ពាក់ព័ន្ធតម្លៃស្ករត្នោតកំពង់ស្ពឺនៅឆ្នាំនេះ មន្ត្រីរូបនេះអះអាងថា តម្លៃស្ករត្នោតកំពង់ស្ពឺឆ្នាំនេះមានការកើនឡើងបន្តិចបន្តួចបើធៀបនឹងឆ្នាំមុន។
បញ្ហាសេដ្ឋកិច្ច និងវិបត្តិអតិផរណាសកលដែលបង្កឡើងដោយវិបត្តិសង្គ្រាមនៅអ៊ុយក្រែនបានទាញទម្លាក់ការបញ្ជាទិញផលិតផលស្ករត្នោតកំពង់ស្ពឺ ដែលជាម៉ាកទំនិញសម្គាល់ភូមិសាស្ត្របន្តិចបន្តួចនៅឆ្នាំនេះ។ បើតាមការគូសបញ្ជាក់របស់លោក វី វាសនា មន្ត្រីជំនួយការនៃសមាគមន៍ស្ករត្នោតកំពង់ស្ពឺ នៅឆ្នាំនេះស្ករត្នោតកំពង់ស្ពឺមានការបញ្ជាទិញពីទីផ្សារអន្តរជាតិប្រមាណ ១២០តោន ធ្លាក់ចុះប្រមាណ៣០តោនបើធៀបនឹងឆ្នាំ២០២២ ដែលមានការបញ្ជាទិញប្រមាណ១៥០តោត។ មកទល់ពេលនេះការនាំចេញស្ករត្នោតកំពង់ស្ពឺសម្រេចបានជាង៣០តោនហើយ ដែលស្ករទាំងនេះជាប្រភេទស្ករម្សៅ។ បើតាមលោក វី វាសនា ស្ករត្នោតប្រភេទម្សៅនៅឆ្នាំនេះលក់ចេញក្នុងតម្លៃ ៧,៣០០រៀល ក្នុងមួយគីឡូក្រាមមានការកើនឡើង៣០០រៀល បើធៀបនឹងតម្លៃកាលពីឆ្នាំមុន។
អត្ថបទគួរអាន
បញ្ហាប្រឈមសម្រាប់ការផលិតស្ករត្នោតកំពង់ស្ពឺនៅឆ្នាំនេះ គឺការធ្លាក់ចុះចំនួនអ្នកឡើងត្នោត បន្ទាប់ពីពួកគេបានបោះបង់ការងារនេះ ដោយកត្តាអាយុច្រើនឡើងដើមត្នោតលែងរួច គួបផ្សំអ្នកឡើងចំនួនបានប្តូរទៅធ្វើការ ឬប្រកបរបរផ្សេង។ ប៉ុន្តែការឡើងចុះនៃចំនួនអ្នកឡើងត្នោតជារឿងធម្មតាសម្រាប់អាជីពមួយនេះ។ នេះបើតាមការលើកឡើងរបស់មន្ត្រីសមាគមស្ករត្នោតកំពង់ស្ពឺ។
គួរបញ្ជាក់ថា ស្ករត្នោតកំពង់ស្ពឺចាប់ផ្តើមប្រមូលផលពីខែវិច្ឆិកា ដល់ខែឧសភា។ ស្ករត្នោតកំពង់ស្ពឺមាន៤ប្រភេទរួមមានស្ករពាង ស្ករផែន ស្ករល្ង និងស្ករម្សៅ ឬស្ករហ៊ុយ។ ផលិតផលសម្គាល់ភូមិសាស្ត្ររបស់ខេត្តកំពង់ស្ពឺមួយនេះត្រូវបាននាំចេញទៅលក់នៅលើទីផ្សារធំៗជាច្រើនដូចជាអាល្លឺម៉ង់ បារាំង សហរដ្ឋអាមេរិក ប្រេស៊ីល ជប៉ុន និងចិនជាដើម៕
