិបត្តិដែលអាចបណ្តាលមកពីជំងឺកូវីដ-១៩ ដូចជាការកាត់បន្ថយអត្រាប្រាក់បម្រុងកាតព្វកិច្ចមកត្រឹម ៧ភាគរយ។
ការរៀបចំឥណទានឡើងវិញដោយបន្ទាបអត្រាការប្រាក់កម្ចី និងការបន្តផ្តល់ប្រាក់កម្ចីរយៈពេលខ្លីដល់គ្រឹះស្ថានធនាគារ និងហិរញ្ញវត្ថុ ការពន្យារការអនុវត្តទ្រនាប់ដើមទុនមកនៅត្រឹម ១,២៥ភាគរយ ការអនុគ្រោះបន្ធូបន្ថយកំរៃសេវា ឬលើកលែងការផាកពិន័យជាដើម ដែលទាំងអស់នេះ គឺជាការធានានិរន្តរភាពប្រតិបត្តិការ និងឆ្លើយតបនឹងតម្រូវការសេដ្ឋកិច្ចបានទាន់ពេលវេលា។ ក្នុងពេលជាមួយគ្នានេះ ខាងគ្រឹះស្ថានធនាគារ និងហិរញ្ញវត្ថុក៏បានផ្តល់ការអនុគ្រោះដល់អ្នកខ្ចីប្រាក់ ដែលទទួលរងការធ្លាក់ចុះចំណូល ដោយសារឥទ្ធិពលនៃជំងឺកូវីដ-១៩ផងដែរ។
សូមជម្រាបថា គិតមកដល់ឆមាសទី១ ទ្រព្យសកម្មរបស់ធនាគារ និងហិរញ្ញវត្ថុមានកំណើន ជាង ៥៤ពាន់លានដុល្លារ ក្នុងនោះ ឥណទានអតិថិជនមានជាង ៣៤ពាន់លានដុល្លារ ខណៈប្រាក់បញ្ញើអតិថិជនមានកំណើន ៣០ពាន់លានដុល្លារ។ បើគិតជាចំនួនគណនីឥណទានអតិថិជនបានកើនជាង ៣លានគណនី ខណៈគណនីប្រាក់បញ្ញើអតិថិជនជាង៨លានគណនី៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
