នៅក្នុងចំណោមធនាគារទាំង ១៦ ដែលបានចូលរួមកាត់បន្ថយអត្រាការប្រាក់ក្នុងការជួយដល់អ្នកខ្ចីដែលគ្មានលទ្ធភាពសងនៅអំឡុងពេលរងផលប៉ះពាល់ដោយសារកូវីដ១៩នោះ ឃើញថា ធនាគារ កសិកម្ម និងអភិវឌ្ឍន៍ជនបទវៀតណាម គឺបានកាត់បន្ថយអត្រាការប្រាក់ សរុបជាទឹកប្រាក់មានចំនួនច្រើនជាងគេបំផុតគឺមានដល់ទៅជាង ២០០លានដុល្លារអាមេរិក ខណៈដែលទំហំកម្ចីសរុប ដែលត្រូវបានធនាគារនេះកាត់បន្ថយអត្រាការប្រាក់ជូននោះ មានដល់ទៅជាង៥៥ពាន់លានដុល្លារអាមេរិក និងមានអ្នកខ្ចីប្រាក់ជាង ៣លាននាក់ ។
បន្ទាប់ពីនេះ គឺធនាគារ Vietcombank ក៏មានការកាត់បន្ថយអត្រាការប្រាក់ច្រើនដែរ ពោលគឺសរុបជាទំហំទឹកប្រាក់មានជាង ៨៦លានដុល្លារ ខណៈដែលធនាគារ BIDV បានកាត់បន្ថយជាង ៨៣លានដុល្លារអាមេរិក។អត្ថបទគួរអាន
គួររំឭកថា កាលពីដើមខែកក្កដាកន្លងទៅ ដើម្បីអនុវត្តតាមសេចក្ដីសម្រេចរបស់រដ្ឋាភិបាលវៀតណាម សមាគមធនាគារវៀតណាម ដែលមានធនាគារពាណិជ្ជធំៗចំនួន១៦ជាសមាជិក បានប្រកាសយល់ព្រមកាត់បន្ថយអត្រាកម្ចីសម្រាប់សហគ្រាស ដែលរងផលប៉ះពាល់ដោយសារកូវីដ១៩ចាប់ពីថ្ងៃទី១៥ ខែកក្កដា រហូតដល់ចុងឆ្នាំ២០២១នេះ ដោយចំនួនសរុបនៃការកាត់បន្ថយអត្រាការប្រាក់សម្រាប់អ្នកខ្ចីប្រាក់នេះ គឺសរុបមានតម្លៃជាទឹកប្រាក់ប្រមាណជាង ៩០០លានដុល្លារអាមេរិក។
ក្នុងនោះដែរ ធនាគាររដ្ឋចំនួន៤របស់វៀតណាម បានប្តេជ្ញាចិត្តនឹងផ្ដល់កញ្ចប់ថវិកាគាំទ្រសរុបប្រមាណ ជាង ១៧៥លានដុល្លារអាមេរិក ដើម្បីកាត់បន្ថយអត្រាការប្រាក់ និងបានកាត់បន្ថយថ្លៃសេវាកម្ម១០០%តែម្ដង សម្រាប់អតិថិជនរបស់ធនាគារទាំងនេះ នៅក្នុងអំឡុងពេលដែលប្រទេសវៀតណាមបានដាក់ចេញនូវការអនុវត្តវិធានការគម្លាតសង្គម ដើម្បីទប់ស្កាត់ការឆ្លងរីករាលកូវីដ១៩៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
