ប្រភពព័ត៌មានដដែលនេះ បានលើកឡើងថា មានប្រជាជនប្រមាណត្រឹមតែ ១លាន៦សែននាក់ប៉ុណ្ណោះ នៅភូមា ដែលបានចាក់វាក់សាំងកូវីដ-១៩ក្នុងចំណោមប្រជាជនសរុប ៥៤ លាននាក់ ។ ប៉ុន្ដែ អាជ្ញាធរភូមាអះអាងថា វ៉ាក់សាំងនេះ នឹងត្រូវនាំចូលមកជាបន្ដបន្ទាប់ ដើម្បីធានាថា ១០០ ភាគរយនៃប្រជាជនទាំងអស់នឹងត្រូវបានចាក់វ៉ាក់សាំងគ្រប់ចំនួន។
តាមការរាយការណ៍ បានឲ្យដឹងថា នឹងមានវ៉ាក់សាំងប្រមាណ ៧៥ ម៉ឺនដូសរបស់ចិន នឹងត្រូវមកដល់ភូមានៅថ្ងៃព្រហស្បតិ៍ និងបន្ដដឹកមកកាន់តែច្រើនជាងនេះនៅពីរថ្ងៃបន្ទាប់។
អង្គការសហប្រជាជាតិបាននិយាយក្នុងរបាយការណ៍កាលពីថ្ងៃច័ន្ទថា ប្រទេសភូមា ត្រូវបានរំពឹងថា នឹងទទួលបានវ៉ាក់សាំងកូវីដ-១៩ រយៈកម្មវិធីCovaxបានគ្រប់គ្រាន់ក្នុងឆ្នាំនេះ ដើម្បីចាក់ជូនប្រជាជនរបស់ខ្លួនប្រមាណ ២០% នៃប្រជាជនសរុប។
តួលេខនៅថ្ងៃចន្ទ ដើមសប្ដាហ៍នេះ ប្រទេសភូមា មានអ្នកស្លាប់ថ្មីដោយសារកូវីដ-១៩ ជិត ៣០០នាក់ ខណៈអ្នកឆ្លងថ្មីមានជាង៥ពាន់នាក់ ដែលធ្វើឲ្យចំនួនអ្នកឆ្លងសរុបនៅប្រទេសនេះ បានហក់ឡើងដល់ប្រមាណ ២៣ម៉ឺននាក់ហើយ និងអ្នកស្លាប់សរុបមានប្រមាណ ៥ពាន់នាក់។ ប៉ុន្តែ ក្រុមអ្នកជំនាញផ្នែកសុខាភិបាល បាននិយាយថា តួលេខពិតប្រាកដ អាចមានខ្ពស់ជាងតួលេខ ដែលកត់ត្រាដោយរដ្ឋាភិបាលទៅទៀត។
អត្ថបទគួរអាន
លោក Zaw Wai Soe រដ្ឋមន្រ្តីសុខាភិបាល របស់រដ្ឋាភិបាលបង្រួបបង្រួមជាតិ ដែលបង្កើតឡើងដោយក្រុមលោកស្រី អ៊ុង សានសូជី បាននិយាយលើកឡើងថា ប្រជាជនប្រមាណ ៤ សែននាក់នឹងបាត់បង់ជីវិត ប្រសិនបើមានសកម្មភាពឆ្លើយតបយឺតយ៉ាវចំពោះអ្នកជំងឺដែលត្រូវការអុកស៊ីសែនបន្ទាន់។
ថ្មីៗនេះដែរ ក្រុមយោធាភូមា បានចេញមុខរិះគន់ផងដែរ ចំពោះការលើកឡើងថា ប្រជាជននឹងមានស្លាប់កាន់តែច្រើន ដោយសារតែការរឹតបន្ដឹងចំពោះការផ្គត់ផ្គង់អ៊ុកស៊ីហ្សែនដោយក្រុមហ៊ុនឯកជន ខណៈដែលកន្លងមក ពលរដ្ឋភូមាជាមួយចំនួនបានសុខចិត្តល្មើសបម្រាមគោចររបស់អាជ្ញាធរចេញទៅស្វែងរកទិញបំពង់អ៊ុកស៊ីហ្សែនដើម្បីជួយសង្គ្រោះក្រុមគ្រួសារពួកគេ ដែលកំពុងឈឺធ្ងន់ដោយសារតែកូវីដ-១៩៕អត្ថបទ៖ សុខ សិទ្ធិការ្យ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
