យ៉ាងណាក៏ដោយចុះ បើមើលទៅលើការធ្វើដំណើរតាមផ្លូវការអាសជារួមរវាងកម្ពុជា និងអន្តរជាតិ គឺបង្ហាញពីស្ថានភាពល្អប្រសើរច្រើនបើធៀបនឹងឆ្នាំ២០២១ ដែលមានការរាតត្បាតកូវីដ១៩ខ្លាំង ខណៈដែលការដឹកជញ្ជូនទំនិញតាមផ្លូវអាកាសវិក៏មានការរើបឡើងវិញដែរ ក្រោយប្រទេសមួយចំនួនបើកឲ្យមានការហោះហើរឡើងវិញបន្តបន្ទាប់។ ប៉ុន្តែតម្លៃដឹកជញ្ជូនមិនមានការថយចុះនោះទេ។
ទោះបីបច្ចុប្បន្នការដឹកជញ្ជូនអ្នកដំណើរតាមផ្លូវអាកាសលើពិភពលោកហាក់មានភាពល្អប្រសើរជាងមុនក៏ដោយ តែតម្លៃសំបុត្រយន្តហោះមិនមានការថមថយគួរឲ្យកត់សម្គាល់នោះទេ ពោលគឺនៅតែមានតម្លៃខ្ពស់ដដែល ហើយទៅប្រទេសខ្លះបានកើនឡើងមួយកម្រិតទៀត។ ជាក់ស្តែងថ្លៃសំបុត្រយន្តហោះទៅមកកម្ពុជា-ចិនបច្ចុប្បន្ននៅមានតម្លៃចន្លោះពី ៧ពាន់ទៅ៨ពាន់ដុល្លារ ដែលជាការកើនឡើងមួយដ៏ខ្ពស់មិនធ្លាប់មាន។ នេះបើតាមការបញ្ជាក់របស់ឯកឧត្តម ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល។
ឯកឧត្តមបានគូសបញ្ជាក់ថា កត្តាដែលដែលធ្វើឲ្យតម្លៃសំបុត្រយន្តហោះទៅមកកម្ពុជា-ចិននៅតែមានការកើនឡើងខ្ពស់បែបនេះ គឺបន្ទាប់ពីក្រុមហ៊ុនអាកាសចរណ៍មួយចំនួនបានកាត់បន្ថយ និងផ្អាកការហោះហើរបណ្តោះអាសន្ន ក្រោយចិនអនុវត្តវិធានការគ្មានកូវីដដែលតម្រូវអ្នកដំណើរត្រូវតេស្តនិងធ្វើចត្តាឡីស័កយ៉ាងតឹងរ៉ឹងបំផុតពេលចេញចូលប្រទេសចិន។ ការអនុវត្តវិធានការដ៏តឹងរឹងរបស់ចិននេះ បានធ្វើឲ្យចំនួនអ្នកដំណើរជនជាតិចិនចូលមកកម្ពុជានៅត្រីមាសទី១ឆ្នាំ២០២២ មានការធ្លាក់ចុះជិត៦០% បើធៀបនឹងរយៈពេលដូចគ្នាកាលពីឆ្នាំមុន។
អត្ថបទគួរអាន
បើតាមការគូសបញ្ជាក់របស់ឯកឧត្តម ស៊ីន ចាន់សិរីវុត្ថា បច្ចុប្បន្នមានតែក្រុមហ៊ុនអាកាសចរណ៍ចំនួនពីរប៉ុណ្ណោះ ដែលបានហោះហើរទៅមកកម្ពុជាចិន ខណៈ៥ក្រុមហ៊ុនទៀតបានផ្អាកការហោះហើរជាបណ្តោះអាសន្ន។ ហើយក្នុងមួយសប្តាហ៍មានការហោះហើរតែពីរជើងប៉ុណ្ណោះ គឺទៅនិងមក។ ទោះយ៉ាងណា ឯកឧត្តមរំពឹងថា ការហោះហើរទៅមកកម្ពុជាចិននឹងមានភាពល្អប្រសើរឡើងវិញ ក្រោយចិនបន្ធូរបន្ថយការអនុវត្តវិធានការគ្មានកូវីដរបស់ខ្លួន។
មិនមែនមានតែតម្លៃសំបុត្រយន្តហោះដឹកអ្នកដំណើរទៅមកកម្ពុជាចិននោះទេ ដែលឡើងថ្លៃ សូម្បីតម្លៃដឹកជញ្ជូនទំនិញតាមយន្តហោះទៅប្រទេសផ្សេងៗ ក៏មានការកើនឡើងផងដែរ។ ជាក់ស្តែងបើតាមការគូសបញ្ជាក់របស់ឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា តម្លៃដឹកជញ្ជូនទំនិញតាមយន្តហោះពីកម្ពុជាទៅប្រទេសផ្សេងៗមិនមានការថយចុះនោះទេ ពោលគឺតម្លៃនៅទ្រឹង ហើយទៅប្រទេសខ្លះបានកើនឡើងមួយកម្រិតទៀត។ តែយ៉ាងណាលោកឧកញ៉ាសង្កេតឃើញថា បច្ចុប្បន្នការដឹកជញ្ជូនទំនិញតាមយន្តហោះ មានស្ថានភាពល្អប្រសើរឡើងវិញហើយ បើធៀបនឹងពេលកន្លងមក។
គួរបញ្ជាក់ថា តម្លៃសំបុត្រយន្តហោះទៅមកកម្ពុជា-ចិន បានហក់ឡើងថ្លៃខ្ពស់កប់ពពកចន្លោះពី ៥ពាន់ដល់ជាង១ម៉ឺនដុល្លារ តាំងពីចុងឆ្នាំ២០២១ មកម្ល៉េះ បន្ទាប់ពីចិនប្រកាសលុបចោលជើងហោះហើរប្រមាណ ៥០%ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ក្រោយករណីឆ្លងកូវីដ-១៩ ក្នុងប្រទេសនេះកម្រើកឡើងវិញ។ ការកាត់បន្ថយជើងហោះហើរ និងការរឹតបន្តឹងវិធានការកូវីដ-១៩ ដ៏តឹងរឹងរបស់ចិន ក៏អាចជាការរាំងស្ទះមួយដល់ផែនការផែនការស្តារ និងជំរុញកំណើនក្នុងវិស័យទេសចរណ៍របស់កម្ពុជា ដែលបានដាក់ក្តីរំពឹងខ្ពស់លើភ្ញៀវទេសចរជនជាតិចិន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
