ការនាំចេញកង់កម្ពុជាសម្រេចបានជិត ២០០លានដុល្លារ នៅតែកើនខ្ពស់ក្នុង៤ខែឆ្នាំនេះ

អ្នកនាំពាក្យក្រសួងពាណិជ្ជកម្មកម្ពុជាបានបញ្ជាក់អះអាងប្រាប់ ខេមបូណូមីស ថា កំណើននេះបង្ហាញថា ការនាំចេញកង់នៅតែជំនះបាននូវឧបសគ្គជំងឺកូវីដ-១៩ ដែលកំពុងបន្ដលុកលុយខ្លាំងនៅកម្ពុជា ក៏ដូចជាប្រទេសជាច្រើនផ្សេងទៀតក្នុងពិភពលោក។

ឯកឧត្តម ស៊ាង ថៃ អ្នកនាំពាក្យក្រសួងពាណិជ្ជកម្មបានបន្ថែមថា មានកត្តាសំខាន់ ៣ ដែលជំរុញឲ្យការនាំចេញរបស់កម្ពុជានៅតែបន្តកើនឡើងនៅក្នុងដើមឆ្នាំនេះ រួមមាន ទី១ រដ្ឋមន្ត្រីក្រសួងពាណិជ្ជកម្មកម្ពុជា បានអំពាវនាវឱ្យអ្នកបញ្ជាទិញ នៅតែបញ្ជាទិញទំនិញពីកម្ពុជា ទី២. មានការជឿទុកចិត្តពីអ្នកបញ្ជាទិញ និង ទី៣ កម្ពុជា ជាប្រទេសមួយក្នុងចំណោមប្រទេសនាំចេញកង់ច្រើនជាងគេ ដោយមានទីផ្សារទូលំទូលាយ។ រោងចក្រ​ផលិតកង់​នៅតំបន់សេដ្ឋកិច្ច​ពិសេសស្វាយរៀង មានចំនួន ០៦ រោងចក្រហើយ ហើយ​ប្រទេសនាំចូល​កង់ច្រើន​ពីកម្ពុជា រួមមាន អាមេរិក, អង់គ្លេស, អឺរ៉ុប, កាណាដា បន្ទាប់មកមាន ប្រទេសអាស៊ាន, ជប៉ុន, ចិន និង កូរ៉េខាងត្បូង។

បើទោះបីជាកម្ពុជា មានការនាំចេញកង់ច្រើនជាងគេ នៅអាស៊ានក៏ពិតមែន ប៉ុន្ដែកម្ពុជា ក៏បាននាំចូលកង់ម៉ាកល្បីៗជាច្រើនមកពីប្រទេសផ្សេងៗទៀតដែរ តួយ៉ាងនៅឆ្នាំ០២០ មានការនាំចូលកង់ក្នុងទំហំទឹកប្រាក់ជាង៨លានដុល្លារ ដោយភាគច្រើននាំចូលពីប្រទេស ជប៉ុន ចិន តៃវ៉ាន់ វៀតណាម ថៃ អាមេរិក អូស្រ្តាលី និង បារាំងជាដើម។  

សូមជម្រាបថា កាលពីឆ្នាំ២០២០ កម្ពុជា បាននាំចេញកង់ក្នុងទំហំទឹកប្រាក់ជាង ៥០០លានដុល្លារ កើនឡើង ជិត៣០% បើប្រៀបធៀបនឹងឆ្នាំ២០១៩ ដោយបាននាំចេញទៅទីផ្សារគោលដៅជាច្រើន រួមមាន សហរដ្ឋអាមេរិក អាល្លឺម៉ង់ អង់គ្លេស ប៊ែលហ្សិក  និង បណ្តាលប្រទេសនៅប៉ែកអឺរ៉ុបមួយចំនួនទៀត៕